ޕޯސްޓް އޮފީހުގެ ކުރީގެ މެނޭޖްމަންޓުން ހިންގި ކޮރަޕްޝަންގެ ޢަމަލުތައް ހާމަވެއްޖެ

މޯލްޑިވްސް ޕޯސްޓް ލިމިޓެޑްގެ ކުރީގެ މެނޭޖްމަންޓުން ހިންގާފައިވާ ކޮރަޕްޝަނަށް ތުހުމަތުކުރެވޭ އެތައް ޢަމަލުތަކެއް ހާމަވެއްޖެއެވެ. މި ކަންކަން ހާމަކޮށްފައިވަނީ މޯލްޑިވްސް ޕޯސްޓް ލިމިޓެޑުން މިއަދު ނެރެފައިވާ ނޫސް ބަޔާނެއްގައެވެ.

ޕޯސްޓް ލިމިޓެޑުން ނެރުނު ބަޔާނުގައި ބުނެފައިވާ ގޮތުގައި، ކުރީގެ މެނޭޖްމަންޓުން ވަނީ ކުންފުނީގެ ވަޒީފާއަށް އިޢުލާން ނުކޮށް، އިންޓަވިއުކުރުމެއްވެސް ނެތި، މެނޭޖިން ޑިރެކްޓަރަށް ލިބިގެންވާ ބާރުގެ ދަށުންކަމަށް ބުނެ މެރިޓް އުޞޫލުގެ ބޭރުން 49 މީހަކަށް ވަޒީފާ ދީފައެވެ. އަދި މި މީހުންގެ ތެރެއިން ބައެއް މީހުންނަށް ވަރަށް ސީނިއަރ މަގާމުތައް ދީ، ކުންފުނީގެ ގިނަ ދުވަސްވީ ވެރިންނަށާއި މުވައްޒަފުންނަށް ވުރެ ބޮޑު މުސާރަ ދީފައިވާކަން ބަޔާނުގައި ފާހަގަކޮށްފައިވެއެވެ.

މީގެ އިތުރުން، ވެލާނާ އިންޓަނޭޝަނަލް އެއަރޕޯޓުގައި ޤާއިމްކޮށްފައިވާ ޕޯސްޓް އޮފީހުގެ ފިހާރައަށް މުދާ ސަޕްލައިކުރުމުގެ އެއްބަސްވުމެއް ޖަމްޢިއްޔަތު ތަޙްފީޒްލް ޤުރުއާނުލް ކަރީމް ކިޔާ ޤުރުއާން ހިތުދަސްކޮށްދޭ ކުލާހަކާއެކު ކުރީގެ މެނޭޖްމަންޓުން ހަދާފައިވާކަމަށް ބަޔާނުގައި ބުނެފައިވެއެވެ. ނަމަވެސް މިހާރުގެ މެނޭޖްމަންޓުން މި އެއްބަސްވުން އުވާލާފައިވާކަމަށް ބަޔާނުގައި ފާހަގަކޮށްފައިވެއެވެ.

އަދި ރައީސުލްޖުމްހޫރިއްޔާގެ އޮފީހުގެ އެންގެވުމާ ޚިލާފަށް، ކުރީގެ މެނޭޖްމަންޓުގައި ސިޔާސީ މުވައްޒަފުންނަށް ގަޑި ނުޖެހުމުން ދޭ ފައިސާ "ގަޑި ލާރި" ދިންކަމަށާއި، ކިތަންމެ ލަހުން ޑިއުޓީއަށް އަޔަސް އެޗްއާރު ސިސްޓަމްގެ ތެރެއިން ގަޑި ބަދަލުކޮށް "ގަޑި ލާރި" ދީފައިވާކަމަށް ބަޔާނުގައި ބުނެފައިވެއެވެ.

މީގެ އިތުރުން، ކުރީގެ މެނޭޖްމަންޓުން ސިންގަލް ސޯސްކޮށްގެން ބޮޑު އަގުގައި ކުންފުނީގެ އެއަރކޯން ސިސްޓަމް މަރާމާތުކޮށް ބެލެހެއްޓުމަށް ބޭރުގެ ކުންފުންޏަކާއެކު އެއްބަސްވުމެއް އެކުލަވާލާފައިވާކަމަށްވެސް ބަޔާނުގައި ބުނެފައިވެއެވެ. ނަމަވެސް މިހާރުގެ މެނޭޖްމަންޓުން މި އެއްބަސްވުން އުވާލާ، ވާދަވެރި ބިޑިންގގެ އުޞޫލުން އެއަރކޯންގެ މަސައްކަތް ޕްރޮކިއުކުރަމުންދާކަމަށް ބަޔާނުގައި ފާހަގަކޮށްފައިވެއެވެ.

ޕޯސްޓް އޮފީހުގެ މިހާރުގެ މެނޭޖްމަންޓުން މި ބަޔާނުގައި، ކުންފުންޏާ މެދު ބައެއް ފަރާތްތަކުން ކުރަމުންދާ ތުހުމަތުތައްވެސް ދޮގުކޮށްފައިވެއެވެ. އެގޮތުން ޤާބިލު ނޫން މީހުން އެކުންފުނި ހިންގާކަމަށް ބުނެ ކުރާ ތުހުމަތާއި، މެނޭޖިން ޑިރެކްޓަރގެ ގާތް މުވައްޒަފުންނަށް އިންޓަރނަލް ރެކްރޫޓްމަންޓްގެ ނަމުގައި ޕްރޮމޯޝަން ދޭކަމަށް ބުނެ ދައްކާ ވާހަކަތައް ދޮގުކޮށްފައިވެއެވެ. އަދި މިހާރުގެ މެނޭޖިން ޑިރެކްޓަރު ކަނޑައަޅާފައިވާ އަދަދަށްވުރެ ބޮޑު މުސާރައެއް ނަގާކަމަށް ކުރާ ތުހުމަތާއި، ކުންފުނީގައި ކޮރަޕްޝަނަށް މަގުފަހިވާ ޢަމަލުތަކެއް ހިންގާކަމަށް ބުނެ އެ ފަދަ ޢަމަލުތަކެއް ވިސުލްބްލޯކުރި މީހަކު ކުންފުނިން ވަކިކުރިކަމަށް ބުނާ ވާހަކަތައްވެސް ބަޔާނުގައި ދޮގުކޮށްފައިވެއެވެ.