ޚަބަރު
ކުރީގެ ފަސްޓް ލޭޑީ ޑީއެންއާރު ބޭނުންކުރައްވާ ފޮޓޯއެއް ދާޚިލީ ވަޒީރު ހާމަކުރައްވައިފި

ދާޚިލީ ވަޒީރު އަލީ އިހްސާން ފޮޓޯ:މަޖިލިސް
ދާޚިލީ ވަޒީރު އަލީ އިހްސާން، ކުރީގެ ރައީސް އިބްރާހީމް މުޙައްމަދު ޞާލިހުގެ އަނބިކަނބަލުން ފަޒުނާ އަޙްމަދު، ޑީއެންއާރު ޑާޓާ ބޭނުންކުރައްވައިގެން އެމްޑީޕީއަށް މެންބަރުން ވެއްދުމުގެ މަސައްކަތް ކުރައްވަމުންދާ ކަމަށް ތުހުމަތުކުރައްވައި، އެކަމާ ގުޅޭ ފޮޓޯއެއް މިއަދު ރައްޔިތުންގެ މަޖިލީހުގައި ހާމަކުރައްވައިފިއެވެ.
މި މައްސަލަ ހާމަވެގެން ދިޔައީ، ވަޒީރު އިހްސާންގެ އިތުބާރު ނެތްކަމުގެ ވޯޓެއް ނެގުމަށް އެމްޑީޕީގެ 12 މެންބަރުން ހުށަހެޅުއްވި މައްސަލައެއް މަޖިލީހުގައި ބަހުސްކުރެވެމުންދަނިކޮށެވެ. އެމްޑީޕީން ހުށަހެޅި މައްސަލައިގައި، އިހްސާންގެ ބެއްލެވުމުގެ ދަށުން ހިންގާ ޑީއެންއާރުގެ ޑާޓާ ބޭސް ބޭނުންކޮށްގެން ވަގަށް ޕީއެންސީއަށް މެންބަރުން ވެއްދި ކަމަށް ތުހުމަތުކޮށްފައިވެއެވެ.
މި ތުހުމަތުތަކަށް ޖަވާބުދާރީވަމުން، ވަޒީރު އިހްސާން ވިދާޅުވީ ކުރީގެ ރައީސް ޞާލިހްގެ ވެރިކަމުގައި، އެމްޑީޕީއަށް ވަގަށް ވެއްދި މީހުންގެ އަދަދު 520 އަށް އަރާ ކަމަށެވެ. އަދި އެ މައްސަލައާ ގުޅިގެން އެއްވެސް ވަޒީރަކާ ސުވާލުކޮށްފައި ނުވާ ކަމަށްވެސް ފާހަގަކުރެއްވިއެވެ.
އަޅުގަނޑަށް މި ފޮޓޯއިން ވަރަށް ސާފު މިއީ ކުރީގެ ފަސްޓްލޭޑީ ފަޒުނާކަން. ކުރިމަތީގައި އެ އޮތީ ޑީއެންއާރުގެ ޑާޓާތައް ބަރާބަރަށް ޕްރިންޓް ކޮށްފައި އޮތް ފައިލެއް. އޭރު މިއިން އެއްވެސް މައްސަލައެއްގެ ވާހަކަ އެއްވެސް މީހަކު ނުދައްކާ ވަޒީރު އިހްސާން
މީގެއިތުރުން، 2023 ވަނަ އަހަރުގެ ރެ ރިޔާސީ އިންތިޚާބުގެ ތެރޭގައި، "ވޯޓް ވިޔު" ގެ ނަމުގައި ކުރީ ސަރުކާރުން ސޮފްޓްވެއަރއެއް ހަދައި، ޑީއެންއާރު، އެންސްޕާ އަދި އާސަންދައިގެ ދަށުގައި ހުރި މަޢުލޫމާތު އޭގައި ހިމެނިކަމުގެ ތުހުމަތު ދަ ޑިމޮކްރެޓްސް ޕާޓީން ކުރި ކަމަށްވެސް ވަޒީރު ފާހަގަކުރެއްވިއެވެ.
ވަޒީރު އިހްސާން އިތުރަށް ވިދާޅުވީ، ރައްޔިތުންނަށް ނޭނގި ރައްޔިތުންގެ ޑީއެންއާރުގެ ތެރެއިން ނަގާ މައްސަލަތައް 2014 ވަނަ އަހަރުން ފެށިގެން ފެންމަތިވަމުން ދިޔަ ކަމަށެވެ. އަދި މިފަދަ މައްސަލަތައް ހައްލުކުރުމަށްޓަކައި، މިހާރު އީފާސް މެދުވެރިކޮށް ޕާޓީއަށް މެންބަރުން ވެއްދޭނެ ގޮތް ހަދާފައިވާ ކަމަށްވެސް ވިދާޅުވިއެވެ.