ކާނާ ވިހަވި  ބިދޭސީން ފަރުވާއަށްފަހު ހުޅުމާލޭ ހޮސްޕިޓަލުން ދޫކޮށްލައިފި

ހުޅުމާލޭގައި ހުންނަ އިމިގްރޭޝަން ޑިޓެންޝަން ސެންޓަރުގައި ބަންދުގައި ތިބި 19 ބިދޭސީއަކަށް ކާނާ ވިހަވެގެން ހުޅުމާލޭ ހޮސްޕިޓަލުގައި ފަރުވާ ދިނުމަށްފަހު ދޫކޮށްލައިފިއެވެ.

ފަރުދުން މީޑިއާއަށް ހުޅުމާލޭ ހޮސްޕިޓަލުން މަޢުލޫމާތު ދެއްވި ގޮތުގައި، މި 19 ބިދޭސީންގެ ތެރޭގައި ހިމެނެނީ 3 އަންހެނުންނާއި 16 ފިރިހެނުންނެވެ. މީގެ ތެރެއިން 17 މީހަކަށް ފަރުވާ ދިނުމަށްފަހު އިއްޔެ ރޭ ދޫކޮށްލާފައިވާ އިރު، ބާކީ ތިބި 2 މީހުން މިއަދު ހެނދުނު ފަރުވާއަށްފަހު ދޫކޮށްލާފައިވެއެވެ.

މި ހާދިސާއާ ގުޅިގެން އިމިގްރޭޝަނުން މަޢުލޫމާތު ދެއްވި ގޮތުގައި، ފަރުވާ ލިބުނު ހުރިހާ ބިދޭސީން އަނބުރާ ޑިޓެންޝަން ސެންޓަރަށް ގެންގޮސްފައިވެއެވެ. އަދި މިހާރު އެ ބިދޭސީންގެ ހާލު ރަނގަޅުކަމަށް އިމިގްރޭޝަނުން ވިދާޅުވިއެވެ.

އިމިގްރޭޝަނުން އިތުރަށް ވިދާޅުވި ގޮތުގައި، މި ހާދިސާއާ ގުޅިގެން ބަލަންޖެހޭ ކަންކަން ބަލަމުންދާކަމަށް ވިދާޅުވެފައިވެއެވެ. ނަމަވެސް، މި ހާދިސާ ހިނގި ސަބަބާއި، ކާނާ ވިހަވުމަށް މެދުވެރިވި ކަންކަމާ ގުޅޭ އިތުރު ތަފްސީލެއް އަދި ހާމަކޮށްފައެއް ނުވެއެވެ.