ޚަބަރު
ރ. އުނގޫފާރުގައި ބިނާކުރާ އިސްލާމީ މަރުކަޒުގައި ވިނައިލް އެޅުމުގެ މަސައްކަތް ޕްރޮކްސީ ގުރޫޕާއި ހަވާލުކޮށްފި

ރ. އުނގޫފާރުގައި ބިނާކުރަމުންދާ އިސްލާމީ މަރުކަޒުގައި ވިނައިލް އެޅުމުގެ މަސައްކަތް ޕްރޮކްސީ ގުރޫޕާއި ހަވާލުކުރުމަށް އެއްބަސްވުމުގައި ސޮއިކުރުން|ފޮޓޯ: އިސްލާމިކް މިނިސްޓްރީ
ހުލާސާ
މަސައްކަތް ފަށާތާ 2 ދުވަސް ތެރޭގައި ނިންމާނެ
ރ. އުނގޫފާރުގައި ބިނާކުރަމުންދާ އިސްލާމީ މަރުކަޒުގައި ވިނައިލް އެޅުމުގެ މަސައްކަތް ޕްރޮކްސީ ގުރޫޕާއި ހަވާލުކޮށްފިއެވެ.
މި މަސައްކަތް އެ ކުންފުންޏާއި ހަވާލުކުރުމުގެ އެއްބަސްވުމުގައި އިސްލާމީ ކަންތައްތަކާއި ބެހޭ ވުޒާރާއިން ސޮއި ކުރެއްވީ، އެ ވުޒާރާގެ ނައިބު ރައީސް އިބްރާހިމް އާސިމްއެވެ. އަދި ޕްރޮކްސީ ކުންފުނީގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖަރ މުޙައްމަދު އައިހަމް އަޙްމަދު ޝާހިދުއެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މި މަސައްކަތް ޕްރޮކްސީ ކުންފުންޏާއި ހަވާލުކޮށްފައިވަނީ، މަސައްކަތް ފަށާތާ 2 ދުވަސްތެރޭގައި ނިންމާ ގޮތަށްކަމަށެވެ. މި ރަށުގައި ޤާއިމްކުރާ އިސްލާމީ މަރުކަޒަކީ މިއަހަރުގެ ރަމަޟާން މަސް ފެށުމުގެ ކުރިން ނިންމުމަށް ހަމަޖެހިފައިވާ މަސައްކަތެކެވެ. މީގެ އިތުރުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމު އަލީ ސަޢީދު ވަނީ އުނގޫފާރުގެ އިސްލާމީ މަރުކަޒުގެ މަސައްކަތް ރަމަޟާން މަހުގެ ކުރިން ނިމޭނެ ކަމުގެ ޔަޤީންކަން ދެއްވާފައެވެ.
އެގޮތުން، "އަހާ ފޯރަމް" ގައި ވާހަކަފުޅު ދައްކަވަމުން ވަޒީރު ވިދާޅުވީ، އުނގޫފާރުގެ އިސްލާމީ މަރުކަޒުގައި އިރާދަކުރެއްވިއްޔާ ރަމަޟާން ރަމަޟާން މަހުގެ ކުރިން ކާޕެޓު އެޅުމުގެ މަސައްކަތް ކުރިއަށް ދާނެ ކަމުގެ ޔަޤީންކަން ދޭ ކަމަށެވެ. މިގެ އިތުރުން، މި މަސައްކަތަކީ ރާއްޖޭގެ އެކި ހިސާބުތަކުގައި ބިނާކޮށްފައިވާ އިސްލާމީ މަރުކަޒުތަކުގެ ޙާލަތު ރަނގަޅުކޮށް ފެންވަރު މަތިކުރުމަށް ވުޒާރާއިން ކުރިއަށް ގެންދާ މަސައްކަތްތަކުގެ ދަށުން ކުރިއަށް ގެންދެވޭ މަސައްކަތެކެވެ.
ރާއްޖޭގެ އެކި ހިސާބުތަކުގައި މިސްކިތްތައް ބިނާކުރުމާއި، އިސްލާމީ މަރުކަޒުތައް ބިނާކުރެއްވުމަށް ސަރުކާރުން މިއަހަރުގެ ބަޖެޓުގައި ވަނީ ހިމަނުއްވާފައެވެ.