އައްޑޫސިޓީގެ ފުރަތަމަ ޑޮލަރު އޭޓީއެމްގެ ޚިދުމަތް ފަށައިފި

ރާއްޖޭގެ ދެވަނައަށް އެންމެ ބޮޑު އާބާދީ އޮންނަ އައްޑޫ ސިޓީގައި ފުރަތަމަ ފަހަރަށް ޑޮލަރު އޭޓީއެމްއެއް ބަހައްޓައި، ޚިދުމަތް ދޭން ފަށައިފިއެވެ. މި އޭޓީއެމް ބަހައްޓާފައިވަނީ ބޭންކް އޮފް މޯލްޑިވްސް (ބީއެމްއެލް)ގެ ހިތަދޫ ބްރާންޗުގައެވެ.

ބީއެމްއެލް ޑޮލަރު އޭޓީއެމް ރަސްމީކޮށް ހުޅުވައި ދެއްވީ ހިތަދޫ ބްރާންޗުގައި ބޭއްވި ރަސްމިއްޔާތެއްގައި އިޤްތިޞާދީ ތަރައްޤީއާއި ވިޔަފާރިއާއިބެހޭ ވަޒީރު މުހައްމަދު ސަޢީދު އަދި ބޭންކް އޮފް މޯލްޑިވްސްގެ ސީއީއޯ މުހައްމަދު ޝަރީފްއެވެ.

މި ރަސްމިއްޔާތުގައި ވާހަކަދައްކަވަމުން، ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ، ޑޮލަރު އޭޓީއެމް ގާއިމު ކުރުމަކީ އައްޑޫ ސިޓީގައި ޑޮލަރު މުއާމަލާތްތަކަށް އިތުރުވަމުންދާ ޑިމާންޑާ އެއްވަރަށް ޚިދުމަތް ދިނުމަށް ބޭންކުން ދޭ އަހުމިއްޔަތުކަމުގެ ރަމްޒެއް ކަމަށެވެ. އަދި އިސްލާމިކް ބޭންކިން ޚިދުމަތަށް އިސްކަންދިނުމަށް ގަމު ބްރާންޗަށް ދާދި ފަހުން ގެނެވުނު ބަދަލާއި އޭޓީއެމްގެ ޚިދުމަތް ފުޅާކުރުމާއެކު، ބޭންކުން ދަނީ އައްޑޫ ސިޓީގައި ބޭންކިން ޚިދުމަތް އިތުރަށް ހަރުދަނާ ކުރަމުންކަމަށް އޭނާ ވިދާޅުވިއެވެ.

We’re continuing to expand banking services to our communities and today, we are opening a USD ATM at our Hithadhoo Branch in Addu City!

In addition, the Branch currently houses two ATMs, one dedicated to Self-Service Banking and another for cash withdrawals. pic.twitter.com/3Tt436m7Nb

— Bank of Maldives (@bankofmaldives) February 16, 2025

އައްޑޫގައި ޤާއިމްކުރި ޑޮލަރު އޭޓީއެމްއަކީ 24 ގަޑިއިރު ޑޮލަރު ޖަމާކުރުމާއި ޑޮލަރު ނެގުމުގެ ޚިދުމަތް ލިބޭނެ ސެލްފް ސާވިސް އޭޓީއެމްއެކެވެ. މި އޭޓީއެމްގެ އިތުރުން މިހާރުވެސް ހިތަދޫ ބްރާންޗުގައި އިތުރު 2 އޭޓީއެމް ގާއިމްކޮށްފައިވެއެވެ. އެއީ ރުފިޔާ ނެގުމާއި ޖަމާކުރުމަށް ޚާއްޞަ ސެލްފް ސާވިސް އޭޓީއެމްއަކާއި، ރުފިޔާ ނެގުމަށް ޚާއްޞަ އެއް އޭޓީއެމްއެވެ.

އައްޑޫ ސިޓީއަށް ޑޮލަރު އޭޓީއެމްގެ ޚިދުމަތް ތަޢާރަފްކުރުމާއެކު ރާއްޖޭގެ އެންމެ ބޮޑު މާލީ އިދާރާގެ ގޮތުގައި ބީއެމްއެލްއިން ދެމުންދާ ޚިދުމަތްތަކަށް އިތުރު ފުރިހަމަކަމެއް ލިބިގެންދާނެ ކަމަށް ބީއެމްއެލްއިން ވިދާޅުވެއެވެ. އެގޮތުން މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 95 ސެލްފްސަރވިސް ބޭންކިންގ ސެންޓަރ، 151 އޭޓީއެމް، އޭޖެންޓު ބޭންކިންގ ޚިދުމަތް ދެމުން ދެއެވެ.

މުޅިއެކު 35,000 އަށް ވުރެ ގިނަ މީހުން ދިރިއުޅޭ އައްޑޫއަކީ، ސަރުކާރުން ފަތުރުވެރިކަން ތަރައްޤީކުރުމަށް ޚާއްޞަ އިސްކަމެއް ދީގެން މަސައްކަތް ކުރަމުން އަންނަތަނެކެވެ. މިގޮތުން ގަން އިންޓަނޭޝަނަލް އެއަރޕޯޓު ތަރައްޤީކުރުމުގެ މަސައްކަތް ކުރަމުންދާއިރު އައްޑޫގައި އައްސޭރި ޓުއަރިޒަމްގެ ނަމުގައި 6000 އެނދު ތަރައްޤީކުރުމުގެ މަސައްކަތް ދަނީ ކުރަމުންނެވެ.

މި އައު ޑޮލަރު އޭޓީއެމްގެ ޚިދުމަތް ފެށުމާއެކު، އައްޑޫ ސިޓީގެ ރައްޔިތުންނަށާއި ވިޔަފާރިވެރިންނަށް ޑޮލަރު މުޢާމަލާތްތައް ފަސޭހަކަމާއެކު ކުރުމުގެ ފުރުޞަތު ލިބިގެންދާނެއެވެ. މީގެ އިތުރުން، އައްޑޫގައި ފަތުރުވެރިކަން ކުރިއަރަމުން އަންނަ މިންވަރަށް ބަލާއިރު، މި ޚިދުމަތަކީ ފަތުރުވެރިންނަށްވެސް ވަރަށް ބޮޑު ފަސޭހައަކަށް ވެގެންދާނެ ކަމެކެވެ.

ބޭންކް އޮފް މޯލްޑިވްސްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދޯރުކޮށްދިނުންކަމަށް ބީއެމްއެލްއިން ވިދާޅުވެފައިވެއެވެ. މި އަމާޒާ އެއްގޮތަށް، އައްޑޫ ސިޓީގައި ޑޮލަރު އޭޓީއެމްގެ ޚިދުމަތް ފެށުމަކީ އެ ސަރަޙައްދުގެ އިޤްތިޞާދީ ތަރައްޤީއަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.