އިސްލާމީ ކަންތައްތަކާ ބެހޭ ވަޒީރު ރާއްޖެއިން މެލޭޝިއާއަށް ކަނޑައަޅުއްވާފައިވާ ސަފީރާއި ބައްދަލުކުރައްވައިފި

އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ދިވެހިރާއްޖެއިން މެލޭޝިއާއަށް ކަނޑައަޅުއްވާފައިވާ ސަފީރު ޑރ. މަރިޔަމް ޝަބީނާ އާއި ބައްދަލުކުރައްވައިފި އެވެ.

ވަޒީރު ޑރ. މުޙައްމަދު ޝަހީމް އަލީ ސަޢީދު ސަފީރާއި ބައްދަލުކުރައްވާފައި ވަނީ، ބުދަ ދުވަހު އިސްލާމީ ކަންތައްތަކާ ބެހޭ ވުޒާރާގައި ބޭއްވެވި ބައްދަލުވުމެއްގަ އެވެ. މި ބައްދަލުވުމުގައި، ވަޒީރު ވަނީ ސަފީރަށް މަރުޙަބާ ދަންނަވާފައެވެ. މީގެ އިތުރުން، ވަޒީރު ވަނީ އިސްލާމީ ކަންތައްތަކާއި ބެހޭ ވުޒާރާއިން ކުރިއަށް ގެންދާ އެކި މަސައްކަތްތަކާ ގުޅޭ މަޢުލޫމާތުތައް ސަފީރާއި ހިއްސާކުރައްވާފަ އެވެ.

މި ބައްދަލުކުރެއްވުމުގައި، މެލޭޝިއާގައި ދިރިއުޅޭ ރައްޔިތުންނަށް ޚާއްޞަކޮށް ޤުރުއާން މުބާރަތެއް ބޭއްވުމާއި ގުޅޭގޮތުން ވަނީ މަޝްވަރާކުރައްވާފަ އެވެ. ހަމަ އެހެންމެ، މިފަރާތްތަކަށް ޤުރުއާން ކިޔަވައިދޭނެ އިންތިޒާމް ހަމަޖެއްސުމަށް ވެސް ވަޒީރު ވަނީ ސަފީރާއި މަޝްވަރާކުރައްވާފަ އެވެ. މީގެ އިތުރުން، މެލޭޝިއާގައި ކިޔަވަމުންދާ ރާއްޖޭގެ ދަރިވަރުންނަށް ދިމާވާ އެކި ޙާލަތްތަކުގައި ޒަކާތު ފަންޑުން އެހީތެރިކަން ފޯރުކޮށްދިނުމާއި ގުޅޭގޮތުން ވެސް މި ބައްދަލުވުމުގައި ވަނީ މަޝްވަރާ ކުރައްވާފަ އެވެ.