ޚަބަރު
ރޯދަ ހަދިޔާ މަސްދަޅު ކޭސް ނެގުމަށް ޓޯކަން ސިސްޓަމް ތަޢާރަފުކޮށްފި

މާލޭ ސަރަޙައްދުގައި މަސްދަޅުކޭސް ދޫކުރުން ފޮޓޯ:ސަން އަޮންލައިން
ރާއްޖޭގެ ވެރިރަށް މާލެ ސަރަހައްދުގައި ރޯދަ ހަދިޔާގެ ގޮތުގައި ސަރުކާރުން ބަހާ މަސްދަޅު ކޭސް ނެގުމަށް ޓޯކަން ސިސްޓަމެއް ތަޢާރަފުކޮށްފިއެވެ. މި އިންތިޒާމު ހަމަޖައްސާފައިވަނީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިންނެވެ.
މި އައު ސިސްޓަމްގެ ދަށުން، ރައްޔިތުންނަށް ވީހާވެސް ލުއި ފަސޭހަ ގޮތަކަށް މަސްދަޅު ކޭސް ނެގޭނެ އިންތިޒާމު ހަމަޖެއްސުމަށްޓަކައި ޚާއްސަ ޕޯޓަލްއެއް ގާއިމްކޮށް އާންމުކޮށްފައިވެއެވެ. މިއަދު ހަވީރު 6:00 ގެ ފަހުން، މި ޕޯޓަލްގައި ހިމެނޭ ކޯޑު ސްކޭންކޮށްގެން މަސްދަޅު ކޭސް ނަގަން ބޭނުންވާ މަރުކަޒަކާއި ވަގުތު އިޚްތިޔާރުކޮށް ޓޯކަންއެއް ނަގާލެވޭނެއެވެ.
ވުޒާރާއިން މަޢުލޫމާތު ދެއްވާފައިވާ ގޮތުގައި، މާލޭ ސަރަޙައްދުގައި މަސްދަޅު ކޭސް ބެހުމުގެ ކަންކަން ކުރިއަށްދާނީ ރޭގަނޑު 8:00 އިން 12:00 އަށެވެ. މިގޮތަށް ހަމަޖައްސާފައިވަނީ މިހާރު ހޫނުގަދަ ދުވަސްވަރަކަށްވާތީއެވެ.
Roadha Hadhiyaa Portal. https://t.co/dbPD7s8gqv
— Adam Shareef Umar (@Adamshareefz) February 22, 2025
18.00 in feshigen portal in token dhookuran fesheyne.
މަސްދަޅު ކޭސް ދޫކުރާނެ 13 މަރުކަޒެއް ހަމަޖައްސާފައިވާއިރު، އެއް ފަރާތަކަށް އެންމެ ގިނަވެގެން ދޫކުރާނީ 3 މަސްދަޅު ކޭހެވެ. މަސްދަޅު ކޭސް ބަލައިގަތުމަށް އަންނައިރު އައި.ޑީ.ކާޑާއި އެއްމަހުގެ ކަރަންޓު ބިލް ގެންނަންޖެހޭނެއެވެ.
ސަރުކާރުން ވިދާޅުވެފައިވަނީ، މިއަހަރުގެ ރަމަޟާންމަހުގެ ރޯދަ ހަދިޔާގެ ގޮތުގައި ދޫކުރާ މަސްދަޅު ކޭސް، ހުރިހާ ގޭބިސީއަކަށް ލިބެންދެން ބެހުމުގެ މަސައްކަތް ކުރިއަށްގެންދަވާނެ ކަމަށެވެ. ފުރަތަމަ ދުވަހުވެސް މާލެ ސަރަހައްދުގެ 9,394 ގޭބީސީއަކަށް މަސްދަޅު ކޭސް ބަހާފައިވާކަމަށް ވުޒާރާއިން ހާމަކުރައްވާފައިވެއެވެ.