ކުޅިވަރު
މާބައިދޫ "މެޗިން" ޕޮއިންޓުގައި ސާރފް ލީގުގެ އާ މުބާރާތެއް ބާއްވަން ނިންމައިފި
ރާއްޖޭގައި ށަރފް ކުރަނީ، ފޮޓޯ: އެމްއެމްޕީއާރުސީ
ހުލާސާ
މިއީ ލާމުގައި ބާއްވާ ސާރފިންގެ ފުރަތަމަ ބޮޑު އިވެންޓު.
ދިވެހި ސާރފް ލީގެއް އާ އިވެންޓެއް އިތުރުކޮށް، ލ. މާބައިދޫގެ "މެޗިން" ރާޅު ޕޮއިންޓުގައި ސާރފިނ މުބާރާތެއް ބޭއްވުމަށް މޯލްޑިވްސް ސާފިން އެސޯސިއޭޝަން (އެމްއެސްއޭ) އިން ނިންމައިފިއެވެ.
ލ. މާބައިދޫގައި އެމްއެސްއޭއިން ބާއްވާ އިވެންޓުގެ ނަމަކީ "ކެރަންޑޫ"އެވެ. މި އިވެންޓާ ގުޅޭ އެއްބަސްވުމެއްގައި އެ އެސޯސިއޭޝަނުން މިހާރު ވަނީ މާބައިދޫ ކައުންސިލް އިދާރާއާއެކު އެއްބަސްވުމެއްގައި ސޮއިކޮށްފައެވެ.
އެ އެސޯސިއޭޝަނުން އާ އިވެންޓެއް ބޭއްވުމަށް ނިންމިއިރު، ގދ. ގައްދޫގައި ބާއްވަން އުޅުނު ދިވެހި ސާފް ލީގުގެ ފުރަތަމަ މުބާރާތް، "ކަޅެގަލެކޮޑާ" ވަނީ ބޭއްވޭގޮތް ނުވެފައެވެ. އެ މުބާރާތް ނުބޭއްވުނީ، އެ ރަށު ކައުންސިލްގެ މާލީ ހާލަތު ހުރިގޮތުންކަމަށް، އެ އެސޯސިއޭޝަނުން ވަނީ މަޢުލޫމާތު ދީފައެވެ.
"ކެރަންޑޫ" އަކީ ލ އަތޮޅުގައި މިހާތަނަށް ބާއްވާ ސާރފިންގެ ފުރަތަމަ ބޮޑު އިވެންޓެވެ. ނަމަވެސް މި މުބާރާތް ބާއްވާން ނިންމާފައިވާ ރާޅު ޕޮއިންޓަކީ ސާރފަރުންގެ މެދުގައި މަޝްހޫރު ޕޮއިންޓެކެވެ. އަދި މި ޕޮއިންޓަކީ އަވަސް ރާޅުތަކެއް ހުންނަ, ރާޅު ޕޮއިންޓެއް ކަމަށް އެމްއެސްއޭއިން ވަނީ ބުނެފައެވެ.
"ކެރަންޑޫ"ގެ އިތުރުން މި އަހަރު ދިވެހި ސާފް ލީގުގައި ދެން އޮންނާނީ މ. މުލީގައި ޖުލައި މަހު ބާއްވަން ނިންމާފައިވާ "މުލިކޮޅު" އަދި މާލޭގައި ބާއްވާ "ރަންނަމާރި" އިވެންޓެވެ. އޭގެ ތެރެއިން "ރަންނަމާރި" އިވެންޓް ބާއްވާނެ ތާރީޙެއް އަދި ކަނޑައަޅާފައެއް ނުވެއެވެ.
