އަށް ގޯލު ފެނުނު ކޮޕަ ޑެލް ރޭގެ ސެމީގައި ބާސެލޯނާ އާއި އެތުލެޓިކޯ އެއްވަރުވެއްޖެ

ކޮޕަ ޑެލް ރޭގެ ސެމީފައިނަލްގެ ފުރަތަމަ ލެގުގައި ބާސެލޯނާ އާއި އެތުލެޓިކޯ ބައްދަލުކުރި މެޗު 4-4 އިން އެއްވަރުވެއްޖެއެވެ.

ބާސެލޯނާގެ އެސްޓޭޑިއޯ އޮލިމްޕިކޯގައި ކުޅުނު މި މެޗުގައި ދެ ޓީމަށް ވެސް ދެ ގޯލުގެ ލީޑެއް ލިބުނު ވަގުތުކޮޅެއް ދިޔައެވެ. ނަމަވެސް އެއްވެސް ޓީމަކަށް ލީޑު ހިފަހައްޓައެއް ނުލެވުނެވެ.

މެޗުގައި ފުރަތަމަ ލީޑު ނެގީ އެތުލެޓިކޯ މެޑްރިޑެވެ. މެޗުގެ ފުރަތަމަ މިނެޓުގައި މި ގޯލު ކާމިޔާބުކުރީ ހޫލިއަން އަލްވަރޭޒްއެވެ. އަދި އޭގެ ފަސް މިނެޓު ފަހުން އެންޓޮނީ ގްރީޒްމަން ވަނީ އެތުލެޓިކޯގެ ލީޑު ފުޅާކޮށްދީފައެވެ.

ނަމަވެސް މެޗުގެ 21ވަނަ މިނެޓާ ހިސާބަށް ދިޔައިރު ބާސެލޯނާއިން މެޗުގެ ނަތީޖާ ހަމަހަމަކުރިއެވެ. ބާސެލޯނާގެ މި ދެ ގޯލު ފެނިގެން ދިޔައީ 3 މިނެޓުގެ ތެރޭގައެވެ. އެގޮތުން 19 ވަނަ މިނެޓުގައި އެ ޓީމުގެ ފުރަތަމަ ގޯލު ޕެޑްރީ ކާމިޔާބުކުރިއިރު،  21 ވަނަ މިނެޓުގައި ބާސެލޯނާއަށް ނަތީޖާ ހަމަހަމަކޮށްދިނީ ޕައު ކުބާސީއެވެ.

މެޗުގެ ފުރަތަމަ ހާފު ނިމުމުގެ ކުރިން އިނީގޯ މާޓިނޭޒްގެ ގޯލަކުން ބާސެލޯނާއިން އެ ޓީމުގެ ލީޑު ފުޅާކުރިއެވެ. އަދި އޭގެ ފަހުން ދެވަނަ ހާފުގައި ރޮބަޓް ލެވަންޑޯސްކީގެ ގޯލަކާއެކު، ބާސެލޯނާއިން ދެ ގޯލުގެ ލީޑެއް ނެގުމުން، އެ ޓީމަށް މެޗު ކާމިޔާބުކުރެވޭނެކަމަށް ބެލެވުނެވެ. 

ނަމަވެސް މެޗު ނިމެން 6 މިނެޓަށް ވެފައި ވަނިކޮށް އެތުލެޓިކޯގެ މާކަސް ލޮރެންޓޭ އާއި، ބަދަލުކުޅުންތެރިއެއްގެ ގޮތުގައި ކުޅެން ނިކުތް އެލެކްސެންޑަރ ސޯރލޮތު އިތުރު ވަގުތުގައި ކާމިޔާބުކުރި ގޯލަކާއެކު، މެޗު ނިމުނީ އެއްވަރުވެގެނެވެ.

މުބާރާތުގެ ދެވަނަ ލެގު އޮންނާނީ އެޕްރީލް މަހު، އެތުލެޓިކޯގެ މެޓްރޮޕޮލިޓާނޯ ސްޓޭޑިއަމްގައެވެ. މި މެޗުން މޮޅުވާ ޓީމެއް ފައިނަލުގައި ބައްދަލުކުރަން ޖެހެނީ ރެއާލް މެޑްރިޑް ނުވަތަ ރެއާލް ސޮސިއެދާދްއާއެވެ. 

ބާސެލޯނާއަށް މި މުބާރާތް އެންމެ ފަހުން 2021ގައި ކާމިޔާމުކުރެވުނު އިރު، އެތުލެޓިކޯއަށް ކާމިޔާމިކުރެވުނީ 2013ގައެވެ.