Ads by Exprox

ޚަބަރު

ދ. އަތޮޅު ހޮސްޕިޓަލުގެ އައު އިމާރާތުގެ މަސައްކަތް އާރްޑީސީއާ ހަވާލުކޮށްފި

ދ. އަތޮޅު ހޮސްޕިޓަލުގެ އައު އިމާރާތުގެ މަސައްކަތް އާރްޑީސީއާ ހަވާލުކޮށްފި

ދ. އަތޮޅު ހޮސްޕިޓަލުގެ އައު އިމާރާތުގެ މަސައްކަތް އާރްޑީސީއާ ހަވާލުކުރުމަށް ސޮއިކުރުން ފޮޓޯ: ވުޒާރާ

އާމިނަތު ޔުމްނާ

އާމިނަތު ޔުމްނާ

23 ފެބްރުއަރީ 2025، 05:03

23 ފެބްރުއަރީ 2025، 05:03

ދ. އަތޮޅު ހޮސްޕިޓަލުގެ އައު އިމާރާތުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ. 181 މިލިއަން ރުފިޔާ ޚަރަދުކޮށްގެން އިމާރާތްކުރާ މި ހޮސްޕިޓަލުގެ މަސައްކަތް 18 މަސްދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.

50 އެނދުގެ މި ހޮސްޕިޓަލަކީ މެމޮގްރަފީ ޚިދުމަތް، ޑެންޓަލް އޯޕީޖީ، ކަށީގެ ފަރުވާއަށް ޚާއްސަ އޯތޯ-ތިއޭޓަރު އަދި ޕްރައިވެޓް ރޫމް ފެސިލިޓީތައް ހިމެނޭ ޒަމާނީ ހޮސްޕިޓަލެކެވެ. މީގެ އިތުރުން، ސްޓާފުންނާއި އަތޮޅުތެރޭގެ މުވައްޒަފުންނަށް ތަމްރީން ދިނުމަށް ބޭނުންވާ ފެސިލިޓީތައްވެސް މި ހޮސްޕިޓަލުގައި ޤާއިމްކުރެވޭނެއެވެ.

ދ. އަތޮޅު ހޮސްޕިޓަލް ހުންނަ ކުޑަހުވަދޫގައި އެއަރޕޯޓެއް އޮންނާތީ، އިމަރޖެންސީ ހާލަތްތަކުގައި ބޭނުންކުރެވޭނެ އިމަރޖެންސީ އީއާރެއްވެސް ޤާއިމްކުރެވޭނެ ކަމަށް ސިއްޙަތާ ބެހޭ ވުޒާރާއިން މަޢުލޫމާތު ދެއްވިއެވެ. އަދި ކޯވިޑް ފަދަ ބަލިތައް ފެތުރޭ ހާލަތްތަކުގައި ހޮސްޕިޓަލުގެ ޚިދުމަތް މެދުނުކެނޑި ދެވޭނެ ގޮތަށް ފްލޫ ކްލިނިކާއި އައިސޮލޭޝަން ފެސިލިޓީވެސް ހިމެނޭނެއެވެ.

ހޮސްޕިޓަލުގެ ހުރިހާ އެނދަކަށް ޕައިޕްޑް އޮކްސިޖަން، މެޑިކަލް އެއަރ އަދި ސަކްޝަން އަޅާފައި ހުންނާނެ ކަމަށާއި، ހަކަތައިގެ ޚަރަދު ކުޑަކުރުމަށް ސޯލަރ ޕީވީ ސިސްޓަމެއް ހަރުކުރެވޭނެ ކަމަށްވެސް ސިއްސިއްޙަތާ ބެހޭ ވުޒާރާއިން ވިދާޅުވިއެވެ. މީގެ އިތުރުން، ޕަވަރ ބެކަޕް ސިސްޓަމް، ވޭސްޓް މެނޭޖްމަންޓް ސިސްޓަމް، އަދި ހޮސްޕިޓަލް ގްރޭޑް އިންޑަސްޓްރިއަލް ލޯންޑްރީ ސެޓަޕެއްވެސް ޤާއިމްކުރެވޭނެއެވެ.

މި ހޮސްޕިޓަލުގެ މަސައްކަތް އާރްޑީސީއާ ހަވާލުކުރުމަށް ބޭއްވުނު ރަސްމިއްޔާތުގައި ސިއްޙަތާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ އަޙުމަދު ޤާސިމެވެ. އަދި އާރްޑީސީގެ ފަރާތުން ސޮއިކުރެއްވީ ޑެޕިއުޓީ މެނޭޖިންގ ޑިރެކްޓަރ މުޙައްމަދު އަސްބާހް އަލީ ނަސީރެވެ.

