ކުޅިވަރު

ކާށިދޫއިން ގޯލްޑަން ފުޓްސަލް ޗެލެންޖު ކާމިޔާބުކޮށްފި

ކާށިދޫއިން ގޯލްޑަން ފުޓްސަލް ޗެލެންޖު ކާމިޔާބުކޮށްފި

ގޯލްޑަން ފުޓްސެލް ޗެލެންޖުގެ ތަށި ކާށިދޫއިން އުފުލާލުން، ފޮޓޯ: އަދަދު

މިފްތާޙް މުޙައްމަދު

މިފްތާޙް މުޙައްމަދު

26 ފެބްރުއަރީ 2025، 06:23

26 ފެބްރުއަރީ 2025، 06:23

ހުލާސާ

ކާށިދޫއަކީ މުބާރާތް ކާމިޔާބުކުރި ތަފާތު. 7ވަނަ ޓީމު.

ރާއްޖޭގެ ހުރިހާ ރަށެއްގެ މެދުގައި ކުޅޭ ގޯލްޑަން ފުޓްސެލް ޗެލެންޖު ކާށިދޫއިން މުޅިން އަލަށް ކާމިޔާބުކޮށްފިއެވެ. 

ހުޅުމާލެ ރެހެންދި ފުޓްސަލް ގްރައުންޑްގައި ކުޅުނު މި މެޗަށްފަހު އެ ޓީމުން ތަށި އުފުލާލީ، ފައިނަލުގައި ހދ. ނައިވާދޫ 4-1 އިން ބަލިކުރުމަށްފަހުއެވެ.

މި މުބާރާތް މިހާރު ނުވަ ފަހަރު ބާއްވާފައިވާއިރު، ކާށިދޫއަކީ މުބާރާތް ކާމިޔާބުކުރި ތަފާތު 7ވަނަ ޓީމެވެ. މީގެ ކުރިން، ތ. ތިމަރަފުށިން ތިން ފަހަރު މި ތަށި ހޯދިއިރު، މާފަންނު، ހެންވޭރު، ބ. ހިތާދޫ، ބ. އޭދަފުށި އަދި ލ. ގަމުން ވަނީ މި މުބާރާތުގެ ޗެމްޕިއަންކަން ހޯދައިފައެވެ. 

ރޭގެ ފައިނަލް މެޗު ޝަރަފުވެރިކޮށްދެއްވާފައިވަނީ ރައީސުލްޖުމްހޫރިއްޔާގެ ނައިބު، އުސްތާޛް ޙުސެއިން މުޙައްމަދު ލަތީފެވެ. ނައިބު ރައީސްގެ އަރިހުގައި ސްޕޯޓްސް މިނިސްޓަރ އަލްފާޟިލް އަބްދުﷲ ރާފިޢު ވެސް ވަނީ ބައިވެރިވެވަޑައިގަންނަވާފައެވެ.

މެޗުގައި ފުރަތަމަ ލީޑު ނެގީ ވެސް ކާށިދޫއެވެ. އެ ޓީމަށް ފުރަތަމަ ގޯލު ކާމިޔާބުކޮށްދިނީ އަޖްލާން އަބްދުލް ޙައްނާނެވެ. އޭގެފަހުން ނައިވާދޫއިން ވަނީ މެޗުގެ ނަތީޖާ ހަމަހަމަކޮށްފައެވެ. އެ ޓީމަށް ލިބުނު ހިލޭ ޖެހުމަކުން ހޯދި ފުރުސަތެއްގައި މި ގޯލު ކާމިޔާބުކޮށްދިނީ އަޙުމަދު ހަމީދެވެ.

ނަމަވެސް ނައިވާދޫއަށް އިތުރު ގޯލެއް ކާމިޔާބުކުރުމުގެ ފުރުސަތެއް ނުދީ، ކާށިދޫއިން ވަނީ އަނެއްކާވެސް ލީޑު ނަގާފައެވެ. އެ ޓީމުގެ ފަހު ތިން ގޯލު ކާމިޔާބުކޮށްދީފައިވަނީ އަބްދުﷲ ސުޒޭރު އާއި ފުރަތަމަ ގޯލު ކާމިޔާބުކުރި އަޖްލާންއެވެ. އެގޮތުން މި ދެ ކުޅުންތެރިން ވަނީ ފައިނަލް މެޗުގައި ކޮންމެ ކުޅުންތެރިއަކު ދެ ގޯލު ކާމިޔާބުކޮށްފައެވެ.

މި ފަހަރުގެ މުބާރާތުގެ އެންމެ އުންމީދީ ކުޅުންތެރިއަކަށް ހޮވުނީ ކާށިދޫގެ އިސްމާއިލް ރަޔާންއެވެ. އަދި އެންމެ މޮޅު ކޯޗަކަށް އެ ޓީމުގެ އަލީ ހައިޝަމް (ޗުމްޕު) ހޮވުނުއިރު، ފެއާޕްލޭ ޓީމަކީ ވެސް ކާށިދޫއެވެ. އެންމެ ރަނގަޅު ސަޕޯޓެއް ދިން ޓީމަކަށް ހޮވުނީ ނައިވާދޫއެވެ.

އެންމެ ގިނަ ގޯލުޖެހި ކުޅުންތެރިއަކަށް ހޮވުނީ، 14 ގޯލު ކާމިޔާބުކުރި މުޙައްމަދު ޝާއިންއެވެ. 

އަދި މޮޅު ކީޕަރުގެ މަގާމު ސަލީލަށް ލިބުނުއިރު، ގަދަ ފަސް ކުޅުންތެރިންނަކީ، ނައިވާދޫގެ އަޙުމަދު ޙަމީދާއި ޔާމިން މުޙައްމަދު އަދި ކާށިދޫގެ އަބްދުﷲ ސުޒެއިރާއި އަޖުލާން އަބްދުލް ހަންނާންގެ އިތުރުން ވާދޫގެ އަޔާޒް އަޙުމަދު (އަޔާ)އެވެ.

މި ލިޔުން ކިޔާލުމުން

Ads by MSS