ކުޑަގިރިއަށް 2 އަހަރު: ހިޔާ ލިބޭ ގަސް އިންދައި، ޚިދުމަތްތައް ފުޅާކުރަނީ

މާލެ ސަރަޙައްދުގެ ރައްޔިތުންނަށް ދަތުރު ގޮސް ހިތްހަމަޖެހުން ލިބޭނެ ތަނެއްގެ ގޮތުގައި ތަރައްޤީކޮށްފައިވާ ކުޑަގިރި ޕިކްނިކް އައިލެންޑަށް 2 އަހަރު ފުރުން ފާހަގަކުރުމުގެ ގޮތުން އެ ރަށުގައި ހިޔާ ލިބޭ ބޮޑެތި ގަސް އިންދުމުގެ ހަރަކާތެއް ކުރިއަށް ގެންގޮސްފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މަޢުލޫމާތު ދެއްވި ގޮތުގައި، މި ހަރަކާތުގައި އެޗްޑީސީގެ މެނޭޖިންގ ޑިރެކްޓަރ މުޙައްމަދު މަޢުރޫފް ޖަމީލާއި ޗެއަރމަން އަޙްމަދު ނާސިފްގެ އިތުރުން ކުންފުނީގެ ބޯޑު މެންބަރުން ބައިވެރިވެ ވަޑައިގެންނެވިއެވެ. މި ހަރަކާތަކީ ސަރުކާރުގެ 5 މިލިއަން ގަސް އިންދުމުގެ ޕްރޮގްރާމުގެ ތެރެއިން ކުރިއަށް ގެންދެވުނު ހަރަކާތެކެވެ.

ކުޑަގިރި ޕިކްނިކް އައިލެންޑް ރަސްމީކޮށް ހުޅުވާލެވުނީ 2023 ވަނަ އަހަރުގެ ފެބްރުއަރީ މަހުގެ 11 ވަނަ ދުވަހުއެވެ. އެޗްޑީސީގެ ތަފާސް ހިސާބުތަކުން ދައްކާ ގޮތުގައި މިދިޔަ 2 އަހަރު ދުވަހުގެ ތެރޭގައި 54،724 މީހުން ކުޑަގިރިއަށް ޒިޔާރަތްކޮށްފައިވެއެވެ. އަދި ދަތުރުވެރިންގެ ތެރެއިން ގިނަ ބަޔަކު މި ރަށާމެދު ހިތްހަމަޖެހުން ފާޅުކުރާކަން އެޗްޑީސީން ފާހަގަކުރައްވައެވެ.

ކުޑަގިރިއަށް ދަތުރުކުރާ ފަރާތްތަކަށް އިތުރު ފަސޭހަތަކެއް ފޯރުކޮށްދިނުމުގެ ގޮތުން، އެޗްޑީސީން ވަނީ ހުޅުމާލޭގައި ޚާއްސަ ކައުންޓަރެއް ޤާއިމުކޮށްފައެވެ. މީގެ އިތުރުން، އަންނަ އޭޕްރީލް މަހުން ފެށިގެން ކުޑަގިރީގެ ޚިދުމަތްދޭ ގަޑި ކޮންމެ ދުވަހެއްގެ ރޭގަނޑު 11:30 އަށް އިތުރުކުރުމަށްވެސް އެޗްޑީސީން ވަނީ ނިންމާފައެވެ.

އަދި ކުޑަގިރީގެ ޚިދުމަތްތައް އިތުރަށް ފުޅާކުރުމުގެ ގޮތުން، އެމްއެމްޕީއާރްސީ އަދި އެމްޓީސީސީއާ ގުޅިގެން ކުޑަގިރީގައި ޚާއްސަ ޑައިވް ސައިޓެއް ޤާއިމުކުރުމުގެ މަސައްކަތްވެސް ކުރިއަށް ގެންދިއުމަށް ވަނީ ރޭވިފައެވެ.

މި ހުރިހާ މަސައްކަތްތަކަކީވެސް ކުޑަގިރިއަކީ މާލެ ސަރަޙައްދުގެ ރައްޔިތުންނަށް ދަތުރު ގޮސް އުފާވެރި ވަގުތުތަކެއް ހޭދަކުރެވޭނެ ތަނަކަށް ހެދުމަށްޓަކައި އެޗްޑީސީން ކުރަމުންދާ މަސައްކަތްތަކެވެ.