ޚަބަރު
މިއަހަރުގެ ޙައްޖުގެ ތައްޔާރީތަކާ ގުޅޭގޮތުން ސަޢުދީގެ ޙައްޖު މިނިސްޓްރީގެ އިސްވެރިންނާއެކު މަޝްވަރާކުރައްވައިފި

މިއަހަރުގެ ޙައްޖުގެ ތައްޔާރީތަކާ ގުޅޭގޮތުން ސަޢުދީ ޢަރަބިއްޔާގެ ޙައްޖު މިނިސްޓްރީގެ އިސްވެރިންނާއެކު މަޝްވަރާކުރެއްވުން/ފޮޓޯ: މޯލްޑިވްސް ޙައްޖު ކޯރޕަރޭޝަން
ހުލާސާ
ޙައްޖު ކޯރޕަރޭޝަންގެ ހަވާލުގައި މިދިޔަ އަހަރު ޖުމްލަ 1150 ދިވެހިން ޙައްޖުގެ އަޅުކަން އަދާކުރި
މިއަހަރުގެ ޙައްޖުގެ ތައްޔާރީތަކާ ގުޅޭގޮތުން ރާއްޖެއާއި ސަޢުދީ ޢަރަބިއްޔާގެ ޙައްޖު މިނިސްޓްރީގެ އިސްވެރިންނާއެކު މަޝްވަރާ ބައްދަލުވުމެއް ބާއްވާފިއެވެ.
މި މަޝްވަރާ ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގެންނެވީ، ޙައްޖު ކޯރޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ޝަރީފާއި، އެ ކޯރޕަރޭޝަންގެ ހެޑް އޮފް ޙައްޖު އެންޑް ޢުމްރާ އޮޕަރޭޝަންސް އިރްފާން އަންވަރެވެ.
ޙައްޖު ކޯރޕަރޭޝަނުން ވިދާޅުވީ، މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރެއްވުނީ ޙައްޖުގެ ތައްޔާރީތަކާއި ގުޅޭގޮތުން ކަމަށެވެ. އެގޮތުން، މުޒްދަލިފާ، މިނާ، އަދި އަރަފާތުގައި ޙައްޖުވެރިންނަށް ބޭނުންވާ ފޭލިގެ ހަމަޖެއްސުމާއި ގުޅޭގޮތުން މަޝްވަރާކުރެވުނު ކަމަށް އެ ކޯރޕަރޭޝަނުން ވިދާޅުވިއެވެ. މީގެ އިތުރުން، ޙައްޖުވެރިން އެއްތަނުން އަނެއްތަނަށް ދަތުރުކުރުމަށް ބަސް ދަތުރުތައް ހަމަޖައްސާނެ ގޮތްތަކާއި ގުޅޭގޮތުން ވަނީ މަޝްވަރާކުރައްވާފައެވެ. ހަމަ އެހެންމެ، ޙައްޖުވެރިން ބޭތިއްބުމުގައި ނަގަންޖެހޭ ހުއްދަތައް ނެގުމުގެ ކަންކަމުގައި ދިމާވާ ގޮންޖެހުނަތަކާއި ގުޅޭގޮތުން ވެސް މަޝްވަރާކުރައްވާފައިވާ ކަމަށް ޙައްޖު ކޯރޕަރޭޝަނުން ވިދާޅުވިއެވެ.
ނިމިދިޔަ އަހަރު ޙައްޖު ކޯރޕަރޭޝަންގެ ދަށުން ޖުމްލަ 1،150 ދިވެހިން ވަނީ ޙައްޖުގެ އަޅުކަން އަދާކޮށްފައެވެ. އަދި ކޮންމެ އަހަރަކުވެސް ޙައްޖުވެރިންނަށް ބޭނުންވާނެ ކަންކަން ފަސޭހައިން ކޮށްދެއްވުމަށްޓަކައި ސަރުކާރުން އެކި މަސައްކަތްތައް ކުރައްވައެވެ.