ރަމަޟާންމަހު 141 ބާވަތެއްގެ އަގު ސަރުކާރުން މޮނިޓަރ ކުރަނީ

މިއަހަރުގެ ރަމަޟާންމަހު އަސާސީ ކާބޯތަކެތީގެ 141 ބާވަތެއްގެ އަގުތައް ދެނެގަނެ މޮނިޓަރ ކުރަމުންދާނެކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

ވަޒީރު ސަޢީދު ވިދާޅުވިގޮތުގައި، މި 141 ބާވަތުގެ ތެރެއިން 32 ބާވަތެއް ވަނީ ކްރިޓިކަލް އައިޓަމްގެ ގޮތުގައި ފާހަގަކޮށްފައެވެ. އަދި ރަމަޟާންމަހަށް ތައްޔާރުވުމުގެ މަސައްކަތް އެސްޓީއޯއާއި ގުޅިގެން 6 މަސްކުރިން ފަށާފައިވާކަމަށް ވަޒީރު ފާހަގަކުރެއްވިއެވެ.

ރަމަޟާންމަހެއްގައި ރާއްޖެއަށް މުދާ އިމްޕޯޓްކުރާ އަދަދު ބަލާފައި އެސްޓީއޯ މެދުވެރިކޮށް އަދި ބައެއް ހޯލްސޭލަރުން މެދުވެރިކޮށް ރާއްޖޭގައި ލިބޭނެކަން ކަށަވަރުކުރުން. މިހެން ދަންނަވާއިރުވެސް ބައެއް ބާވަތެއް ހިނގައިދާނެ ނުލިބޭ. އެހެންވެއްޖިއްޔާ އެހެން ޤައުމަކުވެސް އެ ބާވަތެއް ގެނެސްގެންވެސް އެ ބާވަތެއް ރައްޔިތުންނާއި ހަމައަށް ފޯރުކޮށްދިނުމޭ ސަރުކާރުގެ އަމާޒަކީ

 ވަޒީރު ސަޢީދު

ވިޔަފާރިއާއި ބެހޭ ވުޒާރާއިން ބުނާގޮތުގައި، މި ރަމަޟާންމަހު ސަރުކާރުން އަގުތައް ގާތުން ބަލާނެ 141 ބާވަތުގެ ތެރޭގައި ގޭބީސީތަކުގައި ކެއުމަށާއި، ކާތަކެތި ތައްޔާރުކުރުމަށް ބޭނުންކުރާ އަސާސީ 93 ބާވަތަކާއި، މޭވާ އަދި ތަރުކާރީގެ 38 ބާވަތެއްގެ އިތުރުން ކަނޑުމަހުގެ 10 ބާވަތެއް ހިމެނެއެވެ.

ކޮންމެ އަހަރެއްގެ ރަމަޟާން މަހުވެސް ބާޒާރުގައި ތަކެތީގެ އަގުތައް އެއްހަމައެއްގައި ހިފެހެއްޓުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. މިފަހަރުވެސް ސަރުކާރުން މި މަސައްކަތް ކުރިއަށް ގެންދަނީ ދުނިޔޭގެ ބާޒާރުގައި ތަކެތީގެ އަގުތައް އުފުލެމުންދާ ދުވަސްވަރެއްގައި ކަމަށް ވަޒީރު ފާހަގަކުރެއްވިއެވެ.