ޚަބަރު
ކުވެއިތުގެ އަސްކަރީ ޙަރަކާތެއްގައި މަރުވި ސަރޖެންޓުންނަށް ރާއްޖޭގެ ފޮރިންގ މިނިސްޓަރު ތައުޒިޔާ ދަންނަވައިފި

ޙާދިސާ ހިނގި ސަރަޙައްދު|ފޮޓޯ: ސައުދީ ގެޒެޓް
ހުލާސާ
ކުވެއިތުގެ ސަރުކާރުން ދަނީ މި ޙާދިސާ ހިނގާދިޔަ ގޮތް އިތުރަށް ތަހުޤީޤު ކުރަމުން
މި މަހުގެ 21 ވަނަ ދުވަހު ކުވެއިތުގެ ސިފައިން ހިންގި އަސްކަރީ ޙަރަކާތެއްގައި މަރުވެފައިވާ ސަރޖެންޓުންނަށް ރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް ތައުޒިޔާ ދަންނަވައިފި އެވެ.
މި ޙާދިސާއާއި ގުޅިގެން ވަޒީރު ވަނީ އެމަނިކުފާނުގެ ރަސްމީ އެކްސްގެ އެކައުންޓުން ޕޯސްޓެއް ކުރައްވާފަ އެވެ. މި ޕޯސްޓުގައި ވަޒީރު ވަނީ، މި ޙާދިސާގެ ސަބަބުން ކުވެއިތުގެ ރައްޔިތުންނަށް ކުރިމަތިވެފައިވާ ހިތްދަތި ވަގުތު ފާހަގަކޮށްފައެވެ. މީގެ އިތުރުން ވަޒީރު ވަނީ، މި ޙަރަކާތުގައި މަރުވި ސަރޖެނުނަށާއި އެ ފަރާތްތަކުގެ އާއިލާއަށް ތައުޒިޔާ ދަންނަވާފަ އެވެ. ހަމަ އެހެންމެ، މި ޙަރަކާތުގައި އެކިއެކި ގޮތް ގޮތުން އަނިޔާވެފައިވާ އެންމެހާ ފަރާތްތަކަށް ވަޒީރު ވަނީ ދިވެހި ސަރުކާރާއި، ރާއްޖޭގެ އެންމެހާ ރައްޔިތުންގެ ނަމުގައި އަވަސް ޝިފާއަކަށް އެދިވަޑައިގެންފައެވެ.
ކުވެއިތުގެ އަސްކަރީ ބާރުގެ ދެ ސަރޖެންޓުން މަރުވެފައިވަނީ އެ ޤައުމުގެ އަސްކަރީ ބާރުން ހިންގި ޙަރަކާތެއްގެ ތެރެއިން ކުރިއަށް ގެންދިޔަ "ނައިޓް ލައިވް ފަޔަރ" ޙަރަކާތުގެ ތެރެއިންނެވެ. މި ޙަރަކާތުގައި މަރުވެފައިވަނީ ފަރސްޓް ސަރޖަންޓް އަހްމަދު ފަރްހާން އަދި އެސިސްޓަންޓް ސަރޖަންޓް ދާހީ އަލް ޝައްމާރީ އެވެ. މި ޙަރަކާތުގެ ތެރެއިން ކުވެއިތުގެ އަސްކަރީ ބާރުގެ އިތުރު ސަރޖެންޓުންތަކެއް ވަނީ ޒަޚަމްވެފައެވެ.
މި ޙާދިސާއާއި ގުޅިގެން ކުވެއިތުގެ ދިފާޢީ ވުޒާރާއިން ވަނީ، އެ ޤައުމުގެ ޚާއްޞަ ޓެކްނިކަލް ޓީމެއް މެދުވެރިކޮށް މިކަން ހިނގާދިޔަގޮތް އިތުރަށް ތަހުޤީޤުކުރަން ފަށައިފައެވެ. މި ޙާދިސާގައި މަރުވި ދެ ސަރޖަންޓުން ވަޅުލާފައިވަނީ ކުވެއިތުގެ އަސްކަރިއްޔާގެ ޝަރަފުގައެވެ. މިކަމުގައި އެ ޤައުމުގެ ދިފާޢީ ވަޒީރު ޝެއިޚް އަބްދުﷲ އަލީ އަބްދުﷲ އަލް ޞަބާހް އާއި، އަންޑަރ ސެކްރެޓަރީ އޮފް ޑިފެންސް ސެއިޚް ޑރ. އަބްދުﷲ މެޝަލް އަލް ޞަބާހް އާއި، ޑެޕިއުޓީ ޗީފް އޮފް ޖެނެރަލް ސްޓާފް އެއަރ ވައިސް މަރޝަލް ޞަބާހް ޖާބިރް އަލް އަހްމަދު އަލް ޖާބިރް އަލް ޞަބާހް ގެ އިތުރުން، ދިފާޢީ ދާއިރާގެ އެހެނިހެން އިސް ބޭފުޅުން ވަނީ ބައިވެރިވެވަޑައިގެންފަ އެވެ.
ކުވެއިތުގެ ސަރުކާރަށާއި ރައްޔިތުންނަށް ދިމާވެފައިވާ މި ނާޒުކު ވަގުތުގައި، ދިވެހިރާއްޖެއިން އޮތީ އެ ޤައުމާއި އެކުގައި ކަމަށް ދިވެހިރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް ވަނީ ވިދާޅުވެފަ އެވެ.