އިންޑިވިޖުއަލް މެޑްލޭ އިވެންޓުގެ ދެ ރެކޯޑެއް މިރާލް އާކޮށްފި

އިންޑިވިޖުއަލް މެޑްލޭ އިވެންޓުގެ ދެ ޤައުމީ ރެކޯޑެއް މިރާލް ޢައިން ލަތީފް އާކޮށްފިއެވެ.

ޔޫކޭ ގައި ކުރިއަށްދިޔަ ވެލްޝް ކެޕިޓަލް އޯޕަންމީޓްގައި މިރާލް އާކޮށްފައިވަނީ އަންހެނުންގެ ޝޯޓްކޯސް 400 މީޓަރ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯރޑާއި އަންހެނުންގެ ލޯންގކޯސް 200 މީޓަރ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯރޑެވެ.

އެގޮތުން ޝޯޓްކޯސް 400 މީޓަރ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯރޑް 05:49.59 އިން ރޭސް ނިންމައިގެން އާކުރިއިރު، ލޯންގކޯސް 200 މީޓަރ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯރޑް އާކޮށްފައި ވަނީ 02:45.93 އިން ރޭސް ނިންމައިގެންނެވެ.

މީގެ ތެރެއިން ޝޯޓްކޯސް 400 މީޓަރ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯރޑް ކުރިން އޮތީ ޢީން އައްބާސް ޝަރީފްގެ އަތުގައެވެ. އެއީ، 2022 ވަނަ އަހަރު ބޭއްވުނު ތައިލަންޑް ޝޯޓްކޯސް ސްވިމިންގ ޗެމްޕިއަންޝިޕްސް ގައި 06:26.56 އިން ރޭސް ފުރިހަމަކޮށްގެން ޢީން ހެދި ރެކޯޑެކެވެ.

އަދި ލޯންގކޯސް 200 މީޓަރ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯރޑް ކުރިން އޮތީ އަމްނާ ތަޒްކިޔާ މިރުޞާދުގެ އަތުގައެވެ. އޭނާ މި ރެކޯޑު އާކުރީ މިދިޔައަހަރު ސްރީލަންކާގައި ބޭއްވުނު އެޤައުމުގެ ނެޝަނަލް އެންޑް ޖޫނިއަރ ނެޝަނަލް ލޯންގކޯސް ސްވިމިންގ ޗެމްޕިއަންޝިޕްސް ގައި 02:49.55 އިން ރޭސް ފުރިހަމަކޮށްގެންނެވެ.