ވިސްލްބްލޯކުރި މުވައްޒަފަކު ވަޒީފާއިން ވަކިކޮށްފައިވާކަމަށް ބައެއް ފަރާތްތަކުން ފަތުރަމުންދާ ޚަބަރަކީ "ބުހުތާނު ދޮގު" : މޯލްޑިވްސް ޕޯސްޓް

މޯލްޑިވްސް ޕޯސްޓް ލިމިޓެޑުން ވިސްލްބްލޯކުރި މުވައްޒަފަކު ވަޒީފާއިން ވަކިކޮށްފައިވާކަމަށް ބައެއް ފަރާތްތަކުން ފަތުރަމުންދާ ޚަބަރަކީ "ބުހުތާނު ދޮގު" ކަމަށް މޯލްޑިވްސް ޕޯސްޓުން ހާމަކޮށްފިއެވެ. 

މިއަދު ނެރުނު ބަޔާނުގައި މޯލްޑިވްސް ޕޯސްޓުން ބުނެފައިވަނީ، އެ ކުންފުނީގެ އެއްވެސް މުވައްޒަފަކު ކުންފުނީގެ އެއްވެސް ކަމަކާ ބެހޭގޮތުން ދައުލަތުގެ އިދާރާއެއްގައި ވިސްލްބްލޯ ކުރުމާ ގުޅިގެން ވަޒީފާއިން ވަކިކޮށްފައި ނުވާނެ ކަމަށެވެ. އަދި މިފަދަ ޚަބަރުތައް ފަތުރާ ފަރާތްތަކުގެ ޢަމަލު އެންމެ ހަރުކަށި އިބާރާތުން ކުށްވެރިކުރާ ކަމަށްވެސް ބަޔާނުގައި ބުނެފައިވެއެވެ.

ދާދިފަހުން ޕޯސްޓްގެ ވަޒީފާއިން ވަކިކުރެވުނު މުވައްޒަފަކާ ގުޅޭގޮތުން ބަޔާނުގައި ވަނީ އިތުރު މަޢުލޫމާތު ހިއްސާކޮށްފައެވެ. އެގޮތުން، އެ މުވައްޒަފު ވަކިކުރެވުނީ މަސައްކަތުގެ ޕަރފޯމަންސްއާއި އަޚްލާޤާ ގުޅުންހުރި މައްސަލަތަކެއްގައި ކަމަށް ބުނެފައިވެއެވެ. މި މުވައްޒަފަށް 10 މަހެއްހާ ދުވަހުގެ ތެރޭގައި ނަސޭހަތާއި އިންޒާރު ދީ، "ޕަރފޯމަންސް އިމްޕްރޫވްމަންޓް ޕްލޭން" އެއްގެ ދަށަށް ގެނެވުނު ނަމަވެސް، އެއްވެސް ބަދަލެއް ނައިސްގެން ވަޒީފާއިން ވަކިކުރެވުނު ކަމަށް ބަޔާނުގައި ބުނެފައިވެއެވެ.

މީގެއިތުރުން، އެ މުވައްޒަފަކީ ކުރިން ކޮމްޕެނީ ސެކްރެޓަރީގެ މަޤާމަށް ކުރިމަތިލައި ނުހޮވުމުން ނުރުހުން ފާޅުކުރި މީހެއްކަމަށާއި، އޭގެފަހުން އިސް މަޤާމުތަކަކަށް ކުރިމަތިލައި، އިންޓަވިއުއަށް ނުކިޔުމުން ހިތްހަމަނުޖެހުން ފާޅުކުރަމުން ދިޔަ ކަމަށްވެސް ބަޔާނުގައި ބުނެފައިވެއެވެ. އަދި މެނޭޖިންގ ޑިރެކްޓަރާ ބައްދަލުކުރުމަށް އޮފީހުން ބޭރުގެ އިއްޒަތްތެރި ބޭފުޅަކު ފޮނުވައި، އެ ބޭފުޅާ މެދުވެރިކޮށް މެނޭޖިންގ ޑިރެކްޓަރަށް ބިރުދައްކާފައިވާކަންވެސް ބަޔާނުގައި ފާހަގަކޮށްފައިވެއެވެ.

މޯލްޑިވްސް ޕޯސްޓުން މި ބަޔާން ނެރެފައިވަނީ، ކުންފުނީގައި ކޮރަޕްޝަންގެ ޢަމަލުތަކެއް ހިންގާކަމަށް ބުނެ ބައެއް މީޑިއާތަކުގައި ޝާއިޢުކުރަމުންދާ ޚަބަރުތަކާ ގުޅިގެންނެވެ. މި ކަންކަމުގެ ޙަޤީޤަތް ކަމާބެހޭ ދައުލަތުގެ އިދާރާތަކަށާއި ރައްޔިތުންނަށް ސާފުކޮށް އެނގެންޖެހޭނެ ކަމަށް ކުންފުނިން ޤަބޫލުކުރާތީ މި ބަޔާން ނެރެފައިވާ ކަމަށް ބުނެފައިވެއެވެ.

މި ބަޔާނުގައި އަދި ވަކިން ޚާއްޞަކޮށް ފާހަގަކޮށްފައިވަނީ، މުވައްޒަފުން ވަޒީފާއިން ވަކިކުރުމުގައި ކުންފުނިން ޢަމަލުކުރަނީ ކުންފުނީގެ މުވައްޒަފުންނާ ބެހޭ ޤަވާޢިދާއި ވަޒީފާއާ ބެހޭ ޤާނޫނުގައި ބަޔާންކޮށްފައިވާ އުޞޫލުތަކާއި ހަމަތަކުގެ ތެރެއިން ކަމަށެވެ. އަދި މުވައްޒަފަކު ވަކިކުރުމުގެ ކުރިން އެޅެންހުރި ހުރިހާ އިޞްލާޙީ ފިޔަވަޅުތަކެއް އަޅާ ކަމަށްވެސް ބަޔާނުގައި ބުނެފައިވެއެވެ.