މިފްކޯއިން 302 މަސްދޯންޏަކަށް 27.1 މިލިއަން ރުފިޔާ ދޫކޮށްފި

މިދިޔަ ހަފްތާގައި މިފްކޯއިން 302 މަސްދޯންޏަކަށް 27.1 މިލިއަން ރުފިޔާ ދޫކޮށްފައިވާކަމަށް މިފްކޯގެ ތަފާސްހިސާބުތަކުން ދައްކައެވެ. މިއީ އޭގެ ކުރީ ހަފްތާއާ އަޅާބަލާއިރު މަސްދޯނިތަކުގެ އަދަދު އިތުރުވެފައިވާ މިންވަރެކެވެ. އޭގެ ކުރީ ހަފްތާގައި މިފްކޯއަށް މަސް ކިރުވާފައިވަނީ 218 ދޯންޏަކުންނެވެ.

ފެބްރުއަރީ މަހުގެ ފުރަތަމަ ހަފްތާގައި މިފްކޯއިން 31.3 މިލިއަން ރުފިޔާ މަސްވެރިންނަށް ދޫކޮށްފައިވާއިރު، މިމަހުގެ މިހާތަނަށް ޖުމްލަ 97.3 މިލިއަން ރުފިޔާ ދޫކޮށްފައިވެއެވެ. މިއަހަރުގެ ޖަނަވަރީ މަހު މަސްވެރިންނަށް ދޫކޮށްފައިވަނީ 117 މިލިއަން ރުފިޔާއެވެ. މިއީ 2023 ވަނަ އަހަރުގެ ޑިސެންބަރު މަހާ އަޅާބަލާއިރު 122 އިންސައްތައިގެ އިތުރުވުމެކެވެ.

މިފްކޯގެ ތަފާސްހިސާބުތަކުން ދައްކާގޮތުގައި މިމަހުގެ 12 ވަނަ ދުވަހަކީ ފަހުގެ ތާރީޚެއްގައި އެންމެއްގައި އެންމެ ގިނަ އަދަދަކަށް މަސް ކިރުވި ދުވަހެވެ. އެދުވަހު 546 ޓަނުގެ މަސް ކިރުވާފައިވާއިރު، 48 ދޯންޏަކަށް 7.6 މިލިއަން ރުފިޔާ ދޫކޮށްފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާ އެއްގޮތަށް، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރަން ފަށާފައިވަނީ ފާއިތުވި މަސްވެރިންގެ ދުވަހުގައެވެ. މިފްކޯއިން މަޢުލޫމާތު ދެއްވާގޮތުގައި، މި އައު އުސޫލާ ގުޅިގެން މަސްވެރިކަމަށް ނިކުންނަ ދޯނިތަކުގެ އަދަދު ވަނީ އިތުރުވެފައެވެ.