ޚަބަރު
ރާސްތާ ޕްރޮގްރާމުން ދިރިއުޅުމުގެ ވައްޓަފާޅި ދަސްވެގެންދިޔަކަމަށް އުންމީދުކުރަން: ޑެޕިއުޓީ ކޮމިޝަނަރ ނަވީން

ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން
ގައުމީ ޔުނިވަރސިޓީގެ ދަރިވަރުންނަށް އަމާޒުކޮށްގެން ހިންގުނު ރާސްތާ ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން، ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވެފައިވަނީ މި ޕްރޮގްރާމުން ދަރިވަރުންނަށް ދިރިއުޅުމުގެ މުހިންމު ވައްޓަފާޅިތަކެއް ދަސްވެގެން ދިޔަކަމަށް އުންމީދުކުރައްވާ ކަމަށެވެ.
މިމަހުގެ 13 އިން 16 އަށް ދ. ވާނީގައި ކުރިއަށްގެންދެވުނު މި ޕްރޮގްރާމުގައި ގައުމީ ޔުނިވަރސިޓީގެ އެކި ކޯސްތަކުން 69 ދަރިވަރުން ބައިވެރިވިއެވެ. ޕްރޮގްރާމުގައި ސަވައިވަލް، ޓީމް ބިލްޑިންގ، ސެލްފް ޑިފެންސް، ލީޑަޝިޕް، ވޮލަންޓިއަރިޒަމް، ފިޒިކަލް ފިޓްނަސް، ރިވެތި އަދަބު، ގައުމިއްޔަތު އަދި ދީނީ ދަރުސްތައް ހިމެނެއެވެ.
ޑެޕިއުޓީ ކޮމިޝަނަރ ނަވީން ވިދާޅުވި ގޮތުގައި މި ޕްރޮގްރާމުން ދަރިވަރުންނަށް މީހުންނަށް އިހުތިރާމުކުރުމާއި، ޒިންމާދާރުވުމާއި، ކަންކަމުގައި އިސްނެގުމާއި އަދި ގުޅިގެން މަސައްކަތްކުރުން ދަސްވެގެން ދިޔަކަމަށް އުންމީދުކުރައްވައެވެ. އަދި މި ޕްރޮގްރާމުން ދަސްވި ކޮންމެ ފިލާވަޅަކީ އަމަލީ މައިދާނުގައި ބޭނުންކުރެވޭނެ މުހިންމު ފިލާވަޅަކަށް ވެގެންދާނެ ކަމަށްވެސް އެމަނިކުފާނު ފާހަގަކުރެއްވިއެވެ.
ގައުމީ ޔުނިވަރސިޓީން މިފަދަ ޕްރޮގްރާމްތައް ފުލުހުންނާ ގުޅިގެން ހިންގައި އަދި ގައުމު ބިނާކުރުމަށް އަބަދުވެސް ފުލުހުންނާއެކު މަސައްކަތްކުރާނެ ކަމަށް އުންމީދުކުރަން. ގައުމު ބިނާކުރުމަށް ކުރާ ކޮންމެ ކަމެއްގައި ވެސް ދިވެހި ފުލުހުންގެ އެއްބާރުލުން ލިބޭނެ
ޑެޕިއުޓީ ކޮމިޝަނަރ ނަވީން
މި ރަސްމިއްޔާތުގައި ރާސްތާ ޕްރޮގްރާމުގެ ބައިވެރިންނަށާއި މުދައްރިބުންނަށް އަދި އެކި ގޮތްގޮތުން އެހީތެރިވެދެއްވި ފަރާތްތަކަށް ސެޓްފިކެޓް ދެވުނެވެ. މި ޕްރޮގްރާމަކީ ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް އަދި ގައުމީ ޔުނިވަރސިޓީ ގުޅިގެން ކުރިއަށްގެންދެވުނު ޕްރޮގްރާމެކެވެ.