އެސްޓީއޯގެ ލުނބޯ ބާޒާރަށް ނެރެފި

ރަމަޟާން މަހަށް ޙާއްސަކޮށްގެން ސްޓޭޓް ޓްރޭޑިން އޯގަނައިޒޭޝަން، އެސްޓީއޯ އިން ގެނައި ލުނބޯ ބާޒާރަށް ނެރެފިއެވެ.

އެސްޓީއޯއިން ހާމަކޮށްފައިވާ ގޮތުގައި، އެ ކުންފުނިން ލުނބޯ ވިއްކުމަށް ކަނޑައަޅާފައި ވަނީ ކިލޯއެއް 40 ރުފިޔާ އަށެވެ. އަދި 5 ކިލޯގެ ލުނބޯ ފޮށިގަނޑެއް ވިއްކަނީ 145 ރުފިޔާއަށެވެ.

އެސްޓީއޯއިން އަންނަނީ އާންމުކޮށް ރަމަޟާން މަހު ބޭނުންކުރާ ކާބޯތަކެތީގެ ބާވަތްތަކުގެ އަގުތައް އިންތިހާ ދަރަޖައަށް މައްޗަށް އުފުލޭތީ، އެ ތަކެތީގެ އަގުތައް އެއްވަރެއްގައި ހިފެހެއްޓުމަށް މަސައްކަތްކުރަމުންނެވެ. މީގެ އިތުރުން، ރަމަޟާން މަހު ބޭނުންކުރާ ތަކެތި ފަސޭހަކޮށް ލިބޭނެ ގޮތް ހަމަޖެއްސުމަކީ ވެސް އެސްޓީއޯގެ އަމާޒެކެވެ.

އެސްޓީއޯއިން ބާޒާރަށް ލުބޯ ނެރުނުއިރު، ބާޒާރުގައި ލުބޯ ކިލޯއެއްގެ އަގު އުޅެނީ 75 ރުފިޔާ އާއި 85 ރުފިޔާ އާއި ދެމެދެވެ. 

ލުނބޯގެ އިތުރުން، އެސްޓީއޯއިން ވަނީ މި އަހަރުގެ ރަމަޟާން މަހަށް ޙާއްސަކޮށްގެން ފިޔާ އާއި ކާށި ވެސް ބާޒާރަށް ނެރެފައެވެ. އެސްޓީއޯއިން ކާއްޓެއް 5 ރުފިޔާއަށް ވިއްކަމުން ދާއިރު، ކާށީގެ އަގު ބާޒާރުގައި އުޅެނީ 10 ރުފިޔާ އާއި 25 ރުފިޔާއާ ދެމެދުގައެވެ. 

އެސްޓީއޯއިން ވަނީ ރޯދައަށް ޚާއްސަކޮށްގެން ހަތަރު ކެޓެގެރީއަކަށް ބަހާލައިގެން ކާބޯތަކެތި އެތެރެކުރުމަށް ތައްޔާރުވެފައެވެ. އޭގެ ތެރޭގައި އަސާސީ ކާބޯތަކެތީގެ ތެރޭގައި ހިމެނޭ ފިޔާ، ބިސް، އަލުވި، ކާށި އަދި ކަދުރު އެތެރެކުރުމަށް ހަމަޖެހިފައިވެއެވެ. މީގެ އިތުރުން ތާޒާ ތަރުކާރިއާއި މޭވާ އާއި ތައްޔާރީ ކާނާގެ އިތުރުން ކެއްކުމަށް ބޭނުންކުރާ ތަކެތިވެސް އެތެރެކުރުމަށް ހަމަޖެހިފައިވެއެވެ.