ޚަބަރު
ފަތުރުވެރިކަމާއި ތިމާވެއްޓާބެހޭ ވަޒީރަށް ރުހުންދިނުމަށް ރައްޔިތުންގެ މަޖިލީހުން ފާސްކޮށްފި
ފަތުރުވެރިކަމާއި ތިމާވެށްޓާބެހޭ ވަޒީރު ޠާރިޤް އިބްރާހީމް އެ މަޤާމަށް އައްޔަންކުރެއްވުން/ފޮޓޯ: ރައީސް އޮފީސް
ހުލާސާ
ޠާރިޤަށް ރުހުންދެއްވީ 69 މެންބަރުންގެ އިއްތިފާޤުން
ފަތުރުވެރިކަމާއި ތިމާވެށްޓާބެހޭ ވަޒީރު ޠާރިޤް އިބްރާހީމަށް ރުހުންދިނުމަށް ރައްޔިތުންގެ މަޖިލީހުން ފާސްކުރައްވައިފި އެވެ. ވަޒީރަށް ރުހުން ދެއްވުމަށް ފާސްވީ ވޯޓުގައި ބައިވެރިވެވަޑައިގެންނެވި 69 މެންބަރުންގެ އިއްތިފާޤުންނެވެ.
ރައީސުލްހުމްހޫރިއްޔާ ޑރ. މުޙައްމަދު މުޢިއްޒު ވަނީ ފަތުރުވެރިކަމާ ބެހޭ ވުޒާރާއާއި މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރަ އެއްކޮށްލައްވާފައެވެ. އަދި، މި ދެ ވުޒާރާ އެއްކޮށްލައްވާ، ފަތުރުވެރިކަމާއި ތިމާވެށްޓާބެހޭ ވުޒާރާގެ ނަމަށް ބަދަލުކޮށް، މިމަހުގެ 1 ވަނަ ދުވަހު އެ ވުޒާރާގެ ވަޒީރަކަށް ޠާރިޤް އިބްރާހީމް ވަނީ އައްޔަންކުރައްވާފަ އެވެ.
މިބަދަލާއި ގުޅިގެން، މޫސުމީ ބަދަލުތަކާއި ތިމާވެއްޓާ ހަކަތައާބެހޭ ވުޒާރާގެ ދަށުން ހިންގަމުންދިޔަ އެންވަޔަރަންމަންޓަލް ޕްރޮޓެކްޝަން އޭޖެންސީއާއި، ޔުޓިލިޓީ ރެގިއުލޭޓަރީ އޮތޯރިޓީއާއި، މޯލްޑިވްސް މީޓިއޮރޮލޮޖިކަލް ސަރވިސްއާއި، މާޅޮސްމަޑުލު ދެކުނުބުރީ ބަޔޮސްފިއަރ ރިޒާރވް އޮފީހަކީ ފަތުރުވެރިކަމާއި ތިމާވެށްޓާބެހޭ ވުޒާރާގެ ދަށުން ހިންގަމުންދާ ތަންތަނުގެ ގޮތުގައި ވަނީ ކަނޑައަޅުއްވާފަ އެވެ.
ދިވެހިރާއްޖޭގެ ޤާނޫނުގައި ވާގޮތުން، ވަޒީރުކަމަށް ބޭފުޅަކު އައްޔަންކުރެއްވުމަށްފަހު އެ ވަޒީރުންނަށް ރުހުން ހޯއްދެވުމަށް މަޖިލީހަށް ހުށައަޅަންޖެހޭނެއެވެ. އަދި، ވަޒީރުންނަށް ޤާނޫނީގޮތުން ބާރު ލިބިވަޑައިގަންނަވާނީ ރައްޔިތުންގެ މަޖިލީހުގެ ރުހުން ލިބުމަށް ފަހުގައެވެ. ވަޒީރު ޠާރިޤަށް ރުހުން ދިނުމަށް ކޮމިޓީއަށް ހުށައަޅާފައިވާ ރިޕޯޓަށް މަޖިލީހުގެ ތަޅުމުގައި މެންބަރުން ވަނީ ވާހަކަދައްކަވާފައެވެ. އެގޮތުން، ސަރުކާރަށް ތާޢީދުކުރާ މެންބަރުންނާއި، އިދިކޮޅު ޕާޓީގެ މެންބަރުންވެސް ވެސް ވަނީ ވަޒީރު ޠާރިޤަކީ އެ މަޤާމަށް އެންމެ އެކަށީގެންވާ ބޭފުޅުކަމަށް ވިދާޅުވެފަ އެވެ. މީގެ އިތުރުން، މި މައްސަލަ ދިރާސާކުރެއްވި ސަރުކާރުގެ މަސްޢޫލިއްޔަތު އަދާކުރާ ކޮމެޓީއިން ވެސް ވަނީ އެމަނިކުފާނަށް ރުހުން ދިނުމަށް ފާސްކޮށްފަ އެވެ.
މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާ އަދި ފަތުރުވެރިކަމާބެހޭ ވުޒާރާ އެއްކޮށްލާފައިވަނީ ފަތުރުވެރިކަމާބެހޭ ވަޒީރުގެ މަޤާމުގައި ހުންނެވި އިބްރާހީމް ފައިޞަލް އެ އެމަޤާމުން ވަކިކުރެއްވުމާއި ގުޅިގެންނެވެ.
