ބަބުޅި ކުރުވާހަކަ މުބާރާތް: މުއްދަތު އިތުރުކުރުމާއި އެކު ބައިވެރިންނަށް އިތުރު ފުރުޞަތެއް

ފަރުދުން މީޑިއާގެ "ބަބުޅި ކުރުވާހަކަ މުބާރާތް 1446" ގައި ބައިވެރިވުމުގެ މުއްދަތު އިތުރުކޮށް، ބައިވެރިންނަށް އިތުރު ފުރުޞަތެއް ތަނަވަސްކޮށްދީފިއެވެ.

ބަބުޅި ކުރުވާހަކަ މުބާރާތުގައި ބައިވެރިވުމަށް މީގެ ކުރިން ހުޅުވާލާފައިވަނީ މި ހިނގާ ފެބްރުއަރީ މަހުގެ 20 ވަނަ ދުވަހުގެ ނިޔަލަށެވެ. ނަމަވެސް، ގިނަ ފަރާތްތަކެއްގެ އެދުމުގެ މަތިން މި މުބާރާތުގައި ބައިވެރިވުމުގެ ފުރުޞަތު މިހާރު ވަނީ އިތުރުކޮށްފައެވެ. އެގޮތުން، ބަބުޅި ކުރުވާހަކަ މުބާރާތުގައި ބައިވެރިވާ ފަރާތްތަކުން ލިޔާ ވާހަކައިގެ ޕީޑީއެފް ފައިލެއް 28 ފެބްރުއަރީ 2025 ގެ ކުރިން ފަރުދުން މީޑިއާގެ ވައިބަރ ނުވަތަ ވަޓްސްއެޕް ނަމްބަރު (7706770) އަށް ފޮނުވޭނެއެވެ.

މި މުބާރާތުގައި ބައިވެރިން ހުށައަޅައި ވާހަކަތަކަށް އިންސާފުކުރަން ހަމަޖެހިފައިވަނީ، ލިޔުންތެރިކަމަށާއި ކިޔުންތެރިކަމަށް ބަލައި މާރކްސް ދީގެންނެވެ. އެގޮތުން، ހުށަހަޅާ ވާހަކަތަކުގެ ތެރެއިން އެންމެ މޮޅު 30 ވާހަކަ ހޮވުމަށް ވަނީ ހަމަޖެހިފައެވެ. އަދި މިގޮތުން ހޮވާލެވޭ 30 ވާހަކަ، ރަމަޟާން މަހުގެ ކޮންމެ ދުވަހަކު ފަރުދުން މީޑިއާގެ ސޯޝަލް މީޑިއާ ޕްލެޓްފޯމުތަކުން ގެނަސްދޭނެއެވެ. މީގެ އިތުރުން، މުބާރާތުގެ ވަނަ ވަނައަށްދާ ވާހަކަތައް ވެސް ހޮވާނީ މި 30 ވާހަކައިގެ ތެރެއިންނެވެ. 

ބަބުޅި ކުރުވާހަކަ މުބާރާތުގައި ބައިވެރިންނަށް ޢާންމު އިޖްތިމާޢީ މިންގަނޑަށް ފެތޭ، ކޮންމެ ބާވަތެއްގެ ވާހަކައެއް ވެސް ހުށައެޅިދާނެއެވެ. މި މުބާރާތުގައި 3 ވަނައަށް ހޮވޭ ފަރާތަކަށް 2000 ރުފިޔާ ގެ ފައިސާގެ އިނާމު ދިނުމަށް ވަނީ ހަމަޖެހިފައެވެ. އަދި 2 ވަނައަށް ހޮވޭ ފަރާތަކަށް 3000 ރުފިޔާގެ ފައިސާގެ އިނާމު ލިބިގެންދާނެ އެވެ. މީގެ އިތުރުން، ބަބުޅި ކުރުވާހަކަ މުބާރާތުގެ 1 ވަނައަށް ހޮވޭ ފަރާތަކަށް 5000 ރުފިޔާގެ ފައިސާގެ އިނާމާއި، ޓްރޮފީގެ އިތުރުން ފަރުދުން މީޑިއާގައި ވަޒީފާއެއްގެ ގޮތުގައި ވާހަކަ ލިޔުމުގެ ފުރުޞަތު ލިބިގެންދާނެއެވެ.

ބަބުޅި ކުރުވާހަކަ މުބާރާތަކީ މިއަހަރުގެ ރަމަޟާންމަހަށް ޚާއްޞަކޮށްގެން ފަރުދުން މީޑިއާއިން ޢާންމުންނަށް ހުޅުވާލާފައިވާ ރަނުގެ ފުރުޞަތެކެވެ.