ޚަބަރު
އެއް އަންހެނެއްގެ ތިން ފިރިން ތިބި މައްސަލައެއް ކޯޓުގައި

އެއް އަންހެނެއްގެ ތިން ފިރިން ތިބި މައްސަލައެއް ކޯޓުގައި
އެއް އަންހެނަކު ކޯޓުގައި ރަޖިސްޓްރީ ކުރުމެއް ނެތި ތިން ކައިވެންޏެއް ކުރުމުގެ ސަބަބުން އެ މީހާގެ ތިން ފިރިން ތިބި މައްސަލަތަކެއް ކޯޓުތަކުގައި އެބަ އޮތް ކަމަށް ފެމެލީ ކޯޓުން މިއަދު ހާމަކޮށްފިއެވެ.
ރައްޔިތުންގެ މަޖިލީހުގެ ގަވާއިދު ކޮމިޓީގެ މިއަދުގެ ބައްދަލުވުމުގައި، ދަރިންނަށް ޚަރަދު ނުދީ ރާއްޖޭން ބޭރަށް ގޮސް އިތުރު ކައިވެނިތައް ކުރާ މައްސަލަތަކާއި ރަޖިސްޓްރީނުކޮށް ކޯޓުން ބޭރުގައި ކައިވެނިކޮށް އުޅޭ މައްސަލަތަކާ ގުޅޭގޮތުން މެންބަރުން ކަންބޮޑުވުން ފާޅުކުރިއެވެ.
ފެމެލީ ކޯޓުގެ ލީގަލް އޮފިސަރު އަހުމަދު މައުސޫމް ވިދާޅުވީ، މި މައްސަލައިގައި އަންހެން މީހާ ފުރަތަމަ ރާއްޖޭން ބޭރުގައި ކައިވެނިކޮށް، އެ ކައިވެނި ރާއްޖޭގައި ރަޖިސްޓްރީ ކުރެވެން ނެތުމުން އަމިއްލައަށް އެ ކައިވެނި ދޫކޮށްލި ކަމަށެވެ. އޭގެފަހުން އިތުރު ކައިވެންޏެއް ކުރި ކަމަށާއި، އެ ކައިވެނި ރަޖިސްޓްރީ ކުރަން ކޯޓަށް ދިޔައިރު، ފުރަތަމަ ކައިވެނީގެ ލިޔެކިޔުންތައް ވެސް ކޯޓުގައި ހުރި ކަމަށް އޭނާ ވިދާޅުވިއެވެ. އަދި އެ ދެ ކައިވެންޏާ މެދު ގޮތެއް ކަނޑަނޭޅެނީސް އިތުރު ތިންވަނަ ކައިވެންޏެއް އެ އަންހެން މީހާ ކޮށްފައިވާ ކަމަށް އޭނާ ހާމަކުރެއްވިއެވެ.
މިއީ ވަރަށް ނުރައްކާތެރި ކަމެއް. މިއީ އަޅުގަނޑުމެންގެ ނަސަބު ވެސް އޮޅިގެން ހިނގައިދާނެ ކަމެއް. ނޭދެވޭ ވަރަށް ގިނަ ކަންކަން ނުކުމެދާނެ ކަމެއް. އެހެންވީމަ މިއީ ވަރަށް ބޮޑަށް ބަލަން ޖެހޭނެ ކަމެއް
ލީގަލް އޮފިސަރު
މިފަދަ މައްސަލަތައް އިތުރުވަމުންދާ ކަމަށް ވެސް އޭނާ ފާހަގަކުރެއްވިއެވެ. އަދި ރާއްޖޭން ބޭރުގައި ކައިވެންޏެއް ކުރާ ނަމަ، ފެމެލީ ކޯޓުގެ ހުއްދައެއް ނަގަން ޖެހޭއިރު ގިނަ މީހުން އެ ހުއްދަތައް ނުނަގާ ކަމަށް އޭނާ ވިދާޅުވިއެވެ.
މި މައްސަލައާ ގުޅިގެން ކަމާބެހޭ ފަރާތްތަކުން އަޅަންޖެހޭ ފިޔަވަޅުތައް އަޅަމުންދާ ކަމަށް ފެމެލީ ކޯޓުން މަޢުލޫމާތު ދީފައިވެއެވެ.