އޭސީސީގެ ނައިބު ރައީސްކަމަށް ޢަބްދުﷲ ނާޝިދު އައްޔަންކުރުމަށް މަޖިލީހުން ފާސްކޮށްފި

އެންޓި-ކޮރަޕްޝަން ކޮމިޝަން (އޭސީސީ)ގެ ނައިބު ރައީސްގެ މަޤާމަށް ޢަބްދުﷲ ނާޝިދު އައްޔަން ކުރެއްވުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ. މި ނިންމުން ފާސްކުރެވުނީ ވޯޓުގައި ބައިވެރިވި 69 މެންބަރުންގެ އިއްތިފާޤުންނެވެ.

މިދިޔަ އަހަރު އެންޓި-ކޮރަޕްޝަން ކޮމިޝަންގެ ޤާނޫނަށް ގެނެވުނު އިޞްލާޙާ އެއްގޮތަށް، އޭސީސީގެ ރައީސާއި ނައިބު ރައީސް އައްޔަން ކުރައްވާނީ ރައީސުލްޖުމްހޫރިއްޔާއެވެ. ނަމަވެސް މި ދެ މަޤާމަށް ބޭފުޅުން އައްޔަން ކުރެވޭނީ ރައްޔިތުންގެ މަޖިލީހުގެ ރުހުން ލިބުމުންނެވެ. މީގެ ކުރިން ކޮމިޝަނުގެ ރައީސާއި ނައިބު ހޮވަމުން އައީ މެންބަރުންގެ މެދުގައި ނަގާ ވޯޓަކުންނެވެ.

ކޮމިޝަނުގެ ނައިބު ރައީސްކަމަށް ޢަބްދުﷲ ނާޝިދު އައްޔަން ކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުޢިއްޒު  ރައްޔިތުންގެ މަޖިލީހަށް ހުށަހެޅުއްވި މައްސަލަ ދިރާސާކުރި މިނިވަން މުއައްސަސާތަކުގެ ކޮމިޓީން ވެސް ވަނީ އޭނާ އެ މަޤާމަށް އައްޔަންކުރަން ފެންނަ ކަމަށް ނިންމާފައެވެ. ޢަބްދުﷲ ނާޝިދު އެންޓި-ކޮރަޕްޝަން ކޮމިޝަންގެ މެންބަރުކަމަށް އައްޔަން ކުރެވިފައިވަނީ މިދިޔަ މަހުގެ 26 ވަނަ ދުވަހުއެވެ.

އެންޓި-ކޮރަޕްޝަން ކޮމިޝަނަކީ 2008 ވަނަ އަހަރުގެ އޯގަސްޓް 7 ވަނަ ދުވަހު ތަޞްދީޤުކުރެވުނު ޤާނޫނުއަސާސީގެ ދަށުން އުފައްދާފައިވާ މިނިވަން މުއައްސަސާއެކެވެ. މި ކޮމިޝަނުގެ މައިގަނޑު މަސްއޫލިއްޔަތުތަކުގެ ތެރޭގައި ކޮރަޕްޝަނުގެ މައްސަލަތައް ބަލައި ތަޙުޤީޤުކުރުމާއި، އިތުރަށް ބަލަންޖެހޭ ކަންތައްތައް ކަމާބެހޭ އިދާރާތަކަށް ހުށަހެޅުމާއި، ޝަރީޢަތަށް ހުށަހަޅަންޖެހޭ މައްސަލަތައް ޕްރޮސިކިއުޓަރ ޖެނެރަލަށް ފޮނުވުން ހިމެނެއެވެ.

އޭސީސީ އެކުލެވިގެންވަނީ ފަސް މެންބަރުންގެ މައްޗަށެވެ. މިހާރު ކޮމިޝަނުގެ ރައީސަކީ އަލްއުސްތާޛް އާދަމް ޝާމިލްއެވެ. އަދި އެހެން މެންބަރުންގެ ގޮތުގައި ތިއްބެވީ އަލްއުސްތާޛާ ޝިޔާމާ މުޙައްމަދު، ޝަޒްނާ ހާޝިމް، އަޙްމަދު ނާޝިދު އަދި ޢަބްދުﷲ ނާޝިދުއެވެ.