ރައްޔިތުންނަށް ވީހާވެސް ފަސޭހަކުރުމަށް މަސްދަޅުބެހުން މިރެއަށް ލަސްކޮށްފި

ރަމަޟާން މަހަށް ގޭބިސީތަކަށް ސަރުކާރުން ދެއްވާ މަސްދަޅު ކޭސް ބަހަން ފަށާނީ މިރޭ 20:30 ގައި ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މިއަދު ހާމަކޮށްފިއެވެ.

ކުރިން މިއަދު 14:30 ގައި މަސްދަޅު ކޭސް ބަހަން ފަށަން ރާވާފައިވީ ނަމަވެސް، ކުރީ އަހަރުގެ ތަޖުރިބާއާއި ދިމާވި ދަތިތަކަށް ރިޢާޔަތްކޮށް، މިއަހަރުގެ ހަދިޔާ ބެހުމުގެ އިންތިޒާމު އިތުރަށް ހަރުދަނާކޮށް ރައްޔިތުންނަށް ވީހާވެސް ފަސޭހަކޮށް މަސްދަޅު ކޭސް ލިބޭނޭގޮތަށް ކަންކަން އިންތިޒާމްކުރުމުގެ ގޮތުން ބަހަން ފަށާ ގަޑި މިރެއަށް ލަސްކުރިކަމަށް އެސްޓީއޯއިން ބުނެފައިވެއެވެ.

މިމަހުގެ 27 ގެ ނިޔަލަށް ހުކުރުދުވަސް ފިޔަވާ ކޮންމެ ދުވަހަކުވެސް މަސްދަޅު ކޭސް ބެހުން ކުރިއަށްދާނެ ކަމަށް އެސްޓީއޯއިން މަޢުލޫމާތު ދީފައިވެއެވެ. މާލެ ސަރަޙައްދުގައި މަސްދަޅު ކޭސް ބެހުމަށް ހަމަޖެހިފައިވަނީ މިފްކޯ އޮފީސް ކޮމްޕައުންޑް، ހެންވޭރު އެމްޓީސީސީ ސޯމިލް، ވިލިމާލޭ ވެމްކޯ ސައިޓް، ހުޅުމާލެ ފޭސް-1 ގެ އުމަރު ޒާހިރު ބިލްޑިންގ އަދި ހުޅުމާލެ ފޭސް-2 ގެ ހިޔާ ފްލެޓް ޓަވަރ 10 ގެ ޔޫތު ސެންޓަރުގައެވެ.

މަސްދަޅު ކޭސް ދޫކުރާނީ ހަމައެކަނި ދިވެހީންނަށް ކަމަށާއި، މަސްދަޅު ކޭސް ބަލާ ދާ މީހާގެ އައިޑީކާޑު އަދި އެގޭބީސީއެއްގެ ކަރަންޓް ބިލުގެ އެންމެ ފަހު ތިން މަހުގެ ބިލުގެ ތެރެއިން ކަރަންޓް މީޓަރު އެނގޭނެ ފަދަ ލިޔުމެއް ގެންނަން ޖެހޭނެކަމަށް އެސްޓީއޯއިން އަންގާފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކުރިއަށް އޮތް ރަމަޟާންމަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރުމަށް ނިންމަވާފައިވާކަން އިޢުލާންކުރައްވާފައެވެ. މި ވަޢުދާ އެއްގޮތަށް، އަތޮޅުތަކުގެ ބައެއް ކައުންސިލްތަކުން މިހާރު ވަނީ މަސްދަޅު ކޭސް ބަހަން ފަށާފައެވެ.

ރަމަޟާންމަހަށް ޚާއްޞަކޮށްގެން ގޭބީސީތަކަށް ބަހަނީ އާންމުކޮށް ބޭނުންކުރާ 180 ގްރާމްގެ 48 ދަޅުގެ މަސްދަޅު ކޭހެވެ. ރަމަޟާން މަސް ފެށުމުގެ ކުރިން މަސްދަޅު ކޭސްތައް ބަހައި ނިމޭނެކަމަށް ސަރުކާރުން ވަނީ ވިދާޅުވެފައެވެ. މިއަހަރުގެ ރަމަޟާން މަހުގެ ފުރަތަމަ ދުވަހަކީ މާރިޗު މަހުގެ 1 ވަނަ ދުވަސް ކަމަށް ލަފާކުރެވެއެވެ.