ރާއްޖޭގެ އެކި ސަރަހައްދުތަކުގައި ބަލްކް ސްޓޯރޭޖްތައް ޤާއިމްކުރުމުގެ މަސައްކަތް ފެށިއްޖެ

ރާއްޖޭގެ އެކި ސަރަހައްދުތަކުގައި ގަނޑުކޮށް މުދާ އެތެރެކޮށް ރައްކާކުރެވޭނެ ސްޓޯރޭޖްތަކެއް ހެދުމުގެ މަސައްކަތް ފަށައިފިކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު ސަޢީދު މިހެން ވިދާޅުވީ މިއަދު ރައީސުލްޖުމްހޫރިއްޔާ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމަކީ ބާޒާރުގައި ތަކެތީގެ އަގު ހިފެހެއްޓުމަށް ސަރުކާރުން ކުރަމުންދާ މަސައްކަތާއި ގުޅޭގޮތުން މަޢުލޫމާތު ދެއްވުމަށް ބޭއްވި ބައްދަލުވުމެކެވެ.

ވަޒީރު ސަޢީދު ވިދާޅުވީ ބާޒާރުގައި މުދަލުގެ އަގު ހިފެހެއްޓުމަށްޓަކައި މިހާރު ގިނަ ފިޔަވަޅުތަކެއް އަޅަމުންދާ ކަމަށެވެ. އޭގެ ތެރޭގައި ރާއްޖޭގެ އެކި ސަރަހައްދުތަކުގައި މުދާ ރައްކާކުރެވޭ ގޮތަށް ސްޓޯރޭޖްތަކެއް ހެދުމުގެ މަސައްކަތް ހިމެނެއެވެ. މި މަސައްކަތް ކުރިއަށް ގެންދަނީ ރައީސުލްޖުމްހޫރިއްޔާގެ އެންގެވުމުގެ މަތިން، މޯލްޑިވްސް އިންޑަސްޓްރިއަލް ފްރީޒޯން ކުންފުނި މެދުވެރިކޮށްކަން ވަޒީރު ފާހަގަކުރެއްވިއެވެ.

އެކުންފުނި އުފެއްދި ސަބަބަކީ، ރަށްރަށުގައި އެބަހުރި އިޤްތިޞާދީ މަސައްކަތް ނުފެށި ހުރި ހުސްބިންތަކެއް. މިފަދަ ތަންތާގައި އެންމެ ރަނގަޅު ސަރަހައްދުތަކުގައި ބަލްކް ސްޓޯރޭޖް ހެދޭނެ ތަންތަން ބަލާ ކަނޑައެޅުމަށް ރައީސުލްޖުމްހުރިއްޔާ ވަނީ ނިންމަވާފައި. މިހާރު އެކުންފުނިން މަސައްކަތް ކުރޭ ބިން ލިބޭ ވަރަކުން ބަލްކް ކޮށް މުދާ ބަހައްޓަން

ވަޒީރު ސަޢީދު 

ވަޒީރު އިތުރަށް ވިދާޅުވީ، މި ސްޓޯރޭޖްތައް ޤާއިމްކުރެވޭ ސަރަހައްދުތަކަކީ ޑިއުޓީ ނުނަގާ ސަރަހައްދުތަކެއް ކަމަށެވެ.  މިކަމުގެ ސަބަބުން ތަކެތީގެ އަގު ހިފެހެއްޓުމަށް މަގުފަހިވެގެންދާނެ ކަމަށް އިޤްތިޞާދީ ވުޒާރާއިން ވަނީ ފާހަގަކުރައްވާފައެވެ.

ރަމަޟާންމަހާ ދިމާކޮށް ބާޒާރުގައި ތަކެތީގެ އަގު ހިފެހެއްޓުމަށް ސަރުކާރުން އަބަދުވެސް މަސައްކަތް ކުރާކަން ވަޒީރު ފާހަގަކުރެއްވިއެވެ. އެގޮތުން އެސްޓީއޯ މެދުވެރިކޮށް މުދާ ގެނެސްގެން، ކަނޑައެޅޭ މުދާތަކުގެ އަގުތައް ޤަވާއިދުން މޮނިޓަރ ކުރަމުންދާ ކަމަށް ވިދާޅުވިއެވެ.

ނަމަވެސް، މިއީ ދެމެހެއްޓެނިވި ގޮތެއްގައި ކުރެވޭނެ ކަމެއް ނޫންކަން ވަޒީރު ޤަބޫލުކުރައްވައެވެ.

މިގޮތަކަށް ނޫންކަން ކުރަންވީ، މިއަށްވުރެ ދެމެހެއްޓެނިވި ގޮތެއްގައި މިކަން ކުރަން އެބަޖެހޭ. އެހެންވީމަ ރައީސްގެ މެނިފެސްޓޯގެ މަސައްކަތްޕުޅުތަކުގެ ތެރޭގައި އޮތީ ރާއްޖޭގެ އެކި ސަރަހައްދުތަކުގައި ޑީސެންޓްރަލައިޒްކޮށް ސްޓޯރޭޖްތަކެއް ހެދިގެން ލޫޒް ކާގޯ ބަލްކްކޮށް ސްޓޯރ ކުރުމާއި، ބަލްކް ސްޓޯރޭޖްތައް ހެދިގެން ސަރަހައްދުތަކުން މުދާ ލިބުން

ވަޒީރު ސަޢީދު 

ބާޒާރުގައި ތަކެތީގެ އަގު ހިފެހެއްޓުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އަސާސީ ބާވަތްތަކެއް ކަނޑައަޅައި ރަމަޟާން މަހު އެތަކެތީގެ އަގު ހިފެހެއްޓުމަށް ސަރުކާރުގެ ވިޔަފާރި ކުންފުނި އެސްޓީއޯއާ ގުޅިގެން މިދިޔަ އޮކްޓޯބަރ މަހުން ފެށިގެން ދަނީ މަސައްކަތް ކުރަމުންނެވެ. 

ސަރުކާރުން ވަނީ މިދިޔަ އަހަރެކޭ އެއްގޮތަށް މިއަހަރުވެސް ތަކެތީގެ އަގު ހިފެހެއްޓޭނެ ކަމުގެ ޔަޤީންކަން ދެއްވާފައެވެ. އަދި ބާޒާރުގައި އަސާސީ މުދަލުގެ އަގު ގާތުން ބަލައި، ތަކެތީގެ އަގު އެނގޭނެ ޕްލެޓްފޯމެއްވެސް ޤާއިމްކުރައްވާނެ ކަމަށް އިޤްތިޞާދީ ވުޒާރައިން ވަނީ ހާމަކުރައްވާފައެވެ.