ކުޅިވަރު / ދުނިޔެ
ޕާކިސްތާނަށް ދިއުމަށް އެދުނު އިންޑިއާގެ ހުރިހާ ނޫސްވެރިންނަށް ޙުއްދަ ދީފި
މުބާރާތުގެ ޗެމްޕިއަންސް ޓްރޮފީ---
ހުލާސާ
އިންޑިއާއިން 7 ނޫސްވެރިއަކު ޕާކިސްތާނަށް ދިއުމަށް ހަމަޖެހިފައިވޭ
ޕާކިސްތާނުގައި މާދަމާ ފެށުމަށް ހަމަޖެހިފައިވާ އިންޓަނޭޝަނަލް ކްރިކެޓް ކައުންސިލްގެ ޗެމްޕިއަންސް ޓްރޮފީ ކަވަރު ކުރުމަށް އެ ޤައުމަށް ދިއުމަށް ބޭނުންވެގެން ވިސާއަށް އެދި ހުށަހެޅި އިންޑިއާގެ ހުރިހާ ނޫސްވެރިންނަށް ވިސާ ދޫކުރަން ނިންމައިފިއެވެ.
މި މުބާރާތް ކަވަރު ކުރުމަށް ޕާކިސްތާނަށް ދިއުމަށް އެދުނީ އިންޑިއާގެ ހަތް ނޫސްވެރިއެކެވެ. އަދި މި ނޫސްވެރިންނަށް މުބާރާތުގެ ކަންކަމުގައި ހަރަކާތްތެރިވުމަށް އެއްވެސް ދައްޗެއް ނޯންނާނެކަމަށް ޕާކިސްތާނުން ވަނީ ހާމަކޮށްފައެވެ.
މިއީ ޒަމާންތަކަކަށްފަހު އިންޑިއާގެ ނޫސްވެރިންތަކެއް ޕާކިސްތާނަށް ދަތުރުކުރާނެ ފުރަތަމަ ފަހަރެވެ.
ނަމަވެސް، މުބާރާތުގައި އިންޑިއާގެ މެޗުތައް ކުޅުމަށް އިންޑިއާގެ ކްރިކެޓު ޓީމު ޕާކިސްތާނަށް ނުފޮނުވުމަށް އެ ޤައުމުގެ ސަރުކާރުން ނިންމުމުން، އިންޑިއާގެ ހުރިހާ މެޗެއް ކުޅުމަށް ހަމަޖެއްސީ ދުބާއީއެވެ. އަދި ޕާކިސްތާނާ އިންޑިއާ އެއް ގްރޫޕެއްގައި ހިމެނުމުން، މުބާރާތް ބާއްވާ ޤައުމުން ވެސް އިންޑިއާއާ ދެކޮޅަށް ކުޅުމަށް ދާން ޖެހެނީ ދުބާއީއަށެވެ.
މުބާރާތް ފަށާ މެޗުގައި މާދަމާ ބައްދަލުކުރާނީ ޕާކިސްތާނާއި ނިއުޒީލޭންޑެވެ. މި މެޗު ފަށާނީ ރާއްޖެ ގަޑިން މެންދުރުފަހު ދޭއް ޖަހާއިރެވެ.
މި މުބާރާތް ކަވަރުކުރުމަށް އިންޑިއާގެ ނޫސްވެރިންނަށް ޕާކިސްތާނުން ޙުއްދަދީފައިވީ ނަމަވެސް، މީގެ ކުރިން ޕާކިސްތާނުގެ ނޫސްވެރިންގެ އިތުރުން، މުބާރާތްތަކުގައި ކުޅޭ ކުޅުންތެރިންނާއި އޮފިޝަލުންނަށް އިންޑިއާއަށް އެތެރެވުމަކީ އުނދަގޫ ކަމެކެވެ. މި ގޮތުން އެންމެ ފަހުގެ ސާފް ޗެމްޕިއަންޝިޕް ފުޓްބޯޅަ މުބާރާތަށް ޕާކިސްތާނުގެ ފުޓްބޯޅަ ޓީމަށް އިންޑިޔާ އަށް އެތެރެވެވމުގެ ހުއްދަ ލިބުނީ މެޗު ކުޅެން އޮތް ވަގުތު ހަ ގަޑިއިރަށް ކުޑަތަންވި ފަހުންނެވެ.
މި މަހުގެ 19 އިން އަންނަ މާޗު މަހުގެ 9 އަށް ޕާކިސްތާނުގައި ބާއްވާ މުބާރާތުގައި ކުޅޭނީ އަށް ގައުމެވެ. ގްރޫޕް އޭ ގައި ހިމެނެނީ އިންޑިޔާ އާއި މުބާރާތް ބާއްވާ ޕާކިސްތާނާއި ބަނގްލަދޭޝް އާއި ނިއުޒީލޭންޑެވެ. ގްރޫޕް ބީގައި ހިމެނެނީ އޮސްޓްރޭލިޔާ އާއި ދެކުނު އެފްރިކާ އާއި އަފްގާނިސްތާނާއި އިންގްލޭންޑެވެ.
