ރަމަޟާންމަހު މުދާ ފޯރުކޮށްދިނުމަށް އެމްޕީއެލް ތައްޔާރު

މިއަހަރުގެ ރަމަޟާންމަހު ވެސް ރައްޔިތުންނަށް އެއްވެސް ދަތިކަމެއްނެތި މުދާ ފޯރުވައިދިނުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ތައްޔާރުވެފައިވާ ކަމަށް އެ ކުންފުނިން މިއަދު ބުނެފިއެވެ.

މިކަމާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޕީއެލްގެ ހެޑް އޮފް ޕޯޓް އޮޕަރޭޝަން އިލްޔާސް މުހައްމަދު ވިދާޅުވީ، ރަމަޟާންމަހަށް ޚާއްސަކޮށްގެން މުދާ ފަސޭހަކަމާއި ރައްކާތެރިކަމާއެކު ބެހެއްޓުމަށްޓަކައި ގިނަ ކަންތައްތަކެއް ކުރެވިފައިވާ ކަމަށެވެ.

އެގޮތުން މުދާ ބެހެއްޓުމަށްޓަކައި މާލެތެރޭގައި އިތުރު ޝެޑްތައް ޤާއިމްކޮށްފައިވާ ކަމަށާއި، އަވަހަށް ހަލާކުވާ ޒާތުގެ މުދާ ގޯޑައުންގައި ބެހެއްޓޭގޮތަށް ހަދާފައި ހުޅުމާލޭގައި ވަގުތީ ޓެންޓެއް ގާއިމްކޮށްފައިވާ ކަމަށް އޭނާ ވިދާޅުވިއެވެ.

މީގެއިތުރުން، އަވަހަށް ހަލާކުވާ ޒާތުގެ މުދާ މާލޭ ކޮމާޝަލް ހާބަރުން ކްލިއަރ ކުރެވޭ ގޮތް ހަދައި، އާންމު މުދާތައް ހުޅުމާލެ ޕޯޓުން ކްލިއަރ ކުރެވޭނެގޮތަށް ބަދަލުކޮށްފައިވާ ކަމަށްވެސް އިލްޔާސް ވިދާޅުވިއެވެ. އަދި އެމްޕީއެލްއާއި ކަސްޓަމްސްއިން މުދާ ކްލިއަރ ކުރާ ގަޑި އެއްގަޑިއަކަށް ބަދަލުކޮށް މަސައްކަތް އަވަސް ކުރެވޭނެ އިންތިޒާމު ހަމަޖައްސާފައިވާ ކަމަށްވެސް އޭނާ ވިދާޅުވިއެވެ.

މަސައްކަތް ހަލުވި ކުރުމަށްޓަކައި ބޯޓުތަކުގައި މަސައްކަތްކުރާ މުވައްޒަފުންގެ އަދަދުވެސް ރަމަޟާންމަހަށް  އިތުރުކޮށް ޚާއްސަ ޓާސްކްފޯސްއެއް އެކުލަވާލާފައިވާ ކަމަށާއި، ވެހިކަލްގެ ދަތިކަން ހައްލުކުރުމުގެ ގޮތުން ރީޖަނަލް ޕޯޓްތަކުގައި ހުރި އުޅަނދުތައް މާލެ ގެނައުމުގެ މަސައްކަތް ކުރަމުން އަންނަ ކަމަށްވެސް އިލްޔާސް ވިދާޅުވިއެވެ.

މިއަހަރުގެ ރަމަޟާން މަހު، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:15 އިން 16:00 އަށް، އަދި ރޭގަނޑު 21:15 އިން 01:30 އަށް މާލެ ކޮމާޝަލް ހާބަރާއި ހުޅުމާލެ ޓާރމިނަލުން ޚިދުމަތް ދޭނެ ކަމަށް އެމްޕީއެލްއިން ބުނެފައިވެއެވެ. އަދި ކޮންމެ ނަމާދު ވަގުތެއްގައި 20 މިނެޓުގެ ހުސްވަގުތުކޮޅެއް ދޭނެ ކަމަށާއި، 27 ވަނަ ރޭ ބަންދު ކުރާނެ ކަމަށްވެސް އެމްޕީއެލްއިން ބުނެފައިވެއެވެ.