ޚަބަރު
ރ. ފައިނު އެއަރޕޯޓް އެޅުމުގެ އެއްބަސްވުމުގައި ސޮއިކޮށްފި

އެއްބަސްވުމުގައި ސޮއި ކުރުމުގެ ރަސްމިއްޔާތު ފޮޓޯ: އެމްޓީސީސީ
ރ. ފައިނުގައި ތަރައްޤީކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންފައިވާ އެއަރޕޯޓު އެޅުމުގެ އެއްބަސްވުމުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި އެމްޓީސީސީއާ ދެމެދު މިއަދު ސޮއިކޮށްފިއެވެ.
މި އެއްބަސްވުމުގެ ދަށުން އެމްޓީސީސީން އެއަރޕޯޓް ތަރައްޤީކުރުމަށް ބޭނުންވާ ފީސިބިލިޓީ ދިރާސާތަކާއި، ތިމާވެއްޓަށް ކުރާނެ އަސަރު ވަޒަންކުރާ ރިޕޯޓު އަދި ޑިޒައިން މަސައްކަތްތައް ކުރިއަށް ގެންދާނެ ކަމަށް އެމްއޭސީއެލުން ބުނެފައިވެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެމްއޭސީއެލްގެ ސީއީއޯ އަދި މެނޭޖިންގ ޑައިރެކްޓަރ އިބްރާހީމް ޝަރީފް މުޙައްމަދު ވިދާޅުވީ، އެމްޓީސީސީއާއެކު އެކުލަވާލި އެއްބަސްވުމުގެ ދަށުން ކަނޑައެޅޭ މުއްދަތުތަކުގައި އެ މަސައްކަތް އެންމެ ފުރިހަމައަށް ނިންމާލާނެ ކަމުގެ ޔަގީންކަން އެބައޮތް ކަމަށެވެ.
މި ރަސްމިއްޔާތުގައި ފައިނު ހިމެނޭ އިނގުރައިދޫ ދާއިރާގެ މެންބަރު އިބްރާހީމް ފަލާޙްވެސް ބައިވެރިވެވަޑައިގެންނެވިއެވެ. ވާހަކަފުޅު ދައްކަވަމުން ފަލާޙް ވިދާޅުވީ ރ. އަތޮޅުގައި ޓޫރިޒަމް ތަރައްޤީވެ، ރާއްޖޭގެ ޓޫރިޒަމްގެ މުހިންމު ހަބަކަށް ރ. އަތޮޅު ވެގެންދާއިރު މި އެއަރޕޯޓުގެ ސަބަބުން ރާއްޖޭގެ އިގްތިސާދަށް ރަނގަޅު ނަފާއެއް ލިބިގެންދާނެ ކަމަށެވެ. އަދި ރ. އަތޮޅުގެ ރައްޔިތުންނަށް ވަރަށް ބޮޑު ފައިދާ އަދި ލުއިފަސޭހަ ލިބިގެންދާނެކަމަށްވެސް ފަލާޙް ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ ޖެނުއަރީ 23 ވަނަ ދުވަހު ފައިނަށް ކުރެއްވި ދަތުރުފުޅުގައި ރައްޔިތުންނާ ބައްދަލުކުރައްވާ ވިދާޅުވެފައިވަނީ އެރަށުގައި އެއަރޕޯޓް އެޅުމުގެ އެއްބަސްވުމުގައި ފެބުރުއަރީ މަހު ސޮއިކުރުމަށްފަހު އެކަމުގެ ޢަމަލީ މަސައްކަތް ވަރަށް އަވަހަށް ފެށޭނެ ކަމަށެވެ.
ފައިނު އެއަރޕޯޓަކީ އެރަށުގެ ރައްޔިތުންގެ ދުވަސްވީ އުންމީދެކެވެ. އަދި އެ ދާއިރާގެ ރައްޔިތުންނާއި، މުޅި އަތޮޅުގެ އިޤްތިޞާދީ ކުރިއެރުމުގައި، ވަރަށް މުހިންމު ދައުރެއް އަދާކުރާނެ އެއަރޕޯޓެއްކަމަށްވެސް ސަރުކާރުން ވިދާޅުވެފައިވެއެވެ. ފައިނު އެއަރޕޯޓާއެކު ގިނަ ވަޒީފާތައް އުފެދި އެސަރަޙައްދަށް ގިނަ ރިޒޯޓުތަކެއް އައުމަށް މަގުފަހިވެގެންދާނެކަމަށްވެސް ސަރުކާރުން ވަނީ ވިދާޅުވެފައެވެ.
މި މަޝްރޫޢަކީ، ރ. އަތޮޅުގެ ދަތުރުފަތުރާއި، ފަތުރުވެރިކަން އަދި ޖުމްލަކޮށް މުޅި ރާއްޖޭގެ އިޤްތިޞާދު ކުރިއެރުވުމަށް ސަރުކާރުން ގެންގުޅުއްވާ ތަޞައްވުރާއި އެއްގޮތަށް ތަރައްޤީ ކުރުމަށް ނިންމާފައިވާ އެއަރޕޯޓެކެވެ. އެހެންކަމުން މިއީ ރާއްޖޭގެ އިޤްތިޞާދު ކުރިއެރުވުމަށާއި ފަތުރުވެރިކަމުގެ ޞިނާޢަތަށް ކުރެވޭ މުހިންމު އިންވެސްޓްމަންޓެއްކަމަށް ސަރުކާރުން ދެކެއެވެ.
އެއަރޕޯޓް ތަރައްޤީކުރުމަށް ނިންމާފައިވާ ސަރަހައްދުގައި ފެނާއި ނަރުދަމާ ނިޒާމުގެ ބައެއް ތަންތަން ހުރުމާ ގުޅިގެން، ރައީސުލްޖުމްހޫރިއްޔާ ވަނީ ފެނާ ނަރުދަމާގެ ނިޒާމުގެ ޚިދުމަތް މެދުނުކެނޑޭނެގޮތަށް އެ ނިޒާމަށް ބަދަލު ގެންނަވާނެކަމަށްވެސް ވެސް ވިދާޅުވެފައެވެ.
އަޅުގަނޑަށް ގަބޫލުކުރެވެނީ، މި އެއަރޕޯޓު އެޅުމަށް ހުރަސްއެޅުމަށްޓަކައި، މިދިޔަ ސަރުކާރުން އެއަރޕޯޓަށް ސީދާ ބޭނުންވާ ސަރަޙައްދުގައި ފެނާއި ނަރުދަމާ މަޝްރޫޢުގެ ބައެއް ތަންތަން ހުރީ ހަދާފައި ކަމަށް. އެހެންވީމާ، ރައްޔިތުންގެ އުންމީދުތަކުގައި ކުލަ ޖެއްސުމަށްޓަކައި، ރައްޔިތުން އެދޭގޮތަށް ކަންކަން ކުރުމަށްޓަކައި، އަޅުގަނޑުމެން އެންމެ ކުޑަ ޚަރަދެއްކޮށްގެން ކުރެވޭނެ ގޮތަށް، އެއަރޕޯޓް އެޅުމަށް ބޭނުންވާ ޖާގަ ހުސްކޮށް، ފެނާއި ނަރުދަމާ ނުހުއްޓި، ޚިދުމަތް ނުހުއްޓި ކުރިއަށް ގެންދެވޭގޮތަށް، ތަރުތީބުކޮށްގެން، އެ ތަންތަން ބަދަލުކޮށްގެން، ހަމަ ރަނގަޅަށް ވަރަށް އޮމާންކޮށް މަސައްކަތްތައް ކުރިއަށް ގެންދާނެކަން ތިޔަބޭފުޅުންނަށް ޔަގީންކޮށް އަރުވަން
ރައީސުލްޖުމްހޫރިއްޔާ
We have signed an agreement with @MACLmedia Maldives Airports Company Limited (MACL) to develop an airport in R. Fainu, a key project that aligns with H.E. President Dr. Mohamed Muizzu’s pledge to enhance domestic transport and drive economic growth. Our Managing Director,… pic.twitter.com/7Fh1YqERID
— MTCC Plc (@MTCCPlc) February 23, 2025