Ads by Exprox

ޚަބަރު

އުތުރުގެ 21 ފެރީ ސްޓޮޕް ކައުންސިލްތަކާ ހަވާލުކުރުމަށް ނިންމައިފި

އުތުރުގެ 21 ފެރީ ސްޓޮޕް ކައުންސިލްތަކާ ހަވާލުކުރުމަށް ނިންމައިފި

މިއަދު ވިލާކޮލެޖުގައި ބޭއްވުނު ރަަސްމިއްޔާތު ފޮޓޯ:ޕީއެސްއެމް

އާމިނަތު ޔުމްނާ

އާމިނަތު ޔުމްނާ

26 ފެބްރުއަރީ 2025، 03:11

26 ފެބްރުއަރީ 2025، 03:11

އުތުރުގައި ޤާއިމްކޮށްފައިވާ 21 ފެރީ ސްޓޮޕެއް ކައުންސިލްތަކާ ހަވާލުކުރުމަށް ސަރުކާރުން ނިންމައިފިއެވެ. މިކަމާ ގުޅޭގޮތުން މިއަދު ވިލާ ކޮލެޖުގައި ބޭއްވުނު ރަސްމިއްޔާތެއްގައި އެމްޓީސީސީއާއި، ސިޓީތަކާއި އިދާރީދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއާއި، ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއާ ދެމެދު އެއްބަސްވުމެއްގައި ސޮއިކުރެވުނެވެ.

މި އެއްބަސްވުމުގެ ދަށުން، އާރްޓީއެލްގެ ޒޯން 1 ހިމެނޭ ހއ، ހދ އަދި ށ އަތޮޅުގައި ޤާއިމްކޮށްފައިވާ ފެރީ ސްޓޮޕްތައް ވަނީ އިދާރީ ދާއިރާތަކާ ބެހޭ ވުޒާރާއާ ހަވާލުކުރެވިފައެވެ. މި ފެރީ ސްޓޮޕްތަކަކީ މުޅި ރާއްޖެ ގުޅުވައިދޭ ދަތުރުފަތުރުގެ ނިޒާމު، އާރްޓީއެލް ނިޒާމުގައި ބޭނުންކުރާނެ ފެރީ ސްޓޮޕްތަކެކެވެ.

ދަތުރުފަތުރާ ބެހޭ ވުޒާރާގެ ފަރާތުން ފެރީ ސްޓޮޕްތައް ހަވާލުކުރުމުގެ ލިޔުން ހަވާލުކޮށްދެއްވީ ވަޒީރު މުހައްމަދު އަމީންއެވެ. އަދި އިދާރީ ދާއިރާތަކާ ބެހޭ ވުޒާރާގެ ފަރާތުން ލިޔުމާ ހަވާލުވެވަޑައިގަތީ ވަޒީރު އާދަމް ޝަރީފް އުމަރެވެ.

އިދާރީ ދާއިރާތަކާ ބެހޭ ވުޒާރާއިން ވިދާޅުވެފައިވަނީ މި އެއްބަސްވުމުގެ ދަށުން، ކައުންސިލްތަކަށް ފެރީ ސްޓޮޕްތައް ބެލެހެއްޓުމުގެ ފުރުސަތު ލިބިގެންދާނެ ކަމަށެވެ. އަދި ފެރީ ސްޓޮޕްތަކާއި ފެރީ ސްޓޮޕްތައް ޤާއިމްކުރެވިފައިވާ ބިމާ ގުޅޭ ހުރިހާ ހައްގުތައް ކައުންސިލްތަކުގެ ދަށަށް ބަދަލުކުރެވޭނެ ކަމަށެވެ. މީގެ ސަބަބުން ކޮމާޝަލް އޭރިއާތަކާއި އިންވެގެންވާ ސަރަހައްދު ކުއްޔަށް ދިނުމާއި މާލީ މަންފާ ލިބިގަތުމުގެ ހައްގު ކައުންސިލްތަކަށް ފުރިހަމައަށް ލިބިގެންދާނެ ކަމަށްވެސް އެ ވުޒާރާއިން ވިދާޅުވެފައިވެއެވެ.

ރާއްޖޭގެ ރަށްތައް ދަތުރުފަތުރުގެ ނިޒާމުން ގުޅާލުމުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށްދަނީ 6 ޒޯނަކަށް ބަހާލައިގެނެވެ. މިހާތަނަށް ރާއްޖޭގެ 9 އަތޮޅެއްގެ 81 ރަށް އާރުޓީއެލް ފެރީގެ ޚިދުމަތުން ގުޅާލެވިފައިވާއިރު، ދެން އެންމެ އަވަހަށް މި ޚިދުމަތް ފެށުމަށް ހަމަޖެހިފައިވަނީ ރ އަދި ބ އަތޮޅުގައެވެ. މި ދެ އަތޮޅުގައި ޖުލައި މަހުގެ ނިޔަލަށް ޚިދުމަތް ފެށުމަށް ސަރުކާރުން ދަނީ މަސައްކަތް ކުރަމުންނެވެ.
                    

މި ލިޔުން ކިޔާލުމުން

Ads by MSS