ރާއްޖޭގެ ފުޓްސަލް ކިންގުގެ ޝަރަފު ހޯދި ފުރަތަމަ ގޯލްކީޕަރަކަށް ކާށިދޫގެ ސަލީލް

ގޯލްޑަން ފުޓްސަލް ޗެލެންޖުގެ "ކިންގް އޮފް ފުޓްސަލް"ގެ މަޤާމު ކާށިދޫގެ މުޙައްމަދު ސަލީލް ހޯދައި، މުބާރާތުގައި ފުރަތަމަ ފަހަރަށް މި ޝަރަފު ހޯދި ގޯލްކީޕަރުގެ ޝަރަފު ވެސް އޭނާ ހޯދައިފިއެވެ.

ހުޅުމާލޭގެ ރެހެންދި ފުޓްސަލް ގްރައުންޑުގައި ރޭ ކުޅުނު މުބާރާތުގެ ފައިނަލް މެޗުގައި ކާށިދޫއިން 4-1 އިން ހދ. ނައިވާދޫ ބަލިކުރިއިރު، އެ މެޗުގައި ވެސް އޭނާ ވަނީ މުހިންމު ވަގުތުތަކުގައި ކާށިދޫގެ ގޯލު ބެލެހެއްޓުމުގެ ޒިންމާ ފުރިހަމައަށް އަދާކޮށްފައެވެ. 

މީގެ އިތުރުން، މުޅި މުބާރާތުގައި އޭނާ ފެނުނީ ކާށިދޫއަށް ލިބިފަހުރި "ރަންގަނޑެއް"ގެ ގޮތުގައެވެ. އޭނާގެ ހުޝިޔާރުކަމަކީ މުޅި ކާށިދޫ ޓީމަށް ވެސް އޮތް އެންމެ ބޮޑު އެއް ހިންހަމަޖެހުން ކަމުގައި އޮތީ ވެފައެވެ.

މީގެ ތެރެއިން ވެސް، ގަދަ-16ގެ ބުރުގައި، މުބާރާތް އެންމެ ގިނައިން ކާމިޔާބުކޮށްފައިވާ ތިމަރަފުށި ޕެނަލްޓީ ޖަހައިގެން ކާށިދޫއިން ބަލިކުރިއިރު، ސަލީލުގެ މޮޅު ހުނަރު ގިނަ ބަޔަކަށް ފާހަގަވިއެވެ. 

މެޗަށްފަހު ވާހަކަ ދައްކަމުން ސަލީލް ބުނީ، މިއީ އުއްމީދުކުރި މަޤާމެއް ނޫންކަމަށެވެ. 

ހިޔެއްވެސް ނުކުރަން އަސްލު މީތި ލިބޭނެ ކަމަކަށް. އަދި މިހާތަނަކަށް ކީޕަރަކަށް ލިބިފައި ނެތް ދޯ. އެހެންވެ އުންމީދެއް ނުކުރަން މީތި ލިބޭނެ ކަމަކަށް.

ޝަލީލް ބިންޏެވެ.

އަދި ޓީމުގެ މި ފަހަރުގެ އަމާޒަކަށްވީ އަތޮޅު ތަށި ނެގުން ކަމަށާއި، ނަމަވެސް އެކަން ހާސިލް ނުވުމުން، މެޗަކަށްފަހު މެޗެއް ނަގަމުން، ހިއްވަރާއެކު ކުރި ބުރަމަސައްކަތުގެ ނަތީޖާއަކަށްވީ އުއްމީދުނުކޮށް ތިއްބައި މުބާރާތުގެ ތަށި ކާމިޔާބުކުރެވުންކަމަށް ވެސް އޭނާ ބުންޏެވެ.

ކާށިދޫއިން، މި މުބާރާތުގެ ފައިނަލަށް ދަތުރުކުރީ، މޮޅެތި ގިނަ ޓީމުތަކެއް ކަޓުވާލުމަށްފަހުއެވެ. އެގޮތުން ގަދަ-16ގައި، މުބާރާތް އެންމެ ގިނައިން ކާމިޔާބުކުރި ތިމަރަފުށި ކަޓުވާލިއިރު، ކުއާޓާ ފައިނަލް ކާމިޔާބުކުރީ މިދިޔަ އަހަރު ސެމީގައި ކުޅުނު ވިލިމާލެ ބަލިކޮށްގެންނެވެ. އަދި ސެމީގައި ބަލިކުރީ 2023ގައި މުބާރާތް ކާމިޔާބުކުރި ވާދޫއެވެ. މި ހުރިހާ މެޗެއްގައި ވެސް ސަލީލް ވަނީ ތަފާތު ކުޅުމެއް ދައްކާފައެވެ. 

މިފަހަރުގެ މުބާރާތުގެ މޮޅު ކީޕަރުގެ މަގާމު ވެސް ލިބިފައިވަނީ ސަލީލަށެވެ.