ސިޔާސީ ބޮޑެތި ބާރުތައް ބަލިކޮށް ލަންކާގެ ރައީސްއަކަށް އަނޫރާ!

އަވަށްޓެރި ސްރީލަންކާގެ ސިޔާސީ ބޮޑެތި ބާރުތައް ބަލިކޮށް އެޤައުމުގެ ރައީސްއަކަށް އަނޫރާ ކުމާރަ ޑިސެނަޔަކަ އަންނާނެ ކަމުގެ އުންމީދު ބޮޑުވެއްޖެއެވެ. 

ސްރީލަންކާގެ ރިޔާސީ އިންތިޚާބުގެ ވޯޓު ގުނަމުންދާއިރު 4,070,663 ވޯޓާއި އެކު, މިހާރު އެންމެ ކުރީގައި އޮތީ އަނޫރާ އެވެ.  އަނުރާ ވާދަކުރަމުން ދަނީ ނޭޝަނަލް ޕީޕަލްސް ޕާޓީ އިންނެވެ.

ދެވަނާގައި ވާދަކުރަމުންދަނީ އެޤައުމުގެ އެންމެ ބޮޑު އިދިކޮޅު ލީޑަރ ސަޖިތް ޕްރެމަދާސާއެވެ. ތިންވަނާގައި އޮތީ ސްރީލަންކާގެ މިހާރުގެ ރައީސް ރަނިލް ވިކްރަމަސިންހް އެވެ. 

އިންތިޚާބުގައި 50 ޕަސެންޓް ވޯޓު ކާމިޔާބު ކުރާ ފަރާތަކަށް އިންތިޚާބު ފުރަތަމަ ބުރުން ކާމިޔާބުވާނެއެވެ. ފުރަތަމަ ބުރުގައި އެވަރަށް އެއްވެސް ކެނޑިޑޭޓަކަށް ވޯޓު ކާމިޔާބު ނުވާނަމަ އިންތިޚާބުގެ ދެވަނަ ބުރަކަށް ދާންޖެހޭނެއެވެ.

 މިހާތަނަށް އަނޫރާ އަށް ކާމިޔާބު ކުރެވިފައިވަނީ 40ޕަސެންޓުކަން ފާހަގަކޮށްލަން ޖެހެއެވެ.

ސްރީލަންކާގެ މަސްރަހު ދިރާސާ ކުރާ ފަރާތްތަކުން ބުނެފައިވަނީ ލަންކާގެ އިންތިޚާބުގައި އުންމީދު ނުކުރެވޭ ފަދަ ނަތީޖާއެއް ނުކުންނަމުން މިދަނީ އެޤައުމުގެ އިޤްތިޞާދީ ޙާލަތު މިހާރު ވެއްޓިފައި އޮތް ހިސާބުން ކަމަށެވެ. 

މިހާރު އެޤައުމުގެ އާންމުން ހޭދަކުރަމުންދަނީ އިޤްތިޞާދީ ގޮތުން ދަތި ޙާލަތެކެވެ. މާލީ ގޮތުން ދެކޮޅުނުޖެހުމުގެ ސަބަބުން އާންމުންދަނީ ވަރަށް ބޮޑެތި ދަތިތަކެއް ތަހައްމަލު ކުރަމުންނެވެ.