ޤައުމީ ކްރިކެޓް މުބާރާތް ސީބީއެލްއިން ކާމިޔާބުކޮށްފި

59ވަނަ ޤައުމީ ކްރިކެޓް މުބާރާތް ސީބީއެލް ސްޕޯޓްސްއިން ކާމިޔާބުކޮށްފިއެވެ.

ކުޅިވަރު އެކުވެނީގެ ކްރިކެޓް ދަނޑުގައި ކުޅުނު މި މެޗު ޝަރަފުވެރިކޮށްދެއްވީ، ކޮމިޝަނަރ އޮފް ސްޕޯރޓްސް މުޙައްމަދު ޠަލާލްއެވެ. އަދި ކްރިކެޓް ބޯޑުގެ އެގްޒެކެޓިވް ކޮމެޓީގެ މެންބަރުން ވެސް ވަނީ މި މެޗަށް ވަޑައިގެންފައެވެ. 

ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކުރަމުން އަންނަ ޤައުމީ މުބާރާތުގެ މި އަހަރުގެ ފައިނަލުގައި ސީބީއެލް ސްޕޯޓްސްއާ ދެކޮޅަށް ނިކުތީ މިލާން ކްރިކެޓް އެކެޑެމީއެވެ. މި މެޗު ސީބީއެލްއިން ކާމިޔާބުކުރީ 2 ވިކެޓުންނެވެ.

މެޗުގައި ގުރު ދިމާވީ ސީބީއެލްއަށެވެ. އަދި އެ ޓީމުން ނިންމީ ފުރަތަމަ ހޮވުމަށެވެ. އެހެންކަމުން މިލާން ކްރިކެޓް އެކެޑެމީއަށް ޖެހުނީ ފުރަތަމަ އިނިންގްސްގައި ކުޅެންއަރާށެވެ.

މިލާން ކްރިކެޓް އެކެޑެމީގެ ހުރިހާ ކުޅުންތެރިން 38ވަނަ އޯވަރުގައި ނުބައިވިއިރު، އެ ޓީމަށް ހެދިފައި އޮތީ 136 ލަނޑެވެ. އެ ޓީމަށް އެންމެ ގިނަ ލަނޑު ހަދައިދިނީ އަޙުމަދު ޙަސަން އާއި އަޙުމަދު ޢަމީލް މަޢުރޫފެވެ. އެގޮތުން ޢަހުމަދު ޙަސަން 27 ލަނޑު ހެދިއިރު މަޢުރޫފް ވަނީ 21 ލަނޑު ހަދާފައެވެ. 

މި އިނިންގްސްގައި ސީބީއެލްއިން އެންމެ ގިނަ ވިކެޓު ނެގީ، ޕްރަދީޕް އާއި ހަރުސައެވެ. އެގޮތުން، ޕްރަދީޕް 3 ވިކެޓު ނެގިއިރު، ހަރުސަ ވަނީ 2 ވިކެޓު ނަގާފައެވެ.

ދެވަނަ އިނިންގްސްގައި ސީބީއެލްއިން ވަނީ 38 އޯވަރުން 139 ލަނޑު ހަދާ މެޗު ކާމިޔާބުކޮށްފައެވެ. އެ ޓީމަށް އެންމެ ގިނަ ލަނޑު ހެދީ ޕްރަދީޕްއެވެ. އޭނާ ވަނީ 34 ލަނޑު ހަދާފައެވެ. އަދި ދެވަނައަށް އެންމެ ގިނަ ލަނޑު ހެދި މަލިތު ވަނީ 29 ލަނޑު ހަދާފައެވެ.

މި އިނިންގްސްގައި މިލާން ކްރިކެޓް އެކެޑެމީއަށް އެންމެ ގިނަ ވިކެޓު ނަގައިދިނީ 3 ވިކެޓާއެކު ޢަމީލްއެވެ.

މުބާރާތުގެ އެންމެ މޮޅު ކުޅުންތެރިއަކަށް ހޮވިފައިވަނީ މިލާން ކްރިކެޓް އެކަޑަމީގެ ޔޫސުފް އަޒިޔާންއެވެ. އަދި އެންމެ މޮޅު އުކުންތެރިއަކަށް ހޮވިފައިވަނީ ހަމަ އެ ޓީމުގެ އިބްރާހިމް ރިޒާނެވެ. 

މުބާރާތުގެ އެންމެ މޮޅު ހޮވުންތެރިއަކީ މިލާން ކްރިކެޓް އެކަޑަމީގެ މުހަންމަދު އައްޒާމެވެ. އަދި އެންމެ އުންމީދީ ކުޅުންތެރިއަކަށް އެމްއެސް އެކަޑަމީގެ ތަރޫޝާ ހޮވުނުއިރު، މުބާރާތުގައި ހުރިހާގޮތަކުން އެންމެ މޮޅު ކުޅުންތެރިއަކަށް ހޮވުނީ މިލާން ކްރިކެޓް އެކަޑަމީގެ ޔޫސުފް އަޒިޔާންއެވެ.