ޚަބަރު
މަސްދަޅު ކޭސް ބަހަންފެށި ފުރަތަމަ ރޭ 9000 އަށްވުރެ ގިނަ ގޭބިސީއަށް ލިބިނު

މަސްދަޅު ބެހުން ކުރިއަށް ދިޔަ ފުރަތަމަ ރޭ ފޮޓޯ: ސަން އޮންލައިން
ރަމަޟާން މަހަށް ސަރުކާރުން ގޭބިސީތަކަށް ދެއްވާ މަސްދަޅު ކޭސް ބެހުން ބުރާސްފަތި ދުވަހުގެ ރޭ 20:30 ގައި މާލެ ސަރަހައްދުގައި ވަނީ ފަށާފައެވެ. ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވިގޮތުގައި، ފުރަތަމަ ރޭ އެކަނިވެސް 9394 ގޭބީސީއަކަށް މަސްދަޅު ކޭސް ބަހާފައިވެއެވެ.
މަސްދަޅު ކޭސް ބެހުނު ތަންތަނުގެ ތެރޭގައި ވިލިމާލެ، އެމްޓީސީސީ ސޯމިލް، މިފްކޯ، ހިޔާ ފްލެޓް ޓަވަރު 10 އަދި އުމަރު ޒާހިރު ބިލްޑިންގ ހިމެނެއެވެ. މި ތަންތަނުގައި ޖުމްލަ 9394 ކޭސް ބެހުނެވެ.
މަސްދަޅު ކޭހަށް ޑިމާންޑް ބޮޑުވުމާ ގުޅިގެން، ސަރުކާރުން ވަނީ ހޮނިހިރު ދުވަހުން ފެށިގެން 13 ތަނެއްގައި މަސްދަޅު ކޭސް ބެހުމަށް ނިންމާފައެވެ. މީގެ ތެރޭގައި މިފްކޯ އޮފީސް ކޮމްޕައުންޑް، ގަލޮޅު ދަނޑު، ސޯޝަލް ސެންޓަރު، ހެންވޭރު ދަނޑު، ވިލިމާލެ އަދި ހުޅުމާލޭގެ އެކި ސަރަހައްދުތައް ހިމެނެއެވެ.
ހޮނިހިރު ދުވަހުން ފެށިގެން މަސްދަޅު ކޭސް ދޫކުރާނީ ހަމައެކަނި ރޭގަނޑު ކަމަށް ސަރުކާރުން ވަނީ އިޢުލާނުކޮށްފައެވެ. މަސްދަޅު ކޭސް ލިބޭނީ ހަމައެކަނި ދިވެހީންނަށް ކަމަށާއި، މަސްދަޅު ކޭސް ބަލާ ދާ މީހާގެ އައިޑީ ކާޑާއި ކަރަންޓް ބިލުގެ ކޮޕީއެއް ގެންދިއުން މުހިންމު ކަމަށް އެސްޓީއޯއިން ވަނީ އަންގާފައެވެ.
ކޮންމެ ގޭބީސީއަކަށް 180 ގްރާމްގެ 48 ދަޅުގެ މަސްދަޅު ކޭހެއް ލިބޭނެއެވެ.