އިސްރަށްވެހިންގެ ނާދީ ޤާއިމްކުރުމަށް 60 ކައުންސިލުން ޝައުގުވެރިކަން ފާޅުކުރި: ވަޒީރު ޑރ. އައިޝަތު ޝިހާމް

އިސްރަށްވެހިންގެ ނާދީ ޤާއިމްކުރުމަށް 60 ކައުންސިލުން ޝައިގުވެރިކަން ފާޅުކޮށްފައިވާ ކަމަށް އިޖުތިމާއި އަދި އާއިލީ ތަރައްޤީއާއި ބެހޭ ވަޒީރު ޑރ. އައިޝަތު ޝިހާމް ވިދާޅުވެއްޖެ އެވެ. ވަޒީރު މިފަދައިން ވިދާޅުވީ، "އަހާ" ގެ 4 ވަނަ ފޯރަމްގައި ބައިވެރިވެވަޑައިގެން ވާހަކަފުޅުދައްކަވަމުންނެވެ. 

އިސްރަށްވެހިންގެ ނާދީއެއް ޤާއިމްކުރުމުގެ އެންމެ ބޮޑު އެއް މަޤްސަދަކީ، އުމުރުން ދުވަސްވީ މީހުން މުޖުތަމަޢުގައި ހިންގާ އެކިއެކި ޙަރަކާތްތަކުގައި ބައިވެރިވުމުގެ ފުރުޞަތު ތަނަވަސްކޮށްދިނުން ކަމަށް ސަރުކާރުން ވަނީ ވިދާޅުވެފައެވެ. އެހެންކަމުން، އިޖްތިމާޢީ އަދި އާއިލީ ތަރައްޤީއާ ބެހޭ ވުޒާރާއިން ވަނީ، އެ ވުޒާރާއާއި ގުޅިގެން ރަށްރަށުގައި އިސްރަށްވެހިންގެ ނާދީތައް އެޅުމުގެ ފުރުޞަތު ކައުންސިލްތަކަށް ހުޅުވާލައްވާފަ އެވެ. އިޖުތިމާޢީ އަދި އާއިލީ ތަރައްޤީއާއި ބެހޭ ވަޒީރު ވިދާޅުވީ، ދުނިޔޭގެ އެހެން ޤައުމުތަކެކޭ ވެސް އެއްގޮތަށް ރާއްޖޭގައި ވެސް އިތުރުވަމުންދާ އިސްރަށްވެހިންނަށް އެކުވެރި މާޙައުލެއް ޤާއިމްކުރެއްވުމަކީ މުހިންމުކަމެއް ކަމަށެވެ.

އިޖުތިމާއި އަދި އާއިލީ ތަރައްޤީއާއި ބެހޭ ވަޒީރު ޑރ. އައިޝަތު ޝިހާމް ވިދާޅުވީ، ވަކި ރަށްރަށުގައި އިސްރަށްވެހިންނާއި އެކު އުޅެލާނެ ތަންތަން ފާހަގަކުރުމަށް ރާއްޖޭގެ ހުރިހާ ކައުންސިލްތަކާއި އެކު މަޝްވަރާ ކުރައްވަމުން ގެންދަވާ ކަމަށެވެ. އެގޮތުން، އިސްރަށްވެހިންނަށް އެކުވެރި މާހައުލެއްގައި އުޅެވޭނެ ތަންތަން ޤާއިމްކުރުމަށް ގާތްގަނޑަކަށް 60 ވަރަކަށް ކައުންސިލުން ޝައުގުވެރިކަން ފާޅުކޮށްފައިވާ ކަމަށް ވަޒީރު ވިދާޅުވިއެވެ. 

ވަޒީރު ވިދާޅުވީ، ރާއްޖޭގެ އެކި ރަށްރަށަށް ވަޑައިގެން އިސްރަށްވެހިންގެ ޝަކުވާތައް އަޑުއެއްސެވުމުގެ މަސައްކަތް މިހާރު ކުރިއަށްދާ ކަމަށެވެ. އަދި، މި ޝަކުވާތަކަށް ބަލާ އިސްރަށްވެހިންނަށް ޚާއްޞަ ޕޮލިސީއެއް އެކުލަވާލައްވާނެކަމަށް ވަޒީރު ވިދާޅުވިއެވެ. މީގެ އިތުރުން، އެފަރާތްތަކާއި އެކު މަސައްކަތްކުރާނެ އެކްޝަން ޕްލޭނެއް ތައްޔާރުކުރުމުގެ މަސައްކަތް ވެސް މިހާރު ކުރައްވަމުން ގެންދަވާ ކަމަށް އިޖުތިމާއި އަދި އާއިލީ ތަރައްޤީއާއި ބެހޭ ވަޒީރު ޑރ. އައިޝަތު ޝިހާމް ވިދާޅުވިއެވެ.

އަދުގެ މުޖުތަމަޢުގައި އިސްރަށްވެހިންގެ ދައުރު ފުޅާކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެކެވެ. އެގޮތުން، އެމަނިކުފާނުގެ ވަޢުދުފުޅާއި އެއްގޮތަށް އިސްރަށްވެހިންނަށް ރައްކާތެރިކަން ކަށަވަރުކޮށްދީ، އެފަރާރްތަކަށް ޚާއްޞަ ކްލިނިކްތައް ޤާއިމުކޮށް، އެކިއެކި ޕްރޮގްރާމްތައް ހިންގުމަށް ހަމަޖެހިފައިވާ ކަމަށް ވަޒީރު ޑރ. އައިޝަތު ޝިހާމް ވިދާޅުވިއެވެ. މީގެ އިތުރުން ވަޒީރު ވިދާޅުވީ، ރައީސް ޑރ. މުޢިއްޒުގެ ސަރުކާރުން އިސްރަށްވެހިންނަށް ދިމާވާ ގޮންޖެހުންތައް ދެނެގަނެ، އެކަންކަމަށް ޙައްލެއް ގެނެސްދެއްވުމަށް މަސައްކަތް ކުރައްވަމުން ގެންދަވާ ކަމަށެވެ. 

ރާއްޖޭގެ އެކި ސަރަޙައްދުތަކުގައި އިސްރަށްވެހިންގެ ނާދީތައް ތަރައްޤީކުރުމަށް ނިންމަވާފައިވާއިރު، މި މަޝްރޫޢުގެ ދަށުން އެންމެ ފުރަތަމަ ނާދީ ހުޅުވާފައިވަނީ ނިމިދިޔަ އަހަރުގެ ފެބްރުއަރީ މަހުގައެވެ. އަދި، ހުޅުމާލޭގައި ތަރައްޤީކޮށްފައިވާ އިސްރަށްވެހިންގެ މަރުކަޒު ހުޅުވުމަށް މިހާރު ވަނީ ތައްޔާރުވެފަ އެވެ.