ޚަބަރު
ސިޔާސީ ނުފޫޒެއް އަޅުގަނޑުމެން ނުފޯރުވާނަން، ފޯރުވާކަށް ނުވެސް ޖެހޭ: ދާޚިލީ ވަޒީރު

ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙްސާން ފޮޓޯ:ސަންއޮންލައިން
ފުލުހުންގެ ތަޙުޤީޤުތަކަށް ސިޔާސީ ނުފޫޒު ފޯރުވާކަމަށް ކުރެވޭ ތުހުމަތު ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙްސާން ދޮގުކުރައްވައިފިއެވެ. ވަޒީރު މިތުހުމަތު ދޮގުކުރެއްވީ، ރައްޔިތުންގެ މަޖިލީހަށް ހުށަހެޅިފައިވާ ވަޒީރުގެ އިތުބާރު ނެތްކަމުގެ މައްސަލައިގައި ޖަވާބުދާރީވެވަޑައިގަންނަވަމުންނެވެ.
ވަޒީރު ވިދާޅުވީ، އެމަނިކުފާނު ފުލުހުންނަށް ސިޔާސީ ނުފޫޒު ފޯރުވާނަމަ، ކުރީގެ ސަރުކާރުގެ ހުރިހާ ވެރިން މިހާރު ތިބޭނީ ޖަލުގައި ކަމަށެވެ. އަދި އެފަދަ ނުފޫޒެއް ނުފޯރުވާތީ، އެ ފަރާތްތައް މިހާރުވެސް މިނިވަންކަމާއެކު ތިބޭކަމަށް ވަޒީރު ފާހަގަކުރެއްވިއެވެ.
އަޅުގަނޑު ސިޔާސީ ނުފޫޒު ފުލުހުންނަށް ފޯރުވާނަމަ މިދިޔަ ސަރުކާރުގެ ހުރިހާ ވެރިން ތިބޭނީ ޖަލުގައި، އަޅުގަނޑު ސިޔާސީ ނުފޫޒު ނުފޯރުވާތީ އެބޭބޭފުޅުން މިހާރުވެސް މިނިވަންކަމާއިއެކު ތިބީ. ކަމެއް ގޯސްނުވާތީއެއް ނޫން. ފުލުހުން އެ ތަހުޤީޤުތައް ކުރޭ. ދާ ސްޕީޑުގައި އެދަނީ. ފުލުހުންނަށް ލިބިދީފައި އޮތް ޤާނޫނީ ބާރުގެ ތެރެއިން އެކަން ކުރާނީ. ސިޔާސީ ނުފޫޒެއް އަޅުގަނޑުމެން ނުފޯރުވާނަން. ފޯރުވާކަށް ނުވެސް ޖެހޭ
ވަޒީރު
ވަޒީރު އިތުރަށް ހާމަކުރެއްވި ގޮތުގައި، އެޗްޑީސީ، ކަރެކްޝަންސް، ފިއުލް ސަޕްލައި އަދި ހައުސިންގ މިނިސްޓްރީގެ މައްސަލަތަކުގެ ތަޙުޤީޤުތައް ފުލުހުން މިހާރުވެސް ކުރިއަށް ގެންދަވާ ކަމަށެވެ. އަދި މި މައްސަލަތަކަށް ހުރަސް އަޅުއްވާނަމަ، އެ މައްސަލަތައް ނުހިނގާނެކަން ފާހަގަކުރެއްވިއެވެ.
އިތުބާރު ނެތްކަމުގެ މައްސަލައިގައި ވަޒީރުގެ މައްޗަށް އިދިކޮޅު ފަރާތްތަކުން ކުރާ އެހެނިހެން ތުހުމަތުތަކަށްވެސް ވަޒީރު ވަނީ ޖަވާބުދާރީވެވަޑައިގެންފައެވެ. އޭގެ ތެރޭގައި ޕާޓީއަށް އޮޅުވާލައިގެން މީހުން ވެއްދުމުގެ މައްސަލަ ހިމެނެއެވެ. މިކަމާ ގުޅޭގޮތުން ވަޒީރު ވިދާޅުވީ، މި މައްސަލައަށް ހައްލެއް ގެނެސްދިނީ މި ސަރުކާރުން ކަމަށެވެ.
ދާޚިލީ ވަޒީރު އިތުރަށް ވިދާޅުވީ، އެމަނިކުފާނަށް އިދިކޮޅު އެމްޑީޕީގެ ރުހުމެއް ނެތްކަމަށާއި، ޤާނޫނު ފުރިހަމައަށް ތަންފީޒުކުރާ ވަޒީރަކަށް އިދިކޮޅުގެ ރުހުމެއް ނޯންނާނެ ކަމަށެވެ.