ރާއްޖޭގެ ފުރަތަމަ ސޯލާ ފެރީ އެޕްރީލް މަހު ގެންނަނީ

ރާއްޖޭގެ ފުރަތަމަ ތިމާވެއްޓާ ރައްޓެހި ސޯލާ ފެރީ އަންނަ އޭޕްރީލް މަހުގެ ތެރޭގައި ރާއްޖެއަށް ގެނެވޭނެ ކަމަށް އެ ފެރީ ބަންނަ އިންޑިއާގެ ނޭވަލްޓް ކުންފުނިން މިއަދު ހާމަކޮށްފިއެވެ.

ކޮޗިންގެ އީކޯ މެރިން ޓެކް ކުންފުންޏެއް ކަމަށްވާ ނޭވަލްޓުން ބަންނަ މި ފެރީގެ އަގަކީ 9.3 މިލިއަން ރުފިޔާއެވެ. މި ފެރީއަކީ ރާއްޖެއިން ފުރަތަމަ ފަހަރަށް އަޖުމަ ބެލުމަށް ބަންނަ ފެރީއެކެވެ.

ނޭވަލްޓް ކުންފުނީގެ ސީއީއޯ ސަންދިތު ތަންދަޝެރީ ވިދާޅުވި ގޮތުގައި "އެޕޯލޯ" ގެ ނަން ދީފައިވާ މި ފެރީގައި 75 ސޯލާ ޕެނަލް ހަރުކޮށްފައިވެއެވެ. މިއީ ކަނޑު ގަދަ ދުވަސްވަރު ވެސް ދުއްވޭ ގޮތަށް ބަންނަ ފެރީއެކެވެ. ކަނޑުގެ ރާޅުގެ އުސްމިން ހަތަރު މީޓަރަށް ހުންނަ އިރު ވެސް މި ފެރީ ދުއްވޭނެއެވެ.

މި ފެރީގައި 75 މީހުންގެ ޖާގަ ހުންނާނެ ކަމަށާއި، ގަޑިއަކު 8 ނޯޓިކަލް މޭލުގެ ސްޕީޑުގައި ދުއްވޭނެ ކަމަށް ސަންދިތު ވިދާޅުވިއެވެ. އޭނާ އިތުރަށް ވިދާޅުވި ގޮތުގައި މި ފެރީ އަންނަ އޭޕްރީލް މަހުގެ ފުރަތަމަ ހަފްތާގައި ރާއްޖެއަށް ދަތުރު ފަށާނެއެވެ.

މި ފެރީ ބަނދެފައިވަނީ ރާއްޖޭގެ ފިނޭންސް މިނިސްޓްރީގެ އޯޑަރަކަށް ކަމަށާއި، މިއީ މާލޭ ސަރަހައްދުގެ ފެރީގެ ޚިދުމަތުގައި ބޭނުންކުރަން ބަންނަ އުޅަނދެއްކަން ސަންދިތު ފާހަގަކުރެއްވިއެވެ. މި ފެރީގައި 50 ކިލޯވޮޓުގެ ދެ ބެޓަރީ ޕެކާއި 40 ކިލޯވޮޓްގެ ދެ އިންބޯޑް އިލެކްޓްރިކް މޯޓަރު ހަރުކޮށްފައިވާ ކަމަށާއި، އޭގެ މަތީގައި 25 ކިލޯވޮޓުގެ ސޯލާ ޕެނަލް ސިސްޓަމެއް ހަރުކޮށްފައިވާ ކަމަށްވެސް އޭނާ ވިދާޅުވިއެވެ.

ކުރިން ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ވިދާޅުވެފައިވަނީ މި ފެރީ މިދިޔަ އަހަރުގެ ތެރޭގައި ރާއްޖެއަށް ގެނެސް ބޭނުންކުރަން ފެށޭނެ ކަމަށެވެ. ނަމަވެސް އެކި ސަބަބުތަކާ ހުރެ މި ފެރީ ރާއްޖެއަށް ގެނައުން ލަސްވެފައިވާކަން ފާހަގަކުރެވެއެވެ.

މި ފެރީއަކީ އިންޑިއަން ރަޖިސްޓާ އޮފް ޝިޕިންގ (އައިއާރުއެސް ކްލާސް) ގެ ދަށުން ބަނދެފައިވާ، ސަލާމަތީ ގޮތުން ވަރުގަދަ އަދި ރައްކާތެރި އުޅަނދެއް ކަމަށް ނޭވަލްޓް ކުންފުނިން ބުނެފައިވެއެވެ.

ނޭވަލްޓް ކުންފުނިން އިތުރަށް ހާމަކުރި ގޮތުގައި މިއީ އެ ކުންފުނިން ފަސިންޖަރުން އުފުލަން ފެރީއެއް ބަނދެ އެކްސްޕޯޓުކުރާ ފުރަތަމަ ފަހަރެވެ. ނަމަވެސް މީގެ ކުރިން ދިހަ މީހުންގެ ޖާގައިގެ ސެމީ-ލަގްޒަރީ އޭސީ ފެރީއެއް ކެނެޑާއަށް ސަޕްލައިކޮށްފައިވާ ކަމަށް އެ ކުންފުނިން ބުނެފައިވެއެވެ.

އިންޑިއާގެ އެންމެ ފުރަތަމަ ސޯލާ ފެރީ ބަނދެފައިވަނީ ވެސް ނޭވަލްޓް ކުންފުނިންނެވެ. މީގެ އަށް އަހަރު ކުރިން އެ ފެރީ ބަނދެ، އޭގެ ކާމިޔާބީއާ އެކު ކެރެލާގެ ސްޓޭޓް ވޯޓާ ޓްރާންސްޕޯޓް ޑިޕާޓްމަންޓުން ވަނީ އެ ޑިޕާޓްމަންޓުގެ ދުވަސްވީ ފެރީތައް ސޯލާ ފެރީއަށް ބަދަލުކުރަން ފަށާފައެވެ. މީގެ އިތުރުން، މިދިޔަ އަހަރުގެ އޭޕްރީލް މަހުގެ ފަހުކޮޅު ކޮޗިންގައި ބޭނުންކުރަން ފެށި ޓޫރިސްޓް ކްރޫޒް ވެސަލްއަކީ އިންޑިއާގެ އެންމެ ބޮޑު ސޯލާ އިލެކްޓިލެކްޓްރިކް ފެރީ ކަމަށްވާއިރު، އެއީ ވެސް ނޭވަލްޓްގެ އުފެއްދުމެކެވެ.