ދިއްދޫގައި ވެމްކޯގެ ޚިދުމަތް ރަސްމީކޮށް ފަށައިފި

ތިލަދުންމަތީ އުތުރުބުރީ ދިއްދޫގައި ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ ޚިދުމަތް ރަސްމީކޮށް ފަށައިފިއެވެ. މި ޚިދުމަތް ރަސްމީކޮށް ފައްޓަވައިދެއްވީ ދިއްދޫގައި ބޭއްވުނު ޚާއްސަ ރަސްމިއްޔާތެއްގައި ފަތުރުވެރިކަމާއި ތިމާވެއްޓާއި ބެހޭ ވަޒީރު ޠާރިގު އިބްރާހިމެވެ.

ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޠާރިޤް އިބްރާހިމް ވިދާޅުވީ، ވެމްކޯގެ ޚިދުމަތް ދިއްދޫގައި ފެށުމާއެކު އެރަށުގެ ތިމާވެށި ހިމާޔަތްކުރެވުމާއެކު ރައްޔިތުންގެ ސިއްޙަތުގެ އިތުރުން ލޯކަލް ވިޔަފާރިތަކަށްވެސް ފައިދާކުރާނެ ކަމަށެވެ. އަދި ރައްކާތެރިގޮތުގައި ކުނި މެނޭޖްކުރުމުގެ މަސައްކަތުގައި ކުޑަކުދިންނަށްވެސް މުހިއްމު ދައުރެއް އަދާކުރެވިދާނެކަމަށް އެމަނިކުފާނު ފާހަގަކުރެއްވިއެވެ.

ވެމްކޯގެ މެނޭޖިންގ ޑިރެކްޓަރ މުޖްތަބާ ޖަލީލް ވިދާޅުވީ، ރާއްޖޭގެ ހުރިހާ ރަށަކަށް ވެމްކޯގެ ޚިދުމަތް ފުޅާކުރުމަށް މަސައްކަތްކުރަމުންދާ ކަމަށާއި، ރަށެއްގެ ކައުންސިލުން ވެމްކޯގެ ޚިދުމަތަށް އެދިއްޖެނަމަ އެކަން ފެށުމަށް ކުރަންޖެހޭ މަސައްކަތްތައް އޮންނަ އުސޫލުގެ ތެރެއިން ކުރިއަށްގެންދެވޭނެ ކަމަށެވެ.

ހއ.ދިއްދޫގެ ކުނި މެނޭޖްކުރުމުގެ މަސައްކަތާއި ގުޅޭ ގޮތުން މަޝްވަރާކުރުމަށް ވެމްކޯގެ ސީނިއަރ މެނޭޖްމެންޓާއި އެ ރަށުގެ ކައުންސިލާއި އެކު ބޭއްވި ބައްދަލުވުމުގެ ތެރެއިން. pic.twitter.com/pwD0a8bjNb

— Waste Management Corporation Limited (WAMCO) (@WAMCOmv) February 22, 2025

މި ރަސްމިއްޔާތުގައި ވެމްކޯއިން ދެމުން އަންނަ ޚިދުމަތުގައި އެ ކުންފުންޏަށް އެއްބާރުލުން ދިނުމަށް ކައުންސިލާއި ރައްޔިތުންގެ ފަރާތުން ތިމާވެއްޓާބެހޭ ވަޒީރާއި ވެމްކޯގެ މެނޭޖިންގ ޑިރެކްޓަރުވެސް އެދިވަޑައިގެންނެވިއެވެ.

ފާހަގަކޮށްލެވޭ ކަމަކީ، ދާދި ފަހުން ރައީސުލްޖުމްހޫރިއްޔާ މުޢިއްޒު އިބްރާހިމް ހއ. އަތޮޅަށް ކުރެއްވި ދަތުރުފުޅުގެ ތެރެއިން ދިއްދޫއަށް ވަޑައިގެން އެރަށުގައި ވެމްކޯގެ ޚިދުމަތް ވީހާވެސް އަވަހަށް ފައްޓަވައިދެއްވާނެކަމަށް ވިދާޅުވެފައިވާކަމެވެ. މިއަދުގެ މި ރަސްމިއްޔާތާއެކު އެ ވަޢުދު ފުއްދާލެވިފައިވާކަން ފާހަގަކުރެވެއެވެ.

ހއ.ދިއްދޫގައި ވެމްކޯއާއި މުއައްސަސާތައް ގުޅިގެން ކުރިއަށްގެންދިޔަ”ފައްޓަމާ” އާއިލީ ހަވީރުގެ ތެރެއިން pic.twitter.com/dJPW3vRPAB

— Waste Management Corporation Limited (WAMCO) (@WAMCOmv) February 22, 2025

ސަރުކާރުން ވަނީ ރާއްޖޭގެ މީހުން ދިރިއުޅޭ ރަށްތަކަށް ދިމާވެފައިވާ ކުނީގެ މައްސަލައަށް ދާއިމީ ހައްލެއް ހޯދައިދީ ކުނި މެނޭޖުކުރުން ވަށާޖެހޭ އަދި ތިމާވެއްޓާ ރައްޓެހި ގޮތަކަށް ކުރިއަށްގެންދަން ހަދަންޖެހޭ ޕްލޭންތަކާއި އިންތިޒާމުތައް ނިންމާފައެވެ.