ސިހުރު ހެދުމުގެ ތުހުމަތުގައި ދެމީހަކު ހައްޔަރުކޮށްފި

މާޅޮސްމަޑުލު އުތުރުބުރީ އަތޮޅު ކައުންސިލްގެ އިދާރާއަށް ސިހުރުހާދަ އަދި ފަންޑިތަ ހަދާކަމުގެ ތުހުމަތުގައި ދެ މީހަކު ހައްޔަރުކޮށްފިއެވެ. މި މައްސަލައިގައި 2025 ވަނަ އަހަރުގެ ފެބްރުއަރީ މަހުގެ 21 ވަނަ ދުވަހު ކޯޓު އަމުރެއްގެ ދަށުން ހައްޔަރުކޮށްފައިވަނީ ރ. އުނގޫފާރު / ރިވެލި، މުޙައްމަދު އަމްޖަދު (61 އަހަރު) އާއި ރ. އުނގޫފާރު / ނަސީމީހިޔާ، މުޙައްމަދު ވަޙީދު (67 އަހަރު) އެވެ.

މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް ވަނީ އަމުރުކޮށްފައެވެ. މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.

ރ. އަތޮޅު ކައުންސިލް އިދާރާގެ ގޯތިތެރެއަށް ސިހުރު ހަދާ މަންޒަރު ފެންނަ ކަމަށް ތުހުމަތުކޮށް ސީސީޓީވީ ފުޓޭޖެއް ސޯޝަލް މީޑިއާގައި އަންނަނީ ދައުރު ކުރަމުންނެވެ. އެ ވީޑިއޯއިން ފެންނަނީ ފިރިހެނަކު ކައުންސިލް އިދާރާގެ ގޯތިތެރެއަށް ފެން އަޅާ މަންޒަރެވެ.