ނިމިދިޔަ ހަފްތާގައި ރާއްޖެއަށް ބައިލައްކަ އަށްވުރެ ގިނަ ފަތުރުވެރިން ޒިޔާރަތްކޮށްފި

ނިމިދިޔަ ހަފްތާގައި ރާއްޖެއަށް ބައިލައްކަ އަށްވުރެ ގިނަ ފަތުރުވެރިން ޒިޔާރަތްކޮށްފައިވާ ކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާފިއެވެ. 

އެ ވުޒާރާގެ ތަފާސްހިސާބުތަކުން ދައްކާ ގޮތުގައި، މިދިޔަ ހަފްތާގައި ވަނީ ރާއްޖެއަށް 54،525 ފަތުރުވެރިން އައިސްފައެވެ. އެގޮތުން، އެންމެ ގިނަ ފަތުރުވެރިން އައިސްފައިވަނީ އިނގިރޭސިވިލާތް، އިޓަލީ، އަދި ރަޝިއާ އިންނެވެ. އެގޮތުން، އިނގިރޭސިވިލާތުން ވަނީ ޖުމްލަ 5،902 ފަތުރުވެރިން ރާއްޖެ ޒިޔާރަތްކޮށްފައެވެ. 

ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާ ގޮތުގައި، މިދިޔަ ހަފްތާގައި ރާއްޖެއަށް އެވްރެޖްކޮށް ކޮންމެ ދުވަހަކު 7،000 އަށްވުރެ ގިނަ ފަތުރުވެރިން ވަނީ އައިސްފައެވެ. ނަމަވެސް، މިދިޔަ ހަފްތާގެ އާދީއްތަ ދުވަހަކީ މިއަހަރުގެ މިހާތަނަށް އެއް ދުވަސް ތެރޭ އެންމެ ގިނަ ފަތުރުވެރިން އައި ދުވަސްކަމަށް އެ ވުޒާރާއިން މަޢުލޫމާތުދެއެވެ. އެގޮތުން، އެދުވަހު ރާއްޖެއަށް ވަނީ 9،518 ފަތުރުވެރިން އައިސްފައެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާ ގޮތުގައި، މިއަހަރުގެ މިހާތަނަށް އެންމެ ގިނައިން ފަތުރުވެރިން އައިސްފައިވަނީ ޗައިނާއިންނެވެ. އެގޮތުން، ޗައިނާއިން ވަނީ ރާއްޖެއަށް 56،150 ފަތުރުވެރިން ޒިޔާރަތްކޮށްފަ އެވެ. މީގެ އިތުރުން، ދެވަނަ އަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. އެ ޤައުމުން ޖުމްލަ 38،505 ފަތުރުވެރިން ވަނީ ރާއްޖެ އައިސްފައެވެ. 

މީގެ އިތުރުން އެ ވުޒާރާގެ ތަފާސްހިސާބުތަކުން ދައްކާ ގޮތުގައި، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ އަދަދު ވަނީ 389،223 އަށް އަރާފައެވެ. މި އަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދާ އަޅާބަލާއިރު 7.3 އިންސައްތަ އިތުރު އަދަދެއް ކަމަށް އެ ވުޒާރާއިން ވިދާޅުވެއެވެ. މިދިޔަ އަހަރުގެ މި މުއްދަތުގައި ރާއްޖެ ޒިޔާރަތްކޮށްފައިވަނީ 362،905 ފަތުރުވެރިންނެވެ. 

މިއަހަރުތެރޭގައި ރާއްޖެއަށް 2.2 މިލިއަން ފަތުރުވެރިން ގެނައުމަކީ ސަރުކާރުގެ މުހިންމު އަމާޒެކެވެ. އަދި މިކަން ކާމިޔާބުކުރެއްވުމަށް ސަރުކާރުން ދަނީ ކަމާ ގުޅުންހުރި ވުޒާރާތަކާއި ގުޅިގެން ގިނަ މަސައްކަތްތަކެއް ކުރައްވަމުންނެވެ.