ޕީއެސްއެމްއާއި އެކު އެމްއެމްޕީއާރްސީން ފަތުރުވެރިކަން ޕްރޮމޯޓްކުރަނީ

ދިވެހިރާއްޖޭގެ ފަތުރުވެރިކަން ޕްރޮމޯޓްކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އާއި ޕަބްލިކް ސާވިސް މީޑިއާ (ޕީއެސްއެމް) ގުޅިގެން މަސައްކަތް ކުރުމަށް ނިންމައިފިއެވެ. މި ނިންމުން ހާމަކޮށްފައިވަނީ މިއަހަރަށް އަދި ރޯދަމަހު ޕީއެސްއެމްއިން ގެނެސްދޭ ޕްރޮގްރާމްތައް ލޯންޗު ކުރުމަށް ބޭއްވި ރަސްމިއްޔާތުގެ ތެރެއިންނެވެ.

މި ރަސްމިއްޔާތުގައި ދެ ފަރާތުގެ މެދުގައި އެއްބަސްވުމެއްގައި ސޮއިކުރެވުނެވެ. ޕީއެސްއެމްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އިބްރާހީމް ނަސްރީން އެވެ. އަދި އެމްއެމްޕީއާރްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރޖިންގ ޑިރެކްޓަރ އިބްރާހީމް ޝިއުރީ އެވެ.

މި ރަސްމިއްޔާތުގައި ރާއްޖޭގެ ފުރަތަމަ ޑެސްޓިނޭޝަން ޓީވީ ޗެނަލް، "މޯލްޑިވްސް ޓީވީ" ވެސް ލޯންޗުކުރެވުނެވެ. މި ޗެނަލަކީ ރާއްޖޭގެ ރީތި މަންޒަރުތައް ބޭރު ޤައުމުތަކަށާއި ފަތުރުވެރިންނަށް ދެއްކުމަށް ޚާއްޞަކޮށްގެން ފަރުމާކޮށްފައިވާ ޗެނަލެކެވެ. މި ޗެނަލް ލޯންޗުކޮށްދެއްވީ ފަތުރުވެރިކަމާއި ތިމާވެށްޓާ ބެހޭ ވަޒީރު ތޯރިޤް އިބްރާހީމް އެވެ.

ވަޒީރު ތޯރިޤް ވިދާޅުވީ މި ޗެނަލް ލޯންޗުކުރެވިފައިވަނީ ވަރަށް މުނާސަބު ވަގުތެއްގައި ކަމަށެވެ. އަދި މިއީ ޑެސްޓިނޭޝަން ޕްރޮމޯޓްކުރުމުގެ މަސައްކަތަށް ލިބޭ އިތުރު ބާރެއް ކަމަށާއި، މޯލްޑިވްސް ޓީވީ މެދުވެރިކޮށް ރާއްޖޭގެ ތިމާވެށްޓާއި ޤުދުރަތީ ވެށީގެ ރީތިކަން ދެއްކުމަކީ ސަރުކާރުން އަމާޒު ހިފާފައިވާ 2.3 މިލިއަން ފަތުރުވެރިންގެ އަދަދަށް ވާސިލުވުމަށް އެހީތެރިވެދޭނެ ކަމެއް ކަމުގައި ވިދާޅުވިއެވެ.

މި އެއްބަސްވުމުގެ ދަށުން، އެމްއެމްޕީއާރްސީން ޕީއެސްއެމްއާ ގުޅިގެން 4 މައިގަނޑު މަޝްރޫޢެއް ކުރިއަށް ގެންދާނެއެވެ. އެއީ:

1. ވިޒިޓް މޯލްޑިވްސް ބުކް އޮފް ރެކޯޑްސް - ތާރީޚީ ގޮތުން ފާހަގަކޮށްލެވޭ މުހިންމު ކަންކަން ގެނެސްދޭ މަސައްކަތެއް
2. ދޫނިއަރ ވްރެކް - މަތިންދާ ބޯޓެއް ފައްތައިގެން ޑައިވް ސައިޓެއް ތަރައްޤީކުރުމުގެ މަޝްރޫޢު
3. ބުރުނުބޮމަ - ކެޗް އެންޑް ރިލީޒް އުސޫލުން ކުރިއަށްގެންދާ ދެމެހެއްޓެނިވި މަސްވެރިކަމުގެ މުބާރާތެއް
4. ވިޒިޓް މޯލްޑިވްސް ހެކަތަން - ޑެސްޓިނޭޝަން މާކެޓިންގ ޙައްލުތައް ހޯދުމަށް އިންތިޒާމުކުރާ ހަރަކާތެއް

މީގެ އިތުރުން، ސަރުކާރުން ވަނީ ފަތުރުވެރިން ގެނައުމުގެ މުހިންމު އަމާޒުތަކެއް ކަނޑައަޅާފައެވެ. މި އަމާޒުތައް ހާސިލުކުރުމަށްޓަކައި، ދުނިޔޭގެ އެކި ކަންކޮޅުތަކުގައި ރާއްޖެ ޕްރޮމޯޓްކުރުމަށް އޮންލައިންކޮށް ގިނަ ހަރަކާތްތަކެއް ކުރިއަށް ގެންދާނެ ކަމަށް ބުނެފައިވެއެވެ. މީގެ އިތުރުން، އާންމުކޮށް ބައިވެރިވާ ބައިނަލްއަޤްވާމީ ފަތުރުވެރިކަމުގެ ފެއަރތަކުގައިވެސް މިއަހަރު ބައިވެރިވާނެ ކަމަށް ސަރުކާރުން ހާމަކޮށްފައިވެއެވެ.