ވިޔަފާރި / ޚަބަރު
ރައީސްގެ ދަތުރުފުޅާއެކު ހުރިހާ ރަށެއްގައި އޭޓީއެމްގެ ޚިދުމަތް ޤާއިމްކުރި ފުރަތަމަ އަތޮޅަކަށް ދ އަތޮޅު

ދ. ބަނޑިދޫގައި އޭޓީއެމްގެ ޚިދުމަތް ފެށުން---
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދ އަތޮޅުގެ މީހުން ދިރިއުޅޭ ހުރިހާ ރަށަކަށް ފެއްޓެވި ދަތުރުފުޅު މިއަދު ނިންމަވާލެއްވިއިރު، މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ޤާއިމްކުރި ފުރަތަމަ އަތޮޅަކަށް ދ އަތޮޅުވެއްޖެއެވެ.
އާދީއްތަ ދުވަހު ރައީސުލްޖުމްހޫރިއްޔާ ފެއްޓެވި މި ދަތުރުފުޅުގައި އެ އަތޮޅުގެ 5 ރަށެއްގައި މުޅިން އަލަށް އޭޓީއެމްގެ ޚިދުމަތް ވަނީ ފައްޓަވާދެއްވާފައެވެ. އެއީ ދ. މާއެނބޫދޫ، ބަނޑިދޫ، މީދޫ، ރިނބުދޫ އަދި ހުޅުދެެއްޔެވެ. މި ރަށްރަށަކީ ކުރިން ބޭންކިންގެ ޚިދުމަތްތައް ލިބުނު ރަށްރަށެއް ނޫނެވެ.
އެގޮތުން، މި ރަށްރަށުގައި އޭޓީއެމްގެ ޚިދުމަތް ޤާއިމްކުރެވުމާއެކު، އެ އަތޮޅުގެ 6 ރަށެއްގައި މިހާރު އޭޓީއެމްގެ ޚިދުމަތް މިވަނީ ފަށާފައެވެ. މީގެކުރިން އެ އަތޮޅުގައި އޭޓީއެމްގެ ޚިދުމަތް ލިބެނީ އެ އަތޮޅުގެ ވެރިކަންކުރާ ކުޑަހުވަދޫއިން އެކަންޏެވެ.
ދ އަތޮޅުގައި މި ހަފްތާ ޤާއިމްކުރެވުނު އޭޓީއެމްތަކާއެކު، ބީއެމްއެލްއިން އޭޓީއެމްގެ ޚިދުމަތް ޤާއިމުކޮށްފައިވާ ރަށްރަށުގެ އަދަދު މިހާރު މިވަނީ 157 އަށް އަރާފައެވެ.
މި އަހަރު ނިމުމުގެ ކުރިން ރާއްޖޭގައި މީހުން ދިރިއުޅޭ ހުރިހާ ރަށެއްގައި އޭޓީއެމް ބަހައްޓައި، ބޭންކިން ޚިދުމަތް (ސެލްފް ސަރވިސް ބޭންކިން) ދޭން ފެށުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެކެވެ.
މީގެ އިތުރުން، ކުޑަހުވަދޫގައި މި އަހަރު ޑޮލަރު އޭޓީއެމްއެއް ބަހައްޓަވާނެކަމަށް ވެސް އެ މަނިކުފާނު ވަނީ ވިދާޅުވެފައެވެ. އަދި މި މަހުގެ 16 ވަނަ ދުވަހު އައްޑޫ ސިޓީގައި ޑޮލަރު އޭޓީއެމްއެއްގެ ޚިދުމަތް ވަނީ ދޭންފަށާފައެވެ.
މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 100 ސެލްފްސަރވިސް ބޭންކިންގ ސެންޓަރ، 157 އޭޓީއެމް، އޭޖެންޓު ބޭންކިންގ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ހިދުމަތެއް ބޭންކް އޮފް މޯލްޑިވްސްއިން ދަނީ ފޯރުކޮށްދެމުންނެވެ.