ޚަބަރު
ތިން ވުޒާރާއެއްގެ މަސައްކަތު ދާއިރާއަށް ގެނެވުނު ބަދަލުތައް މަޖިލީހުން ފާސްކޮށްފި
ރައްޔިތުންގެ މަޖިލީސް ފޮޓޯ:މަޖިލިސް
ރައްޔިތުންގެ މަޖިލީހުން ވަނީ ދައުލަތުގެ ތިން ވުޒާރާއެއްގެ މަސައްކަތު ދާއިރާއަށް ގެނެވުނު ބަދަލުތައް ފާސްކޮށްފައެވެ. މި ބަދަލުތައް ގެނެވުނު ވުޒާރާތަކަކީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއާއި، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއާއި، ސިއްޙީ ވުޒާރާއެވެ.
މި ބަދަލުތައް ފާސްކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ރައްޔިތުންގެ މަޖިލީހަށް މައްސަލަ ހުށަހަޅުއްވާފައެވެ. މި މައްސަލަ ދިރާސާކުރީ ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމިޓީންނެވެ. ކޮމިޓީން ވެސް ނިންމާފައިވަނީ މި ބަދަލުތަކަށް ރުހުން ދިނުމަށެވެ.
މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާގެ މަސައްކަތުގެ ދާއިރާގައި މަތީ ތަޢުލީމާއި ތަމްރީނުގެ ކަންކަމާއި، އެފަދަ ފުރުޞަތުތައް ފަހިކޮށްދިނުމާއި، މާލީ އެހީތެރިކަން ފޯރުކޮށްދިނުމާއި، ރެގިއުލޭޓުކުރުމުގެ އިތުރުން ޤައުމީ ސަނަދުގެ އޮނިގަނޑާބެހޭ ކަންކަމާއި މަސައްކަތުގެ މާހައުލުގެ ސިއްޙީ ރައްކާތެރިކަމާބެހޭ ކަންކަން ހިމެނެއެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ މަސައްކަތުގެ ދާއިރާގައި ޤައުމުގެ ދާޚިލީ ސަލާމަތާއި، އަމަންއަމާންކަމާއި ދާޚިލީ ހަމަޖެހުން ޤާއިމްކުރުމުގެ ކަންކަމާއި، ކުށް މަދުކުރުމާއި ކުށްވެރިން ބެލެހެއްޓުމާއި ގުޅޭ ކަންކަމުގެ އިތުރުން އިމިގްރޭޝަންގެ ކަންކަމާއި، ބިދޭސީންގެ ވަޒީފާގެ ސިޔާސަތުތައް ތަންފީޒުކުރުމާބެހޭ ކަންކަން ހިމެނެއެވެ. މީގެ އިތުރުން ކުށްކުރާ ކުޑަކުދިންނާބެހޭ ކަންކަމާއި މަސްތުވާތަކެތި ބޭނުންކުރުން ހުއްޓުވުމާބެހޭ ކަންކަމާއި، ސައިންސާއި ޓެކްނޮލޮޖީގެ ކަންކަމާއި ނޭޝަނަލް ރެޖިސްޓްރޭޝަނާއި އާބާދީއާބެހޭ ކަންކަންވެސް ހިމެނެއެވެ.
ސިއްޙީ ވުޒާރާގެ މަސައްކަތު ދާއިރާގައި ރައްޔިތުންނަށް ސަލާމަތް ސިއްޙަތެއް ލިބިދިނުމަށް ކުރަންޖެހޭ އެންމެހާ ކަންކަމާއި، ސިއްޙީ ޚިދުމަތްދޭ ތަންތަނާއި ޚިދުމަތްދޭ މީހުން ރެގިއުލޭޓްކުރުމާބެހޭ ކަންކަން ހިމެނެއެވެ. އަދި ކާބޯތަކެއްޗާއި ބޭހާއި ހެލްތު ކްލިއަރެންސް ހޯދަންޖެހޭ ކެމިކަލާއި ސިއްޙީ އާލާތްތަކުގެ ރައްކާތެރިކަމާބެހޭ ކަންކަމާއި، ރައްކާތެރި ލޭ ފޯރުކޮށްދިނުމާއި ޚާއްޞަ އެހީއަށް ބޭނުންވާ މީހުންގެ މަރުކަޒުގައި ބައިތިއްބައިގެން ބަލަހައްޓަންޖެހޭ މީހުންގެ ކަންކަންވެސް މި ވުޒާރާގެ މަސައްކަތުގެ ދާއިރާގެ ތެރޭގައި ހިމެނެއެވެ.
