އިލެކްޝަންސް ކޮމިޝަނުގެ ރައީސަކަށް މުޙައްމަދު ޒާހިދު އަދި ނައިބު ރައީސަކަށް ޢަބްދުއްރަޙްމާން ޞަލާޙް އައްޔަންކުރައްވައިފި

ރައްޔިތުންގެ މަޖިލީހުން އިލެކްޝަންސް ކޮމިޝަނުގެ ރައީސަކަށް މުޙައްމަދު ޒާހިދު އަދި ނައިބު ރައީސަކަށް ޢަބްދުއްރަޙްމާން ޞަލާޙް ރަޝީދު އައްޔަން ކުރުމަށް ފާސްކޮށްފިއެވެ.

އިލެކްޝަންސް ކޮމިޝަނުގެ ރައީސްކަމަށް މުޙައްމަދު ޒާހިދު އައްޔަންކުރުމަށް ފާސްވެފައިވަނީ ވޯޓުގައި ބައިވެރިވި 68 މެންބަރުންގެ އިއްތިފާޤުންނެވެ. އަދި ނައިބު ރައީސަކަށް ޢަބްދުއްރަޙްމދުއްރަޙްމާން ޞަލާޙް ރަޝީދު އައްޔަންކުރަން ފެންނަކަމަށް ވޯޓުދެއްވާފައިވަނީ 69 މެންބަރުންނެވެ.

އިލެކްޝަންސް ކޮމިޝަނުގެ ޤާނޫނަށް މިދިޔަ އަހަރު ގެނެވުނު އިޞްލާހާ އެއްގޮތަށް، އިލެކްޝަންސް ކޮމިޝަނުގެ ރައީސާއި ނައިބު ރައީސް އައްޔަން ކުރައްވާނީ ރައީސުލްޖުމްހޫރިއްޔާއެވެ. ނަމަވެސް މި ދެ މަޤާމަށް ބޭފުޅުން އައްޔަން ކުރެވޭނީ ރައްޔިތުންގެ މަޖިލީހުގެ ރުހުން ލިބުމުންނެވެ. މީގެ ކުރިން ކޮމިޝަނުގެ ރައީސާއި ނައިބު ހޮވަމުން އައީ އެ ކޮމިޝަނުގެ މެންބަރުންގެ މެދުގައި ނަގާ ވޯޓަކުންނެވެ.

މި އައު އިޞްލާހުގެ ދަށުން، ރައީސުލްޖުމްހޫރިއްޔާ ޑޮކްޓަރ މުޢިއްޒު  ވަނީ އިލެކްޝަންސް ކޮމިޝަނުގެ ރައީސަކަށް މުޙައްމަދު ޒާހިދު އަދި ނައިބު ރައީސަކަށް ޢަބްދުއްރަޙްމާން ޞަލާޙް ރަޝީދު އައްޔަން ކުރެއްވުމަށް ރައްޔިތުންގެ މަޖިލީހަށް ހުށަހަޅުއްވާފައެވެ. މި މައްސަލަ ދިރާސާކުރި މިނިވަން މުއައްސަސާތަކުގެ ކޮމިޓީން ވެސް ނިންމާފައިވަނީ މި ދެ މަޤާމަށް އެ ބޭފުޅުން އައްޔަންކުރުމަށް ފެންނަ ކަމަށެވެ.

އިލެކްޝަންސް ކޮމިޝަނަކީ 2008 ވަނަ އަހަރުގެ ޤާނޫނުއަސާސީގެ ދަށުން އުފައްދާފައިވާ މިނިވަން މުއައްސަސާއެކެވެ. މި ކޮމިޝަނުގެ މައިގަނޑު މަސްއޫލިއްޔަތުތަކުގެ ތެރޭގައި އިންތިޚާބުތަކާއި ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ކަންތައްތައް ބެލެހެއްޓުމާއި، ސިޔާސީ ޕާޓީތައް ރަޖިސްޓަރީކޮށް ބެލެހެއްޓުން ހިމެނެއެވެ.

މިހާރު އިލެކްޝަންސް ކޮމިޝަނުގައި ތިއްބެވީ ފަސް މެންބަރުންނެވެ. އެއީ ޑރ. މުޙައްމަދު ޒާހިރު، ޙަސަން ޒަކަރިއްޔާ، ޢަބްދުލްހަސީބް އިސްމާޢީލް، މުޙައްމަދު ޒާހިދު އަދި ޢަބްދުއްރަޙްމާން ޞަލާޙް ރަޝީދެވެ. މުޙައްމަދު ޒާހިދާއި ޢަބްދުއްރަޙްމާން ޞަލާޙް ރަޝީދު އިލެކްޝަންސް ކޮމިޝަނުގެ މެންބަރުންގެ ގޮތުގައި އައްޔަން ކުރެވުނީ މިދިޔަ ޖެނުއަރީ މަހުގެ 26 ވަނަ ދުވަހުއެވެ.