Ads by Exprox

ޚަބަރު

ވިޔަފާރީގެ ގުޅުން އިތުރަށް ބަދަހިކުރުމަށް ސްރީލަންކާ އާއިއެކު މަޝްވަރާކުރައްވައިފި

ވިޔަފާރީގެ ގުޅުން އިތުރަށް ބަދަހިކުރުމަށް ސްރީލަންކާ އާއިއެކު މަޝްވަރާކުރައްވައިފި

ރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް ލަންކާގެ މިނިސްޓަރ އޮފް ފޮރިންގ އެފެއަރސް، ފޮރިން އެމްޕްލޯއިމެންޓް އެންޑް ޓުއަރިޒަމް ވިޖީތާ ހެރަތުއާ ބައްދަލުކުރެއްވުން/ފޮޓޯ: ޚާރިޖީ ވުޒާރާ

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

20 ފެބްރުއަރީ 2025، 11:12

20 ފެބްރުއަރީ 2025، 11:12

ހުލާސާ

އެކި ދާއިރާތަކުން ގުޅުން ބަދަހިކުރެވޭނެ ގޮތްތަކާއި ގުޅޭގޮތުން ވަނީ މަޝްވަރާކުރައްވައިފަ

ދިވެހިރާއްޖެއާއި ސްރީލަންކާއާއި ދެމެދު ވިޔަފާރީގެ ގުޅުން އިތުރަށް ބަދަހިކުރުމަށް މަޝްވަރާކުރައްވާފި އެވެ.

މިކަމާއި ގުޅޭގޮތުން މަޝްވަރާކުރައްވާފައިވަނީ، ރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް ސްރީލަންކާ އަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެޤައުމުގެ މިނިސްޓަރ އޮފް ފޮރިންގ އެފެއަރސް، ފޮރިން އެމްޕްލޯއިމެންޓް އެންޑް ޓުއަރިޒަމް ވިޖީތާ ހެރަތުއާއެކު ބޭއްވެވި ބައްދަލުވުމެއްގަ އެވެ.

މި ބައްދަލުވުމުގައި، ދެ ޤައުމުގެ ދެމެދުގައި އޮތް ގުޅުން އިތުރަށް ވަރުގަރަކޮށް، ދެ ޤައުމުން ގުޅިގެން އެކި ދާއިރާތަކުން ކުރެވިދާނެ މަސައްކަތްތަކާއި ގުޅޭގޮތުން މަޝްވަރާކުރައްވާފައިވާ ކަމަށް ޚާރިޖީ ވުޒާރާއިން ވިދާޅުވިއެވެ. ހަމަ އެހެންމެ، ވިޔަފާރީގެ ގުޅުން އިތުރަށް ހަރުދަނާކުރެވޭނެ ގޮތްތަކާއި ބެހޭގޮތުން ވަނީ މަޝްވަރާކުރައްވާފައެވެ. އެގޮތުން، ވިޔަފާރީގެ ދާއިރާއިން ހުރި އިންވެސްޓުމަންޓުތަކުގެ ފުރުސަތުތައް ވިޔަފާރިވެރިންނަށް ފަހިކޮށްދިނުމަށް ދެ ޤައުމުގެ ދެމެދު އެއްބަސްވުންތައް ގާއިމްކުރުމާއި ގުޅޭގޮތުން ވަނީ  މަޝްވަރާކުރައްވާފައެވެ.

 މީގެ އިތުރުން، މަސްވެރިކަމުގެ ސިނާޢަތާއި ފަތުރުވެރިކަމުގެ ސިނާޢަތް ކުރިއެރުވުމުގެ އިތުރުން،  އިއާދަކުރަނިވި ހަކަތައިގެ ދާއިރާ އަދި ދަތުރުފަތުރުގެ ދާއިރާ ކުރިއެރުވުމާއި ގުޅޭގޮތުންވެސް މި ބައްދަލުވުމުގައި ވަނީ މަޝްވަރާކުރައްވާފައެވެ. ޚާރިޖީ ވުޒާރާއިން ވިދާޅުވީ، ރާއްޖެއާއި ސްރީލަންކާގެ މަސްލަހަތު ހިމެނޭ ކަންކަމުގައި ދެ ޤައުމުން ގުޅިގެން ބައިންލައަޤްވާމީ އަދި ސަރަހައްދީ ފެންވަރުގައި ކުރެވޭނެ މަސައްކަތްތަކާއި ގުޅޭގޮތުން މަޝްވަރާކުރައްވާފައިވާ ކަމަށެވެ.

މި ބައްދަލުވުމުގައި ދިވެހިރާއްޖޭގެ ޚާރިޖީ ވަޒީރު ޢަބްދުﷲ ޚަލީލް ވަނީ ސްރީލަންކާއިން ރާއްޖެއަށް އެކި ދާއިރާތަކުން ފޯރުކޮށްދެމުންދާ އެހީތެރިކަން ފާހަގަކޮށް، އެކަމަށް ޝުކުރު ދަންނަވާފަ އެވެ. މި ދަތުރުފުޅުގައި ވަޒީރު ސްރީލަންކާގެ ރައީސް އަނުރަ ކުމާރަ ދިސާނަޔަކައާއި، ބޮޑުވަޒީރު ޑރ. ހަރީނީ އަމަރަސޫރިޔެއާ ބައްދަލުކުރައްވާނެއެވެ. މީގެ އިތުރުން، ވަޒީރު ވަނީ ސްރީލަންކާގައި ދިރިއުޅެމުންދާ ދިވެހިންނާއި ބައްދަލުކުރުމަށް ވެސް ހަމަޖެހިފައެވެ.

ވަޒީރު ސްރީލަންކާއަށް މިހާރު ކުރައްވަމުން ގެންދަވާ ދަތުރުފުޅަކީ، އެ ޤައުމުގެ މިނިސްޓަރ އޮފް ފޮރިން އެފޭއަރސް، ފޮރިން އެމްޕްލޯއިމެންޓް އެންޑް ޓުއަރިޒަމް ވިޖީތާ ހެރަތުގެ ދައުވަތަކަށް ކުރައްވާ ދަތުރުފުޅެކެވެ. 

މި ލިޔުން ކިޔާލުމުން

Ads by MSS