އެކްސްޕެޓް ސިސްޓަމް މައްސަލާގައި ކުރީގެ ސަރުކާރުގެ ވެރިންގެ މައްޗަށް ޖިނާޢީ ތަޙްޤީޤެއް ހިންގަނީ

އެކްސްޕެޓް ސިސްޓަމް މައްސަލާގައި ދައުލަތަށް ގެއްލުންވާގޮތަށް، ކުރީގެ ސަރުކާރުގެ ވެރިން އިހުމާލުވެވައިވާތީ ޖިނާޢީ ތަހުޤީގެއް ކޮށްދިނުމަށް އެދި އެންޓި-ކޮރަޕްޝަން ކޮމިޝަން (އޭސީސީ) އަށް ހުށަހަޅުއްވާނެ ކަމަށް ދާޚިލީ ސަލަމާތާއި ފަންނިއްޔާތާ ބެހޭ ވަޒީރު ޢަލީ އިޙްސާން މިއަދު ވިދާޅުވެއްޖެއެވެ.

ވަޒީރު އިޙްސާން މިހެން ވިދާޅުވީ، ރައްޔިތުންގެ މަޖިލީހަށް މިހާރު ހުށަހެޅިފައިވާ ވަޒީރުގެ އިތުބާރު ނެތް ކަމުގެ މައްސަލާގައި، ޖަވާބުދާރިވެވަޑައިގަންނަވަމުންނެވެ. މި މައްސަލައިގައި ވަޒީރު ވަނީ މައިގަނޑު 3 ނުކުތާއަކަށް ޖަވާބުދާރީވެވަޑައިގެންފައެވެ.

ވަޒީރު އިޙްސާން ވިދާޅުވި ގޮތުގައި، 2016 ވަނަ އަހަރު އޮކްޓޯބަރ މަހު މެލޭޝިއާގެ ބެސްޓިނެޓް ކުންފުންޏާއެކު އެއްބަސްވުމެއްގައި ސޮއިކުރެވުނެވެ. މި އެއްބަސްވުމުގެ ދަށުން އެ ކުންފުނިން 13.4 މިލިއަން ޑޮލަރު އިންވެސްޓް ކުރަން ޖެހެއެވެ. ނަމަވެސް، 2019 އިން ފެށިގެން އެ ކުންފުނިން މިކަމާ ގުޅޭ މުޢާމަލާތްތައް ކުރަމުން ދިޔައިރުވެސް، އެކަށީގެންވާ ޖަވާބެއް ނުދީ 2022 ވަނަ އަހަރު އެއްބަސްވުން އުވާލުމާ ހަމައަށް ދިޔަކަން ވަޒީރު ފާހަގަކުރެއްވިއެވެ.

މިދިޔަ 5 އަހަރު ތެރޭގައި މިމައްސަލައަށް އިހުމާލުވެ އެއްވެސް ހައްލެއް ނުހޯދާ ދައުލަތަށް ފައިދާ ވާން އޮތް މައްސަލައެއްގައި ގެއްލުންދީފައި ވާތީއޭ ކުރީގެ ސަރުކާރުގެ ހުރިހާ ވެރިންގެ މައްޗަށް ޖިނާޢީ ތަހުޤީޤެއް ކުރުމަށް އޭސީސީއަށް ހުށަހަޅާނަން

 ވަޒީރު އިޙްސާން 

ވަޒީރުގެ ވާހަކަފުޅުގައި، އައު ސިސްޓަމް ޤާއިމްވުމުން ދިވެހި ދައުލަތަށް 1.3 ބިލިއަން ރުފިޔާ ވަދެގެންދާނެ ކަމަށް ވިދާޅުވިއެވެ. އެހެންނަމަވެސް، މިހާރު ހުރި ސިސްޓަމުން ރަނގަޅު އަހަރެއްގެ ތެރޭގައިވެސް އެވަރޭޖްކޮށް ވަންނަނީ 770 މިލިއަން ރުފިޔާ ކަމަށް ވަޒީރު ފާހަގަކުރެއްވިއެވެ.

ބެސްޓިނެޓުން ބަލަހައްޓަމުންދިޔަ "އެކްސްޕެޓް އޮންލައިން ސިސްޓަމް" އަކީ ބަންގްލަދޭޝުން ރާއްޖެ އަންނަ މަސައްކަތްތެރިންގެ މެޑިކަލް އަދި އެނޫންވެސް ޚިދުމަތްތައް ފޯރުކޮށްދިނުމުގެ މަސައްކަތާގުޅޭ ނިޒާމެކެވެ. 2019 ވަނަ އަހަރު، ބަންގްލަދޭޝުން ބިދޭސީން ރާއްޖެއަށް ގެނައުން ނިމިދިޔަ ސަރުކާރުން މެދުކަނޑާލީ އެ ޚިދުމަތްދެމުން ދިޔަ ކުންފުންޏާއި ވާހަކަދެކެވިގެން ނޫންކަން ވަޒީރު އިޙްސާން މީގެ ކުރިން ވަނީ ފާހަގަކުރައްވާފައެވެ.

މިމައްސަލައިގައި މެންބަރުން ރަނގަޅު ވާހަކައެއް ވިދާޅުވޭ، ދައުލަތަށް ގެއްލުންވާ ގޮތަށް ކަމެއްކުރައްވާފައިވާނަމަ މައްސަލަ ބަލަންޖެހޭކަމަށް. މިދިޔަ 5 އަހަރު ތެރޭގައި މިމައްސަލައަށް އިހުމާލުވެ އެއްވެސް ހައްލެއް ނުހޯދާ ދައުލަތަށް ފައިދާ ވާން އޮތް މައްސަލައެއްގައި ގެއްލުންދީފައި ވާތީއޭ ކުރީގެ ސަރުކާރުގެ ހުރިހާ ވެރިންގެ މައްޗަށް ޖިނާޢީ ތަހުޤީޤެއް ކުރުމަށް އޭސީސީއަށް ހުށަހަޅާނަން

ވަޒީރު އިޙްސާން 

މި މައްސަލައިގައި ވަޒީރު އިޙްސާން ދެއްކެވި ވާހަކަފުޅުތަކުން އެނގެނީ، ކުރީގެ ސަރުކާރުން މި މައްސަލައަށް އެކަށީގެންވާ ސަމާލުކަމެއް ދީފައި ނުވާކަމެވެ. އަދި މިކަމުގެ ސަބަބުން ދައުލަތަށް ލިބެންޖެހޭ ބޮޑު އާމްދަނީއެއް ގެއްލިގެން ގޮސްފައިވާ ކަމަށް ވަޒީރު ދެކެވަޑައިގަންނަވާކަމެވެ.