މި އައު ހޮސްޕިޓަލް އިމާރާތްކޮށް ނިމި ޚިދުމަތްދޭން ފެށުމުން، ޖާގައިގެ ދަތިކަން ހައްލުވެ، ރަށުގެ އަދި ކައިރި އާބާދީތަކުގެ ރައްޔިތުންނަށް ފަސޭހަކަމާއެކު ޞިއްޙީ ޚިދުމަތް ލިބިގަނެވޭނެ ކަމަށް ސިއްޙަތާ ބެހޭ ވުޒާރާއިން ވިދާޅުވިއެވެ.

މި ހޮސްޕިޓަލުގެ އިމާރާތް ނިމި ޚިދުމަތް ދޭން ފެށުމުން، ދ. އަތޮޅުގެ ރައްޔިތުންނަށް ލިބޭ ޞިއްޙީ ޚިދުމަތުގެ ފެންވަރު މަތިވެ، ގިނަ ޚިދުމަތްތަކެއް އެއްތަނަކުން ލިބިގަނެވޭނެއެވެ. ޚާއްޞަކޮށް މެމޮގްރަފީ ޚިދުމަތާއި ކަށީގެ ފަރުވާ ފަދަ ޚާއްޞަ ޚިދުމަތްތައް އަތޮޅު ތެރެއިން ލިބުމަކީ ރައްޔިތުންނަށް ލިބޭނެ ބޮޑު ލުޔެކެވެ.



އަދި މި ހޮސްޕިޓަލުގައި ޤާއިމްކުރެވޭ މެޑިކަލް އޮކްސިޖަން ޕްލާންޓުން އަތޮޅުގެ އެހެން ރަށްރަށަށްވެސް މެޑިކަލް އޮކްސިޖަން ފޯރުކޮށްދެވޭނެތީ، މުޅި އަތޮޅުގެ ޞިއްޙީ ޚިދުމަތުގެ ފެންވަރު މަތިވެގެންދާނެއެވެ. މީގެ އިތުރުން، ކުޑަހުވަދޫގައި އެއަރޕޯޓެއް އޮތުމާއެކު، އިމަރޖެންސީ ހާލަތްތަކުގައި އަވަސް ފަރުވާ ބޭނުންވާ ބަލިމީހުން މާލެއަށް ގެންދިއުމަށްވެސް ފަސޭހަވެގެންދާނެއެވެ.

ސިއްޙަތާ ބެހޭ ވުޒާރާއިން ވިދާޅުވި ގޮތުގައި، މި ހޮސްޕިޓަލުގައި ޤާއިމްކުރެވޭ ތަމްރީނު ދިނުމުގެ ފެސިލިޓީތަކުން އަތޮޅުގެ ޞިއްޙީ ދާއިރާގައި މަސައްކަތްކުރާ މުވައްޒަފުންގެ ހުނަރު އިތުރުކޮށް، ޚިދުމަތުގެ ފެންވަރު މަތިކުރުމަށް މަގުފަހިވެގެންދާނެއެވެ. އަދި މިކަމުގެ ސަބަބުން ދިގު މުއްދަތުގައި އަތޮޅުގެ ޞިއްޙީ ޚިދުމަތުގެ ފެންވަރު ރަނގަޅުވެ، ރައްޔިތުންނަށް ލިބޭ ޚިދުމަތް އިތުރަށް ފުޅާވެގެންދާނެ ކަމަށް އެ ވުޒާރާއިން އުންމީދުކުރައްވައެވެ.

މި ހޮސްޕިޓަލުގެ މަސައްކަތް ނިމި ޚިދުމަތް ދޭން ފެށުމުން، ދ. އަތޮޅުގެ ރައްޔިތުންނަށް ޞިއްޙީ ޚިދުމަތް ހޯދުމަށް މާލެ ދަތުރުކުރަން ޖެހޭ މިންވަރު މަދުވެ، އެކަމަށް ހިނގާ ޚަރަދު ކުޑަވެގެންދާނެއެވެ. މިއީ ސަރުކާރުގެ ލާމަރުކަޒީ ސިޔާސަތުގެ ދަށުން އަތޮޅުތަކުގައި ޞިއްޙީ ޚިދުމަތް ފުޅާކުރުމުގެ މަސައްކަތުގެ ތެރެއިން އެޅޭ މުހިންމު ފިޔަވަޅެއް ކަމުގައި ބެލެވެއެވެ.


                    

މި ލިޔުން ކިޔާލުމުން

Ads by MSS