ދިވެހިރާއްޖެއާއި ޗައިނާގެ ފުޖިއާން ޕްރޮވިންސްގެ ކުޅިވަރު ބިއުރޯއާ ދެމެދު އެއްބަސްވުމެއްގައި ސޮއިކޮށްފި

ދިވެހިރާއްޖޭގެ ކުޅިވަރާއި ހަށިހެޔޮކަމާއި ބެހޭ ވުޒާރާއާއި، ޕީޕަލްސް ރިޕަބްލިކް އޮފް ޗައިނާގެ ފުޖިއާން ޕްރޮވިންސްގެ ކުޅިވަރު ބިއުރޯއާއި ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައި ވަނީ، ހުޅުލޭ އައިލެންޑް ހޮޓޭލްގައެވެ. ރާއްޖޭގެ ފަރާތުން މި އެއްބަސްވުމުގައި ސޮއިކޮށްފައި ވަނީ ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢުއެވެ. އަދި ޕީޕަލްސް ރިޕަބްލިކް އޮފް ޗައިނާގެ ފަރާތުން ސޮއިކުރެއްވީ ފުޖިއާން ޕްރޮވިންސްގެ ކުޅިވަރު ބިއުރޯގެ ޑިރެކްޓަރ ޖެނެރަލް ޑޮން ޖިން ސޮންއެވެ. 

މި އެއްބަސްވުމުގައި، ދެ ޤައުމުން ގުޅިގެން ކުޅިވަރުގެ ދާއިރާއިން ކުރެވޭނެ ކަންތައްތައް ވަނީ ހިމަނުއްވާފައެވެ. އެގޮތުން، ކުޅިވަރުގެ ދާއިރާއިން ތަމްރީނު ޕްރޮގްރާމްތައް ހިންގުމާއި، ކުޅުންތެރިންނާއި ޓީމުތައް އަދި ކުލަބުތައް ކުރިއެރުވުމަށް އެހީތެރިވުމަށް މި އެއްބަސްވުމުގައި ވަނީ ހިމަނާފައެވެ. މީގެ އިތުރުން، ކުޅިވަރާއި ގުޅުންހުރި ދާއިރާތަކުން މީހުން ބިނާކުރުމަށް ވަނީ ހަމަޖެހިފައެވެ. އޭގެ ތެރޭގައި، ސިއްހީ އޮފިޝަލުންނާއި، ކޯޗުންނާއި، ރެފްރީން، އަމްޕަޔަރުން އަދި ކުޅިވަރުގައި ބޭނުންކުރާ މަނާބޭހަށް އަހުލުވެރިކުރުވުމަށްޓަކައި މިކަމަށް ޚާއްސަ އޮފިޝަލުން ތަމްރީނުކުރުން ވެސް މި އެއްބަސްވުމުގައި ހިމެނެއެވެ. 

މީގެ އިތުރުން މި އެއްބަސްވުމުގައި ވަނީ، ރާއްޖޭގައި ކުޅިވަރުގެ ދާއިރާގައި ހަރަކާތްތެރިވާ ކުޅުންތެރިންނަށް ބައިނަލްއަޤްވާމީ މައިދާނުގައި އިތުރު ފުރުޞަތުތައް ފަހހިކޮށްދިނުމަށް ވެސް ނިންމަވާފައެވެ. މި އެއްބަސްވުމުގެ ސަބަބުން ދިވެހިރާއްޖެއާއި ޗައިނާއާއި ދެމެދު އޮތް ގުޅުން އިތުރަށް ބަދަހިވެގެންދާނެ އެވެ. މި އެއްބަސްވުމުގެ އިތުރުން، ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު ވަނީ ނިމިދިޔަ ޖަނަވަރީ މަހު ފުޖިއާން ޕްރޮވިންސްގައި ބޭއްވި މެރެތަންއެއްގައި ބައިވެރިވެވަޑައިގެންފައެވެ. އަދި، މިކަމުގެ ސަބަބުން ކުޅިވަރާއި ގުޅުންހުރި ގިނަ ދާއިރާތަކުން މުހިންމު މަޝްވަރާތަކެއް ކުރެވިފައިވާ ކަމަށް ޖިން ސޮން ވަނީ ވިދާޅުވެފަ އެވެ.

މި އެއްބަސްވުމުގެ ދަށުން ކުޅިވަރުގެ ދާއިރާގެ އިތުރުން، ދެއ ޤައުމަށް ފައިދާކުރާނެ އެހެން ދާއިރާތަކުން ވެސް ޗައިނާއިން ރާއްޖެއަށް އެހީތެރިކަން ފޯރުކޮށްދެއްވާނެ ކަމަށް ޑޮން ޖިން ސޮން ވިދާޅުވިއެވެ.