Ads by Exprox

ޚަބަރު

ރައީސްގެ ނިންމެވުމަށް ބީއެމްއެލްއިން ޢުމްރާވެރިންގެ ޑެބިޓް ކާޑު ލިމިޓް 1500 ޑޮލަރު އިތުރުކޮށްފި

ރައީސްގެ ނިންމެވުމަށް ބީއެމްއެލްއިން ޢުމްރާވެރިންގެ ޑެބިޓް ކާޑު ލިމިޓް 1500 ޑޮލަރު އިތުރުކޮށްފި

އުމްރާގެ އަޅުކަން ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

17 ފެބްރުއަރީ 2025، 12:19

17 ފެބްރުއަރީ 2025، 12:19

ބޭންކް އޮފް މޯލްޑިވްސް (ބީއެމްއެލް) އިން އަންނަ ރަމަޟާން މަހާއި ޝައްވާލް މަހުގެ ފުރަތަމަ 6 ދުވަހުގެ ތެރޭގައި ޢުމްރާއަށް ވަޑައިގަންނަވާ ކަސްޓަމަރުންގެ ޑެބިޓް ކާޑަށް އިތުރު 1500 އެމެރިކާ ޑޮލަރު ދޫކުރުމަށް ނިންމައިފިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި މަހުގެ 10 ވަނަ ދުވަހު އިޢުލާން ކުރެއްވި ނިންމެވުމެއްގެ ދަށުން ބީއެމްއެލްއިން އަޅުއްވާ ފިޔަވަޅެކެވެ.

ބީއެމްއެލްއިން މަޢުލޫމާތު ދެއްވާފައިވާ ގޮތުގައި، މި އިތުރު ލިމިޓް ބޭނުންކުރެވޭނީ ހަމައެކަނި ސަޢުދީ ޢަރަބިއްޔާގައެވެ. އަދި ކޮންމެ ކަސްޓަމަރަކަށްވެސް މި ލިމިޓް ދޫކުރެވޭނީ އެއް ޑެބިޓް ކާޑަކަށެވެ.

ޢުމްރާ ގްރޫޕްތަކާ ގުޅިގެން ދަތުރުކުރާ ފަރާތްތަކަށް މިކަން ފަހިކޮށްދިނުމުގެ ގޮތުން، ޢުމްރާ ގްރޫޕްތަކުން ޢަމަލުކުރަންވީ ގޮތުގެ ތަފްޞީލު ބޭންކުން ވަނީ އެ ގްރޫޕްތަކާ ހިއްސާކޮށްފައެވެ. އެހެންކަމުން، ޢުމްރާ ގްރޫޕްތައް މެދުވެރިކޮށް ޢުމްރާއަށް ވަޑައިގަންނަވާ ބޭފުޅުން އެ ގްރޫޕަކާ ގުޅުއްވުމަށް ބީއެމްއެލްއިން އިރުޝާދު ދެއްވާފައިވެއެވެ.

ވަކިން ދަތުރުކުރައްވާ ޢުމްރާވެރިންނަށް، ފުރުމުގެ 5 ދުވަސް ކުރިން (ބޭންކު ބަންދު ދުވަސްތައް ނުހިމަނައި) ބީއެމްއެލް މޮބައިލް އެޕް މެދުވެރިކޮށް ޕާސްޕޯޓް ކޮޕީއާއި ޓިކެޓް ކޮޕީ ފޮނުވުމުން ބޭންކުން ކާޑު ލިމިޓް ހަމަޖައްސައިދޭނެކަމަށް ބީއެމްއެލްއިން ވިދާޅުވެފައިވެއެވެ.

މީގެ އިތުރުން، ޑެބިޓް ކާޑުތަކަށް މިހާރުވެސް މަހަކަށް ހަމަޖައްސާފައިވާ 250 އެމެރިކާ ޑޮލަރުގެ ލިމިޓްވެސް ލިބޭނެކަމަށް ބީއެމްއެލްއިން ފާހަގަކޮށްފައިވެއެވެ. އަދި ހުރިހާ ޢުމްރާވެރިންނަށްވެސް މިހާރެކޭ އެއްގޮތަށް 500 އެމެރިކާ ޑޮލަރު ބޭންކުން ވިއްކާނެއެވެ.


                    

މި ލިޔުން ކިޔާލުމުން

Ads by MSS