މާލޭގައި ކޮތަރުތައް މަރުވަމުންދާ މައްސަލަ: އިންސާނުންގެ ސިއްޙަތަށް ނުރައްކަލެއް ނެތް

މާލޭގެ އެކި ސަރަޙައްދުތަކުން ކޮތަރުތައް ބަލިވެ މަރުވަމުންދާ މައްސަލައިގައި، މިހާތަނަށް ކުރެވުނު ތަޙުލީލުތަކުން އިންސާނުންގެ ސިއްޙަތަށް ނުރައްކާވާފަދަ އެއްވެސް ކަމެއް ފާހަގަކުރެވިފައި ނުވާކަމަށް ސިއްޙީ ވުޒާރާއިން ބުދަ ދުވަހު ހާމަކޮށްފިއެވެ.

މިދިޔަ ދުވަސްތަކުގައި މާލޭގެ އެކި ސަރަޙައްދުތަކުން ބަލިވެފައިވާ އަދި މަރުވެފައިވާ ކޮތަރުތައް ފެންނަމުންދިޔުމާ ގުޅިގެން، ގިނަ ރައްޔިތުން ވަނީ މިކަމާ ކަންބޮޑުވުން ފާޅުކޮށްފައެވެ. މިކަމާ ގުޅިގެން ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ވަނީ މިދިޔަ ހަފްތާގައި މާލޭގެ އެކި ސަރަޙައްދުތަކުން ބަލިވެފައިވާ ކޮތަރުތަކުގެ ސާމްޕަލްތައް ނަގައި ތަޙުލީލުކުރުމުގެ މަސައްކަތް ފަށާފައެވެ.

ސިއްޙީ ވުޒާރާގެ ބަޔާނެއްގައި ބުނެފައިވަނީ، މިހާތަނަށް ކުރެވުނު ތަޙުލީލުތަކުން އިންސާނުންގެ ސިއްޙަތަށް ނުރައްކާވާފަދަ އެއްވެސް ކަމެއް ފާހަގަކުރެވިފައި ނުވާ ކަމަށެވެ. ނަމަވެސް، އެންމެ ރައްކާތެރި ގޮތަކީ މިފަދަ ބަލި ކަމަށް ފާހަގަކުރެވޭ ދޫނި ނުވަތަ ޖަނަވާރުންނާ ގާތްނުވުން ކަމަށް އެ ވުޒާރާއިން އިރުޝާދު ދީފައިވެއެވެ.

މި މައްސަލަ ބެލުމުގެ މަސައްކަތް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއާ ގުޅިގެން ކުރިއަށްދާ ކަމަށް ސިއްޙީ ވުޒާރާއިން ހާމަކޮށްފައިވެއެވެ. އަދި މި މައްސަލައާ ގުޅޭ އިތުރު މަޢުލޫމާތު ލިބުމުން އާންމުންނާ ހިއްސާކުރާނެ ކަމަށްވެސް އެ ވުޒާރާއިން ބުނެފައިވެއެވެ.