ރަމަޟާން މަސް ފެށޭއިރު އިނާޔަތް ނުލިބޭނަމަ ޝަކުވާ ހުށަހެޅޭނެ- ލޭބަރ ރިލޭޝަންސް އޮތޯރިޓީ

ރަމަޟާން މަސް ފެށޭއިރު ވަޒީފާއަދާކުރާ ދިވެހި މުވައްޒަފުންނަށް އިނާޔަތް ލިބިފައިނުވާނަމަ އެކަމުގެ ޝަކުވާ ހުށަހެޅޭނެ ކަމަށް ލޭބަރ ރިލޭޝަންސް އޮތޯރިޓީން ވިދާޅުވެއްޖެއެވެ.

އެ އޮތޯރިޓީން ކޮށްފައިވާ ޢިއުލާނެއްގައިވަނީ ވަޒީފާއާބެހޭ ޤާނޫނުގައި ބާޔާންކޮފައިވާގޮތަށް ރަމަޟާންމަހުގެ އިނާޔަތް ފުރިހަމައަށް ދޭންވާނެ ކަމުގައެވެ. އެގޮތުން ވަޒީފާ އަދާކުރާ ކޮންމެ ދިވެހި މުވައްޒަފަކަށް ރަމަޟާން މަހުގެ ޢިނާޔަތުގެ ގޮތުގައި ރަމަޟާން މަސް ފެށުމުގެ ކުރިން 3،000 ރުފިޔާ ދޭންވާނެ ކަމަށް އެ ޢިއުލާނުގައި ވެއެވެ.

ލޭބަރ ރިލޭޝަންސް އޮތޯރިޓީން ވިދާޅުވެފައިވަނީ ބައެއް ފަރާތްތަކުން ރަމަޟާން މަހުގެ އިނާޔަތް ދިންކަމުގައިވިޔަސް ވަޒީފާއާބެހޭ ޤާނޫނުގައި ބަޔާންކޮށްފައިވާ ގޮތަށް އެ އިނާޔަތް ދެމުން ނުދާކަން ފާހަގަކުރެވިފައިވާކަމަށާއި، ޤާނޫނާ އެއްގޮތްވާގޮތުގެ މަތިން ރަމަޟާންމަހުގެ އިނާޔަތް ލިބިފައިނުވާތީ ފާއިތުވި އަހަރު ގިނަ މައްސަލަތަކެއް އެ އޮތޯރިޓީއަށް ހުށަހަޅާފައިވާކަމަށެވެ.

ރަމަޟާންމަހުގެ އިނާޔަތް ޕްރައިވެޓް އަދި ޕަބްލިކް ސެކްޓަރތަކުގައި މަސައްކަތްކުރާ މުވައްޒަފުންނަށް ދޭންވާނެ ކަން އިޢުލާނުގައި ބަޔާންކޮށްފައިވެއެވެ. އަދި ވަޒިފާގައި ތިބި ވަގުތީ މުވައްޒަފުންނާއި ޕްރޮބޭޝަންގައި ތިބޭ މުވައްޒަފުންނަށް އަދި ޤާނޫނުން ލިބިދޭ ޗުއްޓީތަކުގައި ތިބޭ މުވައްޒަފުންނަށްވެސް އެ އިނާޔަތް ޙައްޤުވާނެކަމަށް އެ އޮތޯރިޓީން ވިދާޅުވެއެވެ.

ލޭބަރ ރިލޭޝަންސް އޮތޯރިޓީން ވަނީ ވަޒީފާދީގެން މުވައްޒަފުން ގެންގުޅޭ ހުރިހާ ފަރާތްތަކުންވެސް ވަޒީފާއާބެހޭ ޤާނޫނާ އެއްގޮތްވާގޮތުގެ މަތިން ރަމަޟާންމަހުގެ އިނާޔަތް ދިނުމަށް ހަނދާންކޮށްދީފައެވެ. އަދި ރަމަޟާން މަސް ފެށޭއިރު ވަޒީފާއަދާކުރާ ދިވެހި މުވައްޒަފުންނަށް އިނާޔަތް ލިބިފައިނުވާނަމަ އެކަމުގެ ޝަކުވާ ހުށަހެޅޭނެކަންވެސް ބަޔާންކޮށްފައި ވެއެވެ